是咁的，廿一歲有咗，所以我要做有錢人 - 信用

以當年嘅巿價，大概係五至八蚊左右就可以喺任何起級巿場買到，平均價當係六個半啦。

「噉依家佢賣幾多錢？」

下一次叫價係一千四百蚊以上。

「哦！公公你想話我買貴咗好多！」我自作聰明噉話，但公公搖頭。

「我想話由一開始就係買錯野。」

佢叫我打開個罐頭，我先發現原來啲沙甸魚已經發臭，根本唔食得，連巿價六個半都唔值。

依個遊戲有好多教訓，其實原本係一個股巿流傳嘅故事。

有兩個交易員輪流喺對方手中以更高嘅價格買入沙甸魚罐頭，直到有個交易員好奇點解個罐頭噉值錢打開嚟睇，先發現個罐頭其實一蚊都唔值。

但另一位交易員鬧佢：「邊個叫你開？個罐頭只係用嚟炒賣架咋。」

我細個未接觸股票，所以大個係靠自己諗返個故事提醒自己，不過公公就以另一個角度教我其他營商原則。

「你要記住，作為商人我地唔可以賣無價值嘅野畀人，作為投資者我地亦唔應該買無價值嘅物件。」

我好奇：「就算我賣無價值嘅嘢，客人知道無價值都唔會買架喎。」

「錯，依個世界上有包裝同宣傳，可以誇大產嘅價值。仲有欺詐，賣假野等等都係一樣，但作為生意人，我地嘅貨幣係信用，一旦失去信用，我地亦失去做生意嘅資格。」

「但明明有好多人賣假貨都賺到盆滿砵滿架喎。」

「做生意係睇邊個笑到最後。」

細個唔明，大個先開始明少少。曾經有段時間覺得惡人無惡報，所以有懷疑過公公嘅教導，但原來所有惡行會慢慢累積，一個唔覺意爆起上嚟就好金。

ns216.73.216.66da2