是咁的，廿一歲有咗，所以我要做有錢人 - 臨盆

原來轉售嗰班人，就係向爛仔班出手將我嘅片賣畀佢哋。噉啲片流入啲唔三唔四嘅爛仔手，結果會搞成噉就好理所當然。

我唔敢睇啲留言，但一諗到成千上萬嘅人會睇到我，仲拎我做性幻想對象，我就覺得好噁心。

我心跳加速跳到胸口痛，我承受唔住依種打擊。我明明咩都無做，我嘅衣著又無露肉，點解都可以成為被人放上網嘅目標？靚嘅就被人意淫，醜嘅就被人笑。著得露又話淫，著得密實又話肯定內𥚃噢貧，其實係咪女人就係原罪呀？

同時，手機震動，來電顯示寫住「黑龍哥」。

心口嘅劇痛連帶刺激到我個肚痛，我發現張床濕咗，揭開被一睇，原來穿咗羊水！

「媽⋯⋯媽咪！！！」我即刻丟開手機大叫救命，已經準備好晒嘅媽咪好彩仲未瞓，衝入房見到我㩒住個肚流晒汗，即刻幫我報警叫白車。

「你唔使驚呀女，無事架！深呼吸！」

「嘎⋯⋯呼⋯⋯嘎⋯⋯呼！」

我每一吓深呼吸，我個肚又痛，心口又痛，好似有人用手抓住我心臟噉：「唔得呀媽咪！要⋯⋯要死喇！會死呀！我唔得呀！我唔生呀！我生唔到呀！」

「生到！生到架！捉實媽咪隻手！」

我捉實媽咪隻手，用力到好似青筋都會爆噉，指甲深入佢手背。

「忍一陣，忍一陣就會好啲架喇，好似搞肚痛屙屎噉，忍咗佢就會停一陣！」

同媽咪講嘅一樣，我用盡全力忍住，無幾耐我大大力呼咗口氣：「停⋯⋯停咗，無噉痛喇！」我開心到癲咗。

「係噉架，唔係咩叫陣痛啫？半個鐘左右佢又嚟架喇。」

我當堂眼都突埋：「又⋯⋯又嚟？我要捱幾耐呀？」

「十個鐘。」

我發誓，如果嗰刻床邊有刀我一定已經𢲡起就捅落個肚度，絕對無誇張。

「我⋯⋯我唔生喇⋯⋯嗚⋯⋯媽咪⋯⋯我好辛苦呀⋯⋯點解我要為阿軒噉痛呀⋯⋯依個都唔係愛情結晶！我有咗佢之後就辛苦到依家！為咩呀！為咩呀！！？？」

之前講過嗰啲咩揀咗就唔好後悔嘅大道理，喺撕開個子宮噉嘅陣痛面前全部一掃而空，我將一路以嚟忍住同極力抑壓嘅後悔噴晒出嚟。

媽咪見到我個樣即刻標眼淚，佢當年實係同我一樣。

「深呼吸！深呼吸！」佢完全無理我所有抱怨，只係叫我調整好呼吸。

「我好後悔呀媽咪！點解我唔落咗佢！點解我要生？點解我要痛？點解阿軒唔喺度呀？」

「深呼吸！跟媽咪做！一吸⋯⋯哈⋯⋯一呼⋯⋯嘎⋯⋯」

陣痛根本無隔半個鐘，好快又嚟，我痛到講唔到嘢，只好跟媽咪指示深呼吸。

救護員客觀上係十分鐘左右就到，但我好似等咗十年噉。個肚唔痛嗰陣還好，其實都唔可以叫唔痛，只係無痛得噉勁，一到嚟料嗰陣我幾乎有子宮被撐爆嘅錯覺。但佢又爆唔到，好似有個牛皮汽球一直喺體內被吹脹，不停脹縮脹縮噉樣。

唔痛嗰陣腦入面得兩個字：「想死想死想死想死想死想死！」到痛嗰陣連想死嘅諗法都痛到消失，得返一片空白。

救護員抬咗我上白車，媽咪一路跟到實。我陣痛嘅間隔時間亦愈嚟愈短。我嘅記憶開始錯亂，腦入面閃過好多畫面，一痛又咩都睇唔到。

依個地獄到底幾時會完？我係咪真係會死？點解每秒鐘都可以噉痛噉辛苦？每個細胞都好似化成一個「痛」字喺我體內嘅血管游走，仲有一堆湧咗去子宮亂爬。

「啊！！！！！！」

下世投胎我要做男人！我唔要做女人！我唔要生仔！

「頂住呀女！」

大家可以放心，如果跳晒過程淨係講結果，係母子平安嘅。係呀，仔嚟架，我同佢都無事，無難產。

但成功生完，之後先係個天對我真正嘅考驗。好似個天見我講唔後悔講得噉口響，就特登逼我面對最真實嘅自己噉。

估唔到我最難面對嘅難題，解決唔到嘅問題，原來係我自己個仔。

ns216.73.216.13da2