是咁的，廿一歲有咗，所以我要做有錢人 - 尾聲︰一個流落地球嘅外星人終於搵到同伴

我匆匆忙忙趕到學校，個心七上八落，勁擔心梓木唔知咩事搞到要見家長噉大鑊。我喺校門做簡單登記之後衝上見面室，開門就見到九歲嘅梓木扁住嘴，耷低頭好可憐噉嘅樣。

我跑過去檢查佢塊面同手臂︰「有無事呀？你係咪同人打交呀？定被人打呀？」我最驚就係梓木被人蝦，第一樣就係確定佢有無受傷。外人淨係睇我依個噉緊張嘅樣，應該點都估唔到我曾經好討厭梓木。話時話，不知不覺間梓木嘅五官已經褪去阿軒嘅影子，可能跟得我同媽咪多，依家去到邊度啲人都會話我哋兩母子成個餅印噉，當年嘅我一定點都估唔到結局係噉。

「白小姐你冷靜啲先，梓木無被人打。」

「嚇得我，噉都好啲。」我對手掂住梓木面頰，感覺到佢嘅抖震，係咩事令到佢噉驚？

「唔使驚，媽咪喺度呀。老師，佢咩事呀？」

老師一面無奈，跟住拎咗一大個袋出嚟，入面全部都係硬幣。

「梓木喺學校賣糖、賣Wi-Fi、仲收同學錢派息畀人。依啲係佢喺同學度賺賺埋埋嘅錢。」

我呆咗一秒，嗰度粗略計都可能千幾蚊。老師一路同我交代，原來梓木有另一袋錢被人偷咗，派唔到息畀同學，所以先被踢爆。老師話唔想學校變成充滿銅臭嘅地方，希望我好好管教下梓木，要佢以後唔好再喺學校做依啲買賣。

梓木一路都無出聲，我就一直同老師道歉，保證會好好教梓木。我哋兩個離開學校，上車，得返兩母子獨處嘅時候，佢終於好內疚噉問︰「媽咪……我係咪真係好錯……」

「你點賣糖？」

「……我買咗一大包糖返嚟，一包二十蚊，入面有三十幾粒，我拆開每粒賣兩蚊，就賺到四十幾……」

「你點賣Wi-Fi？」

「有啲同學上網慢，噉我用嗰個快，又無限數據，就小息嗰十五分鐘賣廿蚊放出去畀佢哋用……」

「派息呢？」

「……我收同學十蚊，一個月之後畀返十二蚊佢哋。噉我有嚿錢喺手，就再去買其他嘢賺錢……」

我呼咗口氣，真係唔知好嬲定好笑，到底邊個教佢架呢？

我摸摸梓木個頭︰「諗得出已經叻仔，但係媽咪嚟緊有好多嘢要教你。」

「你……唔鬧我？」

「媽咪以前都係噉。」我將食指放喺唇邊︰「噓，我同你嘅秘密。」

梓木個樣再次展現光芒，好似一個流落地球嘅外星人終於搵到同伴一樣︰「媽咪都係噉？」

「係呀，都係闖咗禍。好彩得你太公教我點樣正正經經做生意，媽咪先有今日，你想唔想學丫？」

梓木急不及待點頭︰「想！」

我欣慰一笑，知道將會同我個仔分享好多故事，一堆有關我嘅故事，亦希望從中可以導佢向善，做一個正當嘅創業家，為社會解決問題、創造價值，而唔會淪為壓榨其他人嘅吸血鬼。

「唔……噉就要由媽咪細個賣消毒洗手液開始講起……」

我曾經諗過，如果有一日可以同人分享的話，個故事應該叫咩名。

好慶幸，我個仔白梓木係我第一個聽眾。

個故事叫《是噉的，廿一歲有咗，所以我要做有錢人》。

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically