機動戰士高達︰瑪斯子嗣　The Children of Mars - 第十六集　上來，跟住，死喺呢度(一)

而家，喺尤尼烏斯七號上面，已經戰喺上來。

「唏唏——咁多位𡃁仔𡃁妹，我哋只係試吓佢哋嘅底，唔好搏命住啊。」

喺佢嘅渣古上面，迪亞加．艾士文一邊講，一邊開炮，將衝上來嘅域根機體，打成宇宙塵埃。

成舊隕石跌緊落去，準備世界末日嘅喇，不過，來得及炸咗佢嘅話，咁就乜事都冇。

只係，有個小小嘅問題——對面班域根仔，大概係佢哋嘅五六七八倍，打極都有。

上面話有援軍喎，佢唔知乜援軍喇，某架粉紅色嘅船？

「頂佢個肺，班友幾時先到！」

伊撒古．尊路，佢哋嘅隊長大人，如果連佢都催増援，咁你就知道，而家大鑊喇。

打到呢度，好似嫌佢哋未夠大鑊咁，啲域根仔褪開咗，畀兩部機飛出來，紅色同粉紅色。

佢即刻掹雞。

不過掹雞之前，對面已經避緊。

「……未開槍就閃子彈，噢，屌。」

「極能者——佢哋來真喇。」

伊撒古講完，就拿住斧頭，衝上去。

※※※

伊撒古認得其中一個，機唔同喇，不過顏色冇換。

佢開著以前用過嘅頻道。

「拿拉。」

「尊路。」

「你哋公主呢？死咗去邊，叫埋佢出來！」

「……無可奉告。」

鐳射從四周打來，某種嘅龍騎兵。

避開同時，佢舉起戰斧，劈落插過來嘅長矛。

另一部紅色機。

「你又邊位？」

「謝哈特．加列圖——叫你嘅人退下，札多。念在一場盟友，伊謝魯根特大人唔希望，你哋枉送性命。」

「講乜嘢笑？你自己用吓個腦，而家將呢舊嘢掟去邊？」

※※※

地球。

謝哈特好清楚，呢次嘅作戰目的，一舉摧毀地球居民嘅反抗力量，然後鎮壓剩低嘅敵人。

如果仲有剩低嘅話。

呢種作戰，同佢哋回到伊甸嘅理想，徹底背道而馳。

不過，呢個係伊謝魯根特大人嘅意旨。

或者，佢眼前嘅對手，就係原因。佢見到每一步，但對方靠住極快嘅反射神經，跟上佢嘅動作。

新人類，冇耐之前——唔係，二十幾年之前，喺諾多拉姆，佢就同號角嘅新人類部隊交過手——高手，但遠不如，佢而家眼前嘅人。

嗰陣時，新人類只係號角當中，為數極少嘅部隊。而家，佢哋多到組成一個國家，人口大概係域根嘅一半。

成千上萬嘅新人類，喺阿麗安蘿德服役，包圍住火星圈，包圍住佢哋，足以同佢並肩嘅強者，多不勝數。

域根冇下次機會喇。

只可以贏，或者，就此滅亡。

※※※

迪亞加都衝上去喇。

埋身肉搏，唔係聰明嘅做法，不過咁樣夾擊，恐怕連伊撒古都頂唔住。

「喂喂，」佢問︰「生得咁好睇嘅女仔，你邊度識㗎？竟然冇同我講過？」

「你走咗去奧布之後——雕你老尾，而家咁款，仲講呢啲嘅嘢？」

哎呀哎呀，唔怪得，而家佢有少少後悔喇。

嗰部粉紅色，控制住龍騎兵，鐳射係咁打埋來，唔係佢反應快，手上支炮已經爆咗。

「哇哇，小姐，落手真係狼死——收工有冇興趣飲返杯？定係紅色嗰隻，就係你男朋友？」

粉紅色冇答佢，直接一劍劈埋來。

唉啊，脾氣好差。

佢踩油門，向後噴射，避過左右飛來嘅鐳射，再還返一炮過去。

而家，佢真係想見到，某架粉紅色嘅船——咁拖落去，就算打得入去，都來唔及炸隕石——最好加埋部藍色有翼嘅。

偏偏，粉紅色冇，藍色都冇，來咗一堆黑色嘅，由域根仔嗰便飛出來——札多嘅機動戰士。

※※※

一見到，伊撒古都認得出喇。

捷武，ZGMF-1017M2，高機動二型，黑紫塗裝。

向緊佢嘅人開火——弊喇，雖然機體有差距，不過駕駛員嘅差距，明顯更加——

「對住我，你仲可以分心？」

紅色機。

佢慢咗一拍，左邊膊頭，已經畀人隊穿咗。

就喺呢個時候，光柱從天而降，藍白帶紅，呢個係——

※※※

「船頭打斜十五度，啟動唐懷瑟，目標，敵方機動戰士集團。」

螢幕上面，毫無疑問，係札多嘅機體，應該報廢咗嘅舊型機。

瞄準程序完成。

泰莉亞．格拉迪斯舉起手，嗌︰「發射！」

藍白色嘅光芒，點著螢幕，燒熔幾部黑色嘅機體，將更多嘅迫到褪後。

234Please respect copyright.ＰＥＮＡＮＡuD5gB7Ib34

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically