機動戰士高達︰瑪斯子嗣　The Children of Mars - 第十四集　你當自己自由啊？(三)

佢哋落咗機。

去到呢度，卡嘉蓮終於見到，本來要見嘅人。

基巴杜．戴蘭達，最高評議會議長。

「真係估唔到，我哋會喺咁嘅場合見面，阿斯巴代表。」

「議長係估唔到，有人打新型機嘅主意？」佢問︰「定係估唔到，我會有命過來呢？」

「呵呵，說出來都唔好意思，我呢個做議長嘅，都係目標之一——有人可以幫我做證。」

呢個時候，人群入面，有份女士揮咗吓手——大概就係蘇萊塔嘅媽媽，戴住幾可疑嘅頭盔。

「上次戰爭以後，」佢講︰「奧布有唔少國民，逃離到貴國，我本來係為咗呢件事而來——見到呢架船以後，我諗，講乜都遲咗少少喇。」

沙羅家，為咗札多佔用奧布技術嘅事，日吵夜吵，咁佢只好有啲動作，希望佢哋收吓聲。

又點估到，佢哋會咁客氣，想佢直接——從此收聲。

「的確，有唔少曾經屬於奧布嘅技術人員，選擇喺P.L.A.N.T.定居，當中又有一啲人，掌握住一啲，比較敏感嘅技術——」

講到呢度，議長兩手一攤。

「不過點都好，唔可以因為佢哋住過喺奧布，就限制佢哋就業權利啩？同奧布唔同，我哋係民主國家，有選票要顧嘅。」

的確，佢就唔洗理選票喇。奧布議會掛名嘅啫，真正嘅權力，喺大家族手上面——問題係，佢爸爸，同埋而家嘅佢，拿住太多權力——起碼，有幾個家族，覺得佢哋太多。

「真係老實啊，議長。」

「我不嬲以誠待人。」

「咁不如就請議長，再以誠待人一次——咁多嘅力量，你打算點樣用？」

「咁當然係，世界和平。」

「我就希望你呢句，都係以誠待人。」

「當然，如果呢句係假嘅話——」

議長挨埋來，喺佢耳邊講︰「而家喺奧布嗰位，梗係唔會放過我啦，唔係乜？」

「你——」

「呢個時候，唔可以露出馬腳啊，公主殿下。」

佢終於知道喇，點解呢個男人，有陣熟悉嘅味。

係臭狐狸嘅味啊。

※※※

古荻利亞，同埋三日月，都來到呢架船——普洛斯佩拉嗌佢哋來。

「喂喂，」佢問︰「咁樣抌低團長，冇事乜？」

漁火卡咗喺港口，可能再過幾日先出到來。

「應該冇事，」三日月答︰「你仇家比較多。」

「呵呵，真係唔該你提醒我——好喇，普洛斯佩拉，今鋪又有乜好帶挈？」

真係好帶挈，嗰個老太婆。

一落機，就有幾十支槍，隊住佢哋。

三日月都擝咗槍出來。

「古荻利亞殿下。」

有個長毛行咗出來，佢應該見過，大概三年前，都係喺——

「……戴蘭達博士？」

「而家嘅話，可以嗌我，戴蘭達議長。」

「三日月，收埋支玩具。」

佢伸手，㩒低三日月支槍。

神棍感應冇發作，唯一嘅危險，就係有人走火，累佢哋畀人亂槍掃射。

「唏，議長——唔好意思，火星新聞不嬲遲到——你唔洗咁友善㗎喎？」

「我必須知道，域根而家嘅立場。」

「咁恐怕我答你唔到喇。長話短說，我走佬喇，大致上就好似——」

佢伸手，指向人群入面，頭髮有啲長嗰位。

「嗰邊嗰位沙律差唔多。」

「……唔係沙律，係察拉！」

佢都幾肯定，議長嘴角上揚，功力果然深厚，幅度同三日月差唔多。

「殿下誤會喇，嗰一位，只係阿斯巴代表嘅保鑣，叫做，亞歷士．迪路。」

「咁我可唔可以話，自己只係芙拉姆．拿拉，一個普普通通嘅傭兵。」

「既然只係普普通通嘅傭兵，咁似乎係我哋失禮喇——泰莉亞，麻煩你。」

議長隔離，白色衫嘅女人舉起手，跟住所有嘅槍，都收返埋去喇。

「請跟我來，拿拉小姐。呢艘船會送阿斯巴代表回國，抵達之前，可能有一、兩件事，用得著兩位。」

「先此聲明啊，錢太少嘅唔做，風險太高嘅，都——」

喺呢個時候，佢嘅戰達斯，竟然響喇。

呢個音效，係加密通訊，以前八大法師用嘅頻道。

佢跳上去，爬入駕駛艙，打開訊息。

然後，呆住咗喇。

肯定係呆得太耐，三日月都跟住跳上來。

「喂，長毛仲等緊你。」

佢點頭。

雖然呢個消息有夠荒唐，不過再荒唐都要面對，話唔定有人整蠱佢啫。

雖然，冇人會用呢種事來整蠱，而且知道佢哋以前嘅加密頻道。

佢跳返落去，喺議長面前。

「……唔好意思，有個消息，請你即刻派人核實。」

「睇來唔係好事。」

「係，我都希望，佢係假嘅，不過——」

佢深呼吸一下，讀出自己睇到嘅訊息。

「域根喺地球，移動緊尤尼烏斯七號嘅軌道。」

呢個瞬間，就連嗰個議長，都成塊面青咗。

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically