機動戰士高達︰瑪斯子嗣　The Children of Mars - 第十八集　仲識驚嘅話，以後咪作死，明冇？(一)

灰白色嘅殘骸，已經分崩離析，但係最大嘅碎片，仍然落緊去地球。

幾個勢力嘅船艦，不約而同，都打出歸航信號。

※※※

又一座隕石破碎器埋入地底，呢個時候，阿真都見到喇，由智慧女神打出來嘅信號彈。

「歸航？呢個時候？」

「已經太近，」尼爾講，「再咁落去，會畀重力束縛住。」

「工程仲未做完，」露娜問︰「呢舊嘢仲有幾大？成公里？」

「嗰個奧布佬呢？仲有嗰幾個平民——」

「佢哋仲喺出面。」

※※※

喺智慧女神嘅艦橋上面，泰莉亞拿喺麥高風，同全架船嘅人講︰「本艦即將進入大氣層，同時以唐懷瑟繼續攻擊目標——」

「我哋仲未測試過！」

亞瑟，佢哋嘅副艦長，一聽到就嗌咗出來，支麥恐怕收到音。

「而家就係測試！」

嗌完，佢就望向後面，嗰三位貴賓。

「就係咁樣，可唔可以請議長同代表，仲有墨丘利女士，移步到伏爾泰——」

「我拒絕！」

有人即刻彈起身，一啲都唔睇場合。

唉，男人無論幾歲，都係任性嘅生物。

「咪任性喇，基巴杜。」

「連呢啲任性嘅權力都冇，我呢個議長唔做喇！」

「咁我呢個艦長都唔做喇！」

有人拍檯喇。

有人掟帽喇。

有人啤咗過來。

有人啤翻返去。

最後，有人縮咗。

「而家、返去、睇住、屋企、曉做？」

「……係。」

基巴杜．戴蘭達，敗。

佢執返頂帽，坐返低，開啟通訊。

「尼爾，你跟埋去，睇住佢。」

「係。」

呢個時候，行到門口嘅基巴杜，向住兩位貴賓伸手。

「咁，有請喇，兩位女士。」

「唔喇，亞斯蘭未返來。」

「我都唔喇，蘇萊塔都未返來。」

基巴杜呆咗半秒，然後望咗過來。

「或者我可以，」佢講︰「請阿斯巴代表落船，不過——」

「任何粗暴對待，奧布外交部，隨時候教。」

「至於墨丘利女士——」

「貝納里特法務部，歡迎挑戰。」

「咁我——」

「我乜啊我？亞瑟！同我請議長出去！」

於是乎，佢嘅副艦長，就「請」咗議長出去。

呢個時候——

「艦長，有通訊。」

「接入來。」

喺螢幕跳出來嘅人，係嘉達．伊素，仍然喺駕駛艙。

「格拉迪斯艦長。」

「多謝閣下支援，請撤離你嘅部隊，本艦會進入大氣層，以陽電子炮繼續攻擊目標。」

「勇氣可嘉，艦長。不過在此之前，我有一事相求——將剩低嘅隕石破碎器，交畀我嘅部隊。」

「……閣下，係想留低你嘅人？」

「我留低。」

「……伊素卿，恕我直言，你嘅性命，唔應該用喺呢個地方。」

「高達大概承受得到，進入大氣層嘅熱力，至於陽電子炮，」螢幕上面，仲好後生嘅女仔笑咗，繼續講︰「希望亞古尼卡保佑，唔會直接打中。」

※※※

「歸航信號。」

「得，我見到，你返去先。」

「你呢？」

「唏，我部機識變型，飛得快過你。」

「嗯。」

等到巴巴托司走咗，古荻利亞又打開通訊︰「喂，艦長，仲有冇多嘅隕石破碎器？」

※※※

「火星之王，原來不過係咁。」

「……你哋全部，會死喺呢度！」

扮唔住喇，嗰副胸有成竹嘅嘴臉——就喺亞斯蘭拿住斧頭，劈走嗰部高達，一隻手之後。

越係交手，佢就越係肯定，菲扎爾．伊謝魯根特，係邊種人物——冇辦法溝通，冇辦法說服，冇辦法共存，好耐好耐以前，一早就痴咗線。

好彩，今次呢個，同佢無親無故。

「迪路先生！」

蘇萊塔喺通訊入面嗌，佢都注意到喇。雷達上面，幾十個反應——有人竟然冇落命令，叫部下撤退，反而叫哂過來，圍毆佢哋兩個。

噢，咁就麻煩喇。

時間唔係幾夠，再咁打落去，連佢哋兩個，都會畀重力束縛住。

就喺佢開始諗計嘅時候，鐳射打咗埋來，掃開包圍佢哋嘅域根部隊。

下個瞬間，藍色嘅渣古衝入來，徹底打穿缺口。

佢哋即刻衝出去。

「你呢條友，剩係識得同我惹麻煩！」

「……伊撒古？」

一見到螢幕入面嘅人，佢嘅頭就痛喇，嗰種畀人迫去飲酒，飲咗成晚嘅痛。

雖然嘴角，亦都忍唔住笑。

「喂喂喂，點解每次見到你，都識到新嘅女仔？」另一個，果然係迪亞加，「快啲介紹吓，我保證唔同公主講。」

「介乜鬼紹？上個禮拜，我先見過美莉亞——」

一提起美莉亞三粒字，迪亞加塊臉就黑咗，如果本來唔算黑嘅話。

跟住，伊撒古塊臉都白埋。

「……佢畀人撇咗？」

「係我撇佢。」

「佢畀人撇咗。」

「係我撇佢！」

佢收聲啦，有幾遲鈍都好，都見到伊撒古塊臉寫住︰再講我㩧濕你。

呢個時候，有第把聲，打爛呢陣尷尬。

「請、請問——我哋係唔係——返智慧女神……」

「噢，唔係。」迪亞加搶住答︰「我哋會去伏爾泰，智慧女神而家，準備緊入大氣層。」

「……吓？」198Please respect copyright.ＰＥＮＡＮＡmqyLTugzzL

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically