機動戰士高達︰瑪斯子嗣　The Children of Mars - 第三十二集　蕩失路，肯定因為有人烏鴉嘴(一)

夕陽西下。

奧布某個軍用機場。

運輸機準備升空，蓋里奧企咗喺樓梯下面，佢唔係要上機，只係來送人。

「我會返斯堪地那維亞，」嘉達講︰「你呢，跟住又點樣？」

「監察局仲有任務，詳情——你知啦。」

嘉達笑咗，跟住望落佢隔離，問︰「咁你呢？非洲？」

伊奧克擰頭，講︰「我會返火星圈，必須有人聯絡阿麗安蘿德。」

原本，咁嘅通訊，唔係咁難——不過，而家喺宇宙上面，有關嘅通訊設施，全部遭人破壞，唔係審都知邊個做。

「艾利安卿返來嘅話，」佢講︰「嗰隻老屎忽，準備玩完嘅喇。」

由第二月球出現開始計起，起碼仲有幾個月，喺火星圈嘅部隊先可能返到來。

「講喺上來，」伊奧克問︰「麥基利斯呢？」

「呃……」

哎呀，親愛嘅伊奧克呀，好講唔講，你講呢個。

麥基利斯特別吩咐佢，有人問起，如實相告，一字不差。

「佢話喎——作為個有妻室嘅男人，引起誤會嘅人，只好——」

「痴撚線！邊撚個稀罕佢呀！」

激到嘉達爆粗口，都算係一種成就。

※※※

喺島嘅另一邊，見到海嘅地方，有個公園。

上次戰爭之後，呢度先變咗公園，種滿咗花。

而家，花冇喇，機動戰士嘅殘骸，責爛咗所有嘢，就除咗嗰一塊，寫滿名嘅石碑。

阿真來咗呢度，冇預料，呢度都會有人。

「呃——呢度好似，封咗。」

「係呀，不過你都入咗來。」

黑頭髮嘅男仔咁樣答，膊頭上面隻雀，同時嗶咗一聲。

的確，佢冇乜資格講人，入口嗰啲封條，佢都冇理——有部機瞓喺度啫，企起度都冇驚過啦。

佢行上去，去到石碑面前，擺低手上嘅花。

「老豆、阿媽、真夕——唔好意思，我——我呢家先返來……」

其實，算係返咗來一陣，不過到而家，佢先有自由行動嘅機會。

佢呀，呢次有份保護奧布，趕走咗班號角狗——應該有排都唔返來喇，班火星人，好似燒緊佢哋後欄。

你哋，有冇睇到？

冇人會答佢喇，呢個問題，除咗風，除咗海——

除咗隔離嗰個男仔。

「你都喺度？嗰場戰鬥？」

「……札多嘅，你呢？」

「我——姑且，算係奧布。」

「哦？M1定村雨？有冇見到自由？——聽講佢一個打一百個，自己就撐住成條戰線——」

「佢冇咁厲害。」

「……呃？」

「如果佢有咁厲害，嗰日死嘅人會更少。」

「喂喂，你啊，洗唔洗咁嚴呀——」

呢個時候，有把聲由後面傳來，聽到就唔開心嘅聲。

「真，點解你會喺度？」

「做乜我唔可以喺度呢？奧布佬？」

「你而家就喺奧布，出面個個都奧布佬，你自己都奧布出世——」

「唔係想點呀？嗌你亞斯蘭，你又話自己亞歷士，嗌你亞歷士，你又話亞斯蘭。」

真係好煩呀，仆街。

「咁聽落，係你唔啱囉，亞斯蘭。」

冇錯喇，連隔離個男仔都睇唔過眼——咦咦？

「喂，基拉——」

「請嗌我亞歷士．迪路，除此之外，乜都唔係。」

講嘅時候，仲要抬一抬副黑超，雖然塊臉根本冇黑超。

真係專業。

佢當然好好配合，有幾大聲，笑幾大聲。

「嘖——走喇，基拉！」

「好行唔送喇！」

「記得睇路返去，唔好蕩失路！」

男仔笑咗一下，同佢揮手道別，跟住走喇。

呢度又只剩返風，同埋浪。

天已經黑黑地，不過佢打算轉多個圈，費事同阿邊個一起走。

或者，係鄉愁發作，佢專登揀咗第條路，同來嘅時候唔一樣，跟住——

跟住，佢蕩失路喇。

肯定因為有人烏鴉嘴！

※※※

樹林，河邊。

火堆啪啪咁響，隔離，插住啱啱捉來嘅魚。

佢拿起發訊器，唉咗一聲。

唔得，因為搵唔到路，而用呢個，咁就太蠢喇，肯定畀露娜笑到臉黃。

不過而家，連月亮都升埋上去。

或者等到天光，佢會搵到路，不過而家就難喇，奧布上面，未開發嘅地區，一啲都唔細。

佢再諗兩諗，最後都係認命，扭斷發訊器，啟動佢。

好在野外求生嘅堂，佢叫有聽書，唔係今晚就食西北風喇。

就喺佢，拿起熟咗嘅魚，準備一啖咬落去嘅時候——

殺氣。

殺氣喺後面傳來。

佢擰轉頭望過去，就只見到，一對餓鬼投胎嘅眼。

236Please respect copyright.ＰＥＮＡＮＡ5kQNPksAiG

ns216.73.217.36da2

Reading Theme:

Font Size:

Line Spacing:

Paragraph Spacing:

Load the next issue automatically