機動戰士高達︰瑪斯子嗣　The Children of Mars - 第十一集　我呃你(二)

呢一日，同平時冇乜分別。

古荻利亞一早起咗身，安排今日嘅航線。

等佢差唔多畫好，芙美頓就會到。

「大小姐。」

「嗯，幫我擰畀團長。」

芙美頓伸手擰走航線圖，轉身離開。

「喂，芙美頓。」

「仲有乜需要？」

「……冇，冇嘢，你繼續。」

※※※

P.D.323，七月十六號。

同他賓先生佢哋分開之後，我哋又繼續旅程喇。

距離地球圈，大概仲有兩個半月，古荻利亞佢話，我哋已經離開阿麗安蘿德嘅巡邏區，唔洗擔心會撞上去喇。

仙奴拿到部新機，堅持要嗌流星號，好彩唔係叫自由，如果唔係——咁要決鬥喇。

機庫啲鬼故，呢家靜咗少少，大概係佢哋終於發現，太空船係冇宇宙女鬼嘅。

至於三日月佢——

※※※

「我贏喇。」

第四百八十三場模擬戰，風靈vs巴巴托司，打到呢家，三日月終於贏返一場，好僥倖嗰隻。

「太好喇，三日月！」

蘇萊塔由駕駛艙跳咗出來。佢望住蘇萊塔，忍唔住問︰

「點解？」

「……吓？」

「你好似開心過我。」

「呃——咁朋、朋友有進展、係、係應該開心嘅！」

好似係咁。

蘇萊塔望住佢，塊臉開始謝落去。

似乎係佢沉默得滯。

「……我哋係朋友啊可？」

好問題。

雖然，佢唔係鐵華團，不過，又唔算只係客人，咁所以——

「你係個好好嘅朋友，蘇萊塔。」

「……真係嘅？」

「係。」

「咁咁咁咁——我哋再打一場、呢家——風靈話我哋唔會再輸喇！」

「風靈唔識講嘢㗎。」

就喺呢個時候，警鐘響咗，有嘢發生嗰種。

※※※

呢個時候，艦橋。

「六架、九架、十二架——」

「已經包圍我哋喇！」

「乜唔係話，離開咗阿麗安蘿德嘅巡邏區乜？」

澳加坐喺艦長席上面，包圍班友，已經嚇到慌哂，除咗大嬸，同埋大小姐。

「呢個唔係巡邏隊嘅規模哦。」大嬸咁講。

十五架船，超過一百部機動戰士，呢個陣容，比起捉偷渡船，更似去討伐域根嘅宇宙要塞。

對方有備而來，咁就表示——

「畢斯杰特。」

早佢一步，大小姐已經開口，講︰

「帶幾個人，將芙美頓單獨囚禁，有任何反抗，即刻開火。」

畢斯杰特點頭，然後擝槍，上膛。

芙美頓相當配合，跟住出去，乜都冇講。

「團長，有通訊。」

「接入來。」

螢幕入面，黑皮膚嘅青年，著住號角軍服。

「阿麗安蘿德，第二艦隊司令，伊奧克．古捷因。」

「鐵華團團長，澳加——」

「老鼠嘅名，我冇打算記住，而家只講一次——交出古荻利亞．伊謝魯根特，其他嘅人，我哋會護送返火星——」

「一定係有乜誤會，我哋只係艘民船——」

「別嘥我時間，火星老鼠，我哋有好確鑿嘅情報——」

呢個時間，有人撳咗佢膊頭一下，然後行咗入鏡頭。

「借問聲，你口中嘅火星老鼠，包唔包括我？」

「……墨丘利女士？」

「哟，伊奧克，上面見面，係菲力特屋企吓話？桀派嘅改裝應該整好咗，打算順路去拎？」

嗰位哥仔，頭先係威係勢，而家見到大嬸，即刻卡咗喺度，搵唔到下句台詞。

螢幕入面，有人𢫨開咗佢，行入鏡頭——後生妹，短頭髮，一樣著住號角軍服。

「噢，呢位小姐又係邊個？伊奧克，你女朋友？」

「茱莉雅達．朱里斯，特務三佐——」

「啊，原來係拉斯達爾嘅寶貝女——咁你有乜高見？」

「……閣下，以及所有隨行人員，會由我哋護送到地球，呢艘船返返火星——」

「呢艘船上面，都係大嬸我嘅隨行人員哦。」

「船可以通過，除咗古荻利亞．伊謝魯根特。」

「呢度冇人叫古荻利亞．伊謝魯根特。」

「我哋有確鑿嘅情報。」

「有幾確鑿。」

「伊蘇拿里奧．法里度。」

大嬸靜咗幾秒，跟住先講︰「好喇，不如大家開門見山——我哋而家，同費特力克．法里度做緊嘢。」

呢次，換係嗰位小姐靜咗幾秒，跟住先講︰「監察局之後，可以同我哋聯絡——而家，我收到嘅命令，拘捕古荻利亞．伊謝魯根特。」

「船上面冇——」

「如果動用武力，到時好難避免——會有損傷。」

「菲力特會知道呢件事。」

「而家阿麗安蘿德嘅總司令，係拉斯達爾．艾利安——你哋有五分鐘時間。」

呢下，就連大嬸，都冇嘢好講喇。

「唔洗五分鐘——」

呢個時候，又有人行咗出去，畀個鏡頭影佢。

「我投降。」

大小姐。

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically