機動戰士高達︰瑪斯子嗣　The Children of Mars - 第十三集　戴副黑超就想掩飾身份，世上邊有咁嘅白痴呀？(二)

呢個時候，漁火艦橋上面，畢斯杰特仲係覺得——唔係咁妥囉。

「畀佢哋落船，真係冇問題？」

「喺架船上面，」澳加答︰「韞咗幾個月，點都要透透氣。」

「但係大小姐佢——」

毫無疑問，號角入面，有人打佢主意。就算係新人類嘅地方，始終係地球圈，落手嘅方法，點樣都有。

「有嗰嚿頭盔，你唔洗驚喎。」

尤真咁講，顯然好有信心——所以佢更冇信心喇。

「我知你擔心啲乜，」澳加拍佢膊頭，講︰「就係以防萬一，先叫亞斯頓佢哋留喺出面。」

※※※

「你有啲嘢記錯咗，基巴杜——十八年前，孟德爾受襲之後，艾爾諾娜．薩瑪雅，從此下落不明。」

聽到呢句，戴蘭達笑喇，跟住答︰「咁梗係，好榮幸見到你，墨丘利女士。」

「咁得閒見我，你呢個議長，真係冇乜嘢做。」

「有啲嘢，比公事緊要。」

「好，你畀我嘅，我睇過喇。」

「有冇辦法？」

「生物科技，係你哋嘅專長，唔係我嘅。」

「當年，響博士嘅遺產，落咗你手，應該冇錯呀話？」

「咁就視乎——」講到呢度，普洛斯佩拉㩒低咗聲線︰「呢個地方，可以講嘢呀話？」

「咁梗係。我呢個做議長嘅，都有返少少手段。」

間諜，應該有，藍色宇宙嘅，咁應該冇喇。

「就當我有，但就算悠連同薇雅都喺度，大概都幫你唔到。」

「真係冇辦法？」

「你清楚過我——你哋拿住粒雞蛋，可以將雞變做鴨，鴨變做蛇——但係前提係，隻蛋都未孵出來。」

好不幸，隻蛋早就孵咗，今年十六歲。

「我明白。」

「唔好咁快失望，大嬸我有帶禮物。」

普洛斯佩拉將塊晶片，擺咗上枱，推咗畀佢︰「域根嘅冷凍睡眠技術，算係最後手段。」

「我就唔問，你係點樣拿到。」

「幫你搭線嗰位，或者會同你講——就問多句，患者同你乜關係。」

「我嗰仔。」

普洛斯佩拉望住佢，唉咗啖氣，先再講︰「其實，你可以搵奧拉。」

「係有呢個打算，不過——」

「呵呵呵——𡃁仔，搵大嬸當士啤呔囉？」

「你知道㗎，我係個結咗婚嘅男人。」

就喺呢個時候，警報響喇。

※※※

「新人類嘅衛星，我都想入去睇吓啊。」

「唉，鬼叫抽籤輸咗乜？真係衰。」

亞斯頓佢哋架船冇入去，以免有乜緊要嘢發生。

不過，機動戰士冇擺出來。團長咁樣吩咐，以免引起麻煩——地球圈真係多規劃，咁樣反應好慢——

「喂，新人類嘅衛星，都會噴煙花嘅乜？」

「咁係爆炸。」

「哇，勁。」

佢開始覺得，阿賴耶識用得太多，真係會整壞人嗰腦。

「勁你哋個頭啊！」佢講︰「而家出事喇，聯絡漁火，動作快啲！」

※※※

「快啲派一隊人——唔係，派夠兩隊，一定要確保阿斯巴代表安全。」

而家，戴蘭達喺幾個保鑣包圍下，去緊預定嘅避難地點。

「基巴杜，」普洛斯佩拉話︰「我嗰女喺出面。」

佢點頭，拿起通訊器︰「調動閉路電視，同我——」

「佢哋喺港口。」

「……而家出事嘅，就係港口。」

※※※

「發生乜事喇？恐怖襲擊啊？」

港口，呢個時候，已經子彈橫飛。

卡嘉蓮．尤拉．阿斯巴，就匿喺張凳後面，換緊用哂嘅彈匣。

「唔係，班人目標，好明顯係你——」

佢嘅保鑣先生，一邊咁講，一邊將舊嘢掟咗出去。

轟——手榴彈，威力唔細。

「……你到底點帶入來。」

「唔係講呢個嘅時候——呢場會面冇乜人知，咁所以——」

「有鬼，人選唔多，P.L.A.N.T.？」

「有可能，但係你喺度出事，佢哋就難辭其咎。」

「咁啫係，更有可能係——奧布。」

做得奧布代表首長，喺自己國家，梗係有人想佢死啦。

咁得返幾個人喇。

返到去，要清理一下，如果佢有命返去嘅話。

呢個時候，另一邊嘅出口，來咗一隊兵，札多(Z.A.F.T.)嘅兵。

「阿斯巴代表，請跟我哋來。」

佢出咗掩體，乜都冇懷疑。

咁所以，等到嗰幾個札多兵，向住佢舉起槍，佢已經反應唔切喇。

就係呢個時候，有件嘢由後面飛咗過去，掟中某個札多兵嘅臉。

槍聲響起。

所有人都瞓低咗，除咗佢。

「藍色宇宙，著住札多制服，真係有創意——」

佢擰轉頭望過去。

金色長髮嘅少女，行咗埋來，執喺地下碌緊嘅頭盔。

「喂，沙律，介紹吓，幾時換咗女朋友，粉紅知唔知？」

「……唔係沙律，係察拉！」

喂，講好咗嘅化名呢？

※※※

「……古荻利亞．伊謝魯根特。」

「亞斯蘭．察拉。」

三日月舉起兩隻手，接住掟畀佢嘅頭盔。

「而家嘅我，只係亞歷士．迪路，除此之外，乜都唔係。」

「噢，咁就請你嗌我，芙拉姆．拿拉。」

膠膠哋，呢兩條友。

佢擰轉頭，望向隔離，腳震到唔得嘅女仔。

「原來真係有㗎。」

「我唔驚唔驚唔驚唔驚——吓？係？有乜？」

「戴副黑超，就想掩飾身份嘅白痴。」

「……唔好講出來啊，三日月！」

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically