是咁的，廿一歲有咗，所以我要做有錢人 - 你唔好郁

下半場我都好認真噉睇戲，阿軒亦無對我發動攻勢。

真正嘅突襲，係完場之後嘅事。阿軒問我隻手凍唔凍，大家都知十間戲院有九間都會坐坐吓變雪房架啦，所以出嚟無耐我就下意識答咗凍。

然後，阿軒就捉住我對手：「咁有無暖啲呀？」

心跳加速之下我好快面紅，熱血一流到手心就暖晒，再加埋阿軒粗糙嘅手心傳嚟嘅熱力，本來冰冷嘅手指轉眼間就溶晒雪。

我哋對望，陷入沉默之中。

無耐，我先開口：「暖啲喇。」

「噉就行啦，食嘢喇。」阿軒繼續拖住我行。

「我隻手唔凍喇喎。」

「噉唔一定要凍先拖嘅。」

「噉點解仲拖住呀？乘機呀？」

「一來啦。二來係你無反抗呀。」

聽完，我嘅返叛心理又發作，想揈開佢隻手，但今次佢用少少力捉實我，力度恰到好處，唔會整痛我。

「唉，反抗唔到，唯有畀你拖住先啦。」

「噉就乖。」

或者當你鍾意一個人嗰陣，就係佢講咩都能夠撥動你心弦。又或者係阿軒嘅說話令我諗起公公讚我，所以將對公公嘅好感投射咗喺佢身上。點都好，嗰一刻我已經好肯定自己對阿軒有好濃烈嘅感覺。

食完飯，阿軒送我返屋企樓下。

「咁我走喇。」我屋企喺入大廈前，要先上一個平台。對毫無興趣嘅男仔我唔會畀佢哋接近我屋企附近，跟蹤狂太恐怖喇。有啲好感嘅我會等佢哋送到未上平台前嘅升降機。

至於真係幾鍾意嘅，就畀佢送我到平台，喺我棟樓樓下先分開。

阿軒望住我，突然好認真：「你唔好郁。」

我當堂被佢嚇一嚇：「做咩？」

「你頭髮有啲嘢，咪郁，等我搞。」

阿軒撥弄我嘅頭髮，將我嘅髮絲勾喺耳仔，之後就哄咗埋嚟。817Please respect copyright.ＰＥＮＡＮＡ2J6pMwNg4v

ns216.73.216.141da2