到下一次我再去，醫生嘅報告話我唔係有女人病，但好大機會係生化妊娠。
「簡單講就係你之前真係有咗，但流產，所以用驗孕棒嗰陣係陽性，後來嚟驗係陰性。」
由嗰陣開始，我心底就一直有種自我厭惡嘅感覺。因為第一下嘅感覺我呃唔到自己。
太好喇。
唔理係流產定咩都好，最緊要係我個胎已經無咗。我嘅放鬆同之前嚟檢查聽到假陽性係一樣。但明明係有過而無咗，唔係純粹驗錯，點解我可以咁無人性，少少可惜嘅感覺都無？
「你嘅子宮壁比一般人薄，所以你成功懷孕又陀得住個胎嘅機會牽係低啲。不過依家嘅情況⋯⋯你都算執返身彩嘅。」
醫生將報告交畀我：「如果你日後陀得住個胎，真係要好好珍惜呀，知嗎？」
我點點頭，有啲自慚形穢，我無唔開心，但知道自己無唔開心，就好糾結。
「墮胎好傷身你知架啦？一般女仔平均都會有兩至三次墮胎嘅機會，視乎唔同體質啦，但一定次數之後子宮壁會變薄，會影響日後相生嘅時候未必生到。」
醫生指一指報告上啲我睇唔明嘅句子：「你嘅體質，應該話子宮嘅狀態比一般人差，所以你可能做一次墮胎手術，就頂唔順。你⋯⋯明我講咩嗎？」
隨住我點頭，眼淚亦落下。
亦因為依個原因，我知道自己唔可以好似普通女仔咁亂嚟。
喺正常狀態下尚且陀唔穩，更莫講落咗一次仔之後仲會唔會有機會成功懷孕。
曾經有個名人阿寶講過：「人類總是要犯同樣的錯誤。」開頭我都唔信，直到我讀大學期間又再次被男朋友搞大個肚，我就知依個係我今世人絕對避唔過嘅一劫。
ns216.73.216.13da2
and then Add to home screen.