我鍾意同妳鬥氣，其實只係因為… （連載中） - 一百二十

一百二十

響八月尾球季開鑼之前，流〇正式同我簽署咗份職業球員合約，我正式成為職業球員，亦都意味住我正正式式告別咗學生呢個身份。

我既中學生涯，充滿住葉佩儀既身影。而我響佢既心目中，又係咪咁重要呢？

新學期開始之前，葉佩儀佢哋三個女仔去咗台灣，而洪偉賢同孫興泰兩個就去咗九寨溝，佢哋有問我一唔一齊去既，但我唔想上大陸，又想響球會積極備戰新球季，所以就留返響香港。

響新一個學期開始之前幾日，香港球季開鑼，葉佩儀有send個訊息同我打氣，可惜第一場我係冇份出場，連後備名單都入唔到，只能夠響觀眾席睇住球會輸波而回。

而幾日之後，我哋既角色就調返轉，係我send返個訊息同佢講開學一切順利。不過，以葉佩儀讀書既資質同埋一向都咁受老師愛護，一定係可以一切順利既。

九月一號之後，唔駛一早起身同人逼返學，我好似非常之唔慣。

…

其實，我知自己係唔慣乜嘢既。

就係…

我以後都冇得返學、冇得日日都見到葉佩儀。

嚴格黎講，我同佢既關係其實冇乜嘢太大既變化，但我就係有種感覺，好似自己失去咗葉佩儀咁，覺得好悵然若失…

原本九月一號，佢哋趁住開學放早，即使大家已經唔同學校而我又已經冇讀書，都約返六人行一齊出黎，晏晝去唱K食嘢當聚下，但係果日撞正球會下午有操練，結果我冇辦法出席今次既聚會，只能夠同佢哋講，叫佢哋玩得開心啲。

我曾經以為即使佢哋要返學、我要練波比賽都好，要見面都唔係乜嘢難事，估唔到我錯過呢一次機會之後，過咗成兩個星期，我都冇機會再約佢哋出黎玩。

中六學生似乎都好忙，葉佩儀做咗辯論隊既隊長、社會服務團既主席，公務非常繁忙，其實我都有疑問點解佢要做咁多學生幹事類型既嘢，佢就答我可以響申請大學既時候會有分加架喎。

真係...好屎儈，哈哈。

另外，開學只係一、兩個星期，佢已經同我講話啲課程極為深澳，即使係佢，都要花上更多時間去溫習，甚至考慮會出去補習。基於以上兩樣嘢，葉佩儀莫講話出黎玩，甚至乎我同佢之間短訊既聯繫都明顯越黎越少…

而我呢？咁啱呢兩個星期日都要比賽，星期六要練波作最後準備同檢閱，一樣都係冇乜時間...

本來響佢知道咗我暗戀譚梓淇之後，我哋之間已經有種微妙既距離感，但係而家我哋兩個更加係好明顯疏遠咗唔少。

而我響失去咗同葉佩儀日日見面既機會之後，先發覺得到，原來佢響我心目中，真係極為重要…

因為少咗傾電話，連互傳短訊都少咗，所以響兩個星期之後既某一日返學日，呢一日得上晝有波練，下晝操完gym就走得，啱啱趕得切葉佩儀佢哋放學，於是就衝過去學校附近，諗住等佢放學。

我冇預先通知葉佩儀，諗住比個驚喜佢吖嘛！不過，我計漏咗一樣嘢，就係而家佢哋啱啱開學，譚梓淇身為黃社社長已經全情投入咗水運會啦啦隊既訓練，雖然葉佩儀就唔係黃社既幹事，不過佢就因為想陪住仲未走出情傷既譚梓淇，一有時間就會走去幫譚梓淇一齊訓練啦啦隊。其實呢一點葉佩儀之前有向我提過下，不過我響出發之前完全醒唔起咁解。

我本來企響學校門口度等佢哋，等完又等、等完又等，等等下先醒返起有件咁既事，本來諗住比個驚喜佢哋，最後搞到自己呆等咗成粒鐘。

不過既然都黎咗，又等咗咁耐，冇理由就咁走咗去架嘛，只係對腳練完波、操完Gym有啲攰，最後索性走入學校，接待處霞姨姨認得我，以為我返黎探老師，連登記都唔駛就比我入去，坐響有蓋操場度等。

而我都真係交遊廣闊，好多人路過都有同我打招呼傾下計，不過就係見唔到葉佩儀佢哋，連余正熙都見唔到。等下等下，真係等到我中眼瞓…不過皇天不負有心人，我終於聽到一把熟悉既聲音…係葉佩儀…

等咗咁耐，終於都等到妳喇…

（待續）

ns216.73.216.174da2