是咁的，廿一歲有咗，所以我要做有錢人 - 分享金錢嘅時候

蝕錢嘅日子唔係過咗好耐，第三個星期開始我就轉虧為盈。

由於我最盡只可以帶到十個包返學，所以價格亦慢慢因求過於供而上漲。

我每星期只做兩日，價格返到去本來嘅七蚊都日日賣清。

兩日來回車費係十四蚊，二十個包成本價五十，而收入有一百四十蚊，每星期淨利潤係七十六蚊。

直到聖誕假期前，我靠賣包收入賺到六百幾蚊，請咗媽咪去食火雞大餐。

我咁大個女其實都未食過火雞，但細個睇完麥兜就一直好想試下。

可惜我地屋企無錢，而且火雞太大隻，我地兩個食可能真係食到端午節。

不過賺到錢，當然係要好好報答返媽咪，如果佢當日選擇唔生我出嚟，我就連「想試下食火雞」嘅願望都唔會有。

無生命，談何願望。

媽咪好奇我啲錢點嚟，我話靠喺學校做生意，無偷呃拐騙，佢讚我叻女。

到聖誕節，我終於食到恨咗好耐嘅火雞大餐，火雞好勉強咁塞咗入焗爐度，上升嘅白煙同奇異嘅燶味撥動星星，個焗爐戚戚測測、戚戚測測咁，好似天使預早送嚟嘅福音。

哇，好靚嘅夜晚呀。

我同媽咪學足麥兜入面嘅描述，坐喺尖東海旁，點點嘅燈光喺海面上走嚟走去，又靚、又溫柔。

真係好靚。

我從未食過咁濃味嘅野，連燒鴨連杯麵都無咁濃烈嘅味道，火雞嘅味道係我嘅每一個味蕾上面纏住、爆發、纏住、爆發。

就好似今晚嘅嘢咁，最靚，最靚，最犀利，亦都係最溫柔。

望住媽咪食火雞嘅樣，我感覺到金錢嘅力量。

常言道金錢係萬惡，或者係真嘅，但當我哋分享金錢嘅時候，佢就會為我哋帶嚟幸福。

我更加確信，要好好賺錢，為身邊重要嘅人帶嚟幸福。

ns216.73.216.13da2