機動戰士高達︰瑪斯子嗣　The Children of Mars - 第二十一集　我大概明喇，你哋就係山寨版嘅號角(二)

當監視衛星偵測到，法里度同埋亞茲拉路嘅艦隊，加上剩低嘅外軌隊艦隊，由月球基地出發，駛緊來L5嘅時候，呢場緊急會議，即刻就開喇。

查實，會議結果，一早決定好，面對咁嘅舉動，再白鴿嘅白鴿黨，都得返一種反應。

「相信事到如今，議長都冇嘢好講啦？」

「就請國防委員長記得，而家評議會，就只係授權札多，保衛本國領空——冇更多嘅動作。」

「我有分數。」

講完，哈里．賈甘納特，就行咗出去，一啲好臉色都唔畀佢。

睇住嗰個男人嘅背影，戴蘭達唉咗一聲——蠢人做蠢嘢，特別有效率，邊便都一樣。

※※※

「——帶埋我去。」

「吓？想去做乜？你個死老百姓。」

伊撒古啱啱先返到來，仲未安頓好某條友仔，就收到通知，要緊急動員喇。

「就借部渣古啫。」

「渣古啫——話借就借，你估係跑車呀？」

嗶——嗶——就喺呢個時候，通訊器響喇，拿出來一睇——

妖。

佢望住亞斯蘭，講︰「議長想搵你，而家。」

※※※

呢個時候，札多艦隊已經集合，準備阻攔接近領空嘅號角艦隊。

喺伏爾泰上面，尊路隊嘅隊員，隨時可以出擊——雖然佢哋隊長，仲未返到來。

「尊路隊長呢？」

「國家有任務畀佢喇。」

講完，迪亞加就忍唔住笑——呢個時候畀人嗌走，伊撒古肯定激死。

佢望向螢幕，號角距離防衛線，已經夠近喇。

「冇計喇，我話住事先——唔該阿嫂，陣間咪行咁前，整損咗嘅話，隊長大人會溶咗我㗎。」

志保．哈尼夫斯聽到，呆咗半秒，跟住即刻嬲咗。

「……迪亞加！」

※※※

「人喺度喇。」

「麻煩哂。你部機，我都嗌人運咗過來。」

「哼。」

睇住伊撒古黑哂臉咁走，戴蘭達笑喇——真係一啲臉都唔畀，就算議長都一樣，不過——

「大概係我抵死，你話係唔係呢？亞斯蘭。」

「唔係亞斯蘭，係——算啦，當我冇講。」

而家，佢哋喺阿普裡利烏斯，某個機庫入面。

眼前，就喺最後一部，第二世代新型機。有啲人，以為有三部，又有啲人，以為有四部，只有最少嘅人，知道有五部。

雖然冇咗三部機，不過都算有個機會，等佢分辨一下，而家到底邊個，追隨緊邊個。

「記唔記得我講過——而家，世界需要正義，無論上面嗰位，叫乜都好。」

「所以呢部，又叫嗰個名呀？」

「噢，呢部唔係，佢係而家，世界更加需要嘅——」

救世(Saviour)。

※※※

再早幾個月，佢哋對付嘅對手，就只係尋常運輸船嘅護衛，忽然之間，佢哋就參與咗，正正式式，軍隊之間嘅戰爭。

其實，都唔係好大分別。

亞斯頓舉起戰槌，一嘢車落來，打沉飛埋來嘅號角機體。

「其實號角，都冇乜巴閉啫。」喺通訊入面，迪魯馬咁樣講。

「專心一啲，」佢講，「唔好離架船咁遠，注意仲有幾多推進劑，咪等到冇哂先發現——就算係曼．羅迪，畀鐳射槍打中，都係會死㗎。」

「得喇，亞斯頓。」比特羅講︰「你越來越婆媽，你知唔知？」

「收聲。」

佢哋仲未落到地球，就咁死喺度，太悲哀喇。

「喂，你哋睇吓嗰便。」

聽到韋圖咁講，佢都望過去，螢幕上便，畫面即刻放大——喺星海另一便，遠離呢度嘅戰線，又一支部隊，幾十部機，全部孭住，巨大嘅飛彈發射器。

佢唔認得嗰個標誌，但係，肯定唔荒好嘢。

※※※

有啲標誌嘅意義，就算去到火星，意義都係冇變。

昭弘以前，讀過幾年書，一望佢就認得——嗰啲係，核子武器嘅標誌。

「……痴孖筋，地球人真係識玩。」

就算火星都市之間，打幾多嘅仗，都冇用過咁嘅嘢——起碼，係佢記得嘅仗。

「快啲，仙奴！」佢講︰「阻止嗰支部隊！」

佢即刻踩實油門，將推進器開到最大，只係嗰個距離，好似完全冇縮短過——呢部古尼捷，本來就唔係飛得快嘅機體，額外加咗推進器都一樣——雖然隔離幾部渣古，一樣追唔到上去。

太遠喇，對邊個而言，都係一樣。

最前面嗰部偉達，已經將飛彈射咗出去——佢萬萬估唔到，自己會親眼見證，另一場血色情人節嘅發生。

就喺呢個時候，佢見到喇——

「……流星？」

「你嗌我呀？」

死開，仙奴，梗係唔係嗌你。

一粒流星，由殖民衛星飛咗出來，快到佢嘅監視器，根本追唔到嗰個動作，高速掠過同時，射咗出去嘅飛彈，就喺半路上爆炸——

唔係，係畀人打咗落來。

鐳射、導彈，多得覆蓋成個星空。跟住嘅光芒，強得將嗰宇宙，照到日頭一樣。

等到啲光散開，幾十部號角機體，已經灰飛煙滅，而佢終於睇到喇，流星嘅真面目——比戰艦細好多，但比起機動戰士，又大得多嘅宇宙戰機，喺最前面，原本應該係機頭嘅位置，擺住一部高達——紅色嘅高達。

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically