機動戰士高達︰瑪斯子嗣　The Children of Mars - 第九集　一塊布，兩部機(一)

喺宇宙嘅某個地方，一間昏昏暗暗嘅船艙。

蘇菲．普羅涅，瞓咗喺床，玩緊佢部平板，作為王牌嘅小小特權。

佢哋呢隊人，專門幫號角啲大人物，做啲唔見得光嘅事——雖然來到咁遠，都係第一次。

目標係某艘火星嘅船，上面好似有個，好大好大嘅大人物——是但啦，周街都係大人物，邊鬼個記得？

「喂，諾蕾雅，情報你睇咗喇？」

「域根嘅。」

「嗰條友兩年前，好似都有份參戰。」

「……新人類嘅走狗。」

哎呀哎呀，又起哂弶喇。

早排，佢哋跟甩咗，差啲搵唔返目標喺邊。

不過啱啱，大佬啲朋友，又畀返嗰位置佢哋喇。

※※※

解決普魯華茲之後，第二日。

漁火，艦橋。

「——所以，你想跟我哋走？」

「你喺昭弘大佬，昭弘係昌弘大佬，咁所以——」

喺澳加嘅面前，係亞斯頓——代表住普魯華茲，剩低嘅人。

過度依賴童兵，令到權力轉移，非常簡單——亞斯頓已經係最大嗰個喇。

「唔得？」

「都畀人叫大佬喇，仲有乜唔得？」

「係嘅，大佬！」

「嗌我團長。講明先，我哋要去地球，唔保證順利，唔保證安全，唔保證有命返來。」

「唔緊要嘅，我哋——」

「咳、咳——第一條規矩，鐵華團呢度，一係就兄弟，一係就客人，冇廢棄人，清楚喇嘛？」

「係嘅，團長！」

※※※

呢個時候，醫療室。

畢斯杰特都醒唔起，上次見到自己細妹，生生猛猛，係幾時嘅事，雖然呢——

「哥，個頭盔好重啊。」

克歷嘉講到咁白，坐喺凳上面嘅女人，忍唔住笑咗。

「哎呀，功能先緊要，其他嘢唔係好重要。」

「真係唔好意思。」佢講。

普洛斯佩拉．墨丘利，佢哋嘅客人，就戴住差唔多嘅頭盔。

數據風暴污染，更多嘅人，就咁嗌佢——火星病。

不治之症，肆虐咗幾百年，療程非常非常之貴，只有最有錢嘅貴族，可以負擔。

佢哋嘅客人，只用咗一個頭盔。

「唔洗一直戴住，等到發作嗰陣，再擺上去，裝置會自己運作。」

「好多謝你，墨丘利女士。」

「我又冇醫好，唔洗多謝我喎。」兩手一攤，講到輕描淡寫，「而且大嬸收錢㗎——呵呵，放心放心，會開個你畀得起嘅價。」

「再借問一聲，喺地球嘅話，有冇根治嘅方法？」

「目前嘅話，冇——想將失控嘅帕梅特，喺體內徹底排出，現階段，冇任何唔致命嘅方法。」

「……乜嘢係帕梅特？」

「吖，係啊係啊，火星你哋唔知——呢個就有排講喇，想大嬸自己教書嘅話，咁收好貴嘅喎。」

哇，果然係大老闆，分分鐘都係錢啊。

※※※

就咁樣，鐵華團多咗一艘船，四部用得嘅機動戰士，同埋幾十個新團員。

佢哋避過哂，域根嘅巡邏，一路平安無事，漸漸遠離火星。

※※※

P.D. 323，五月二十九號。

自從我哋打低班海盜，已經過咗一個月，一路上，冇事發生。

媽媽話，大概四個月就到，仲趕得及開學。

三日月最近越來越勁，同古荻利亞打得越來越耐喇——不過，嗰句「男人唔可以咁快」，到底係乜意思？

漁火上面，最近流行嘅話題，機庫撞鬼喇，主角仲係風靈。

半夜自己著機，有槍聲爆炸聲仲有女人聲，喺駕駛艙飄出來。

唔該，而家都四世紀喇，點解仲有人覺得，太空船會有幽靈？

宇宙女鬼，遙控人哋部機，或者用部高達，將舊隕石——

615Please respect copyright.ＰＥＮＡＮＡHuT8TeXTti

ns216.73.217.66da2

Reading Theme:

Font Size:

Line Spacing:

Paragraph Spacing:

Load the next issue automatically