是咁的，玩匿名交友app撞返個ex - 【番外篇】芯玥64：確定清除所有對話？

「你係咪覺得講返依幾個月嘅事就有機會？」

「我只係覺得難得咁夾，段關係就咁完。好浪費。」仲有留戀嘅人先會覺得浪費，但我覺得重新一直更加浪費，只會令我地都浪費更多時間喺對方身上。

「你覺得我哋真係夾咩？」

「唔係咩？我哋連晚餐買嘅嘢食都一樣。我哋鍾意嘅樂隊，鍾意嘅歌都⋯⋯」

何金耀仲未講完我地有幾多野夾，我就打開咗皇后燒賣嘅兜蓋，入面係炸白魚蛋，仲有咖哩五寶。

何金耀啞口無言，佢同我買嘅野食好明顯唔一樣，其實我地之間唔係佢諗得咁夾。

「你⋯⋯之前聽Everglow係邊個版本？」

「現場版。」

「點解你會無啦啦鍾意聽月球下人？」

「因為周國賢翻唱。」

我唔知點解佢突然間問依兩個問題，但我知道依兩首歌都有兩個版本，佢可能想確認一下同我係咪聽同一個版本，而從佢嘅表情推測，我地雖然都鍾意聽同一首歌，但一直都聽緊唔同版本。同皇后燒賣一樣，我地係買同一間鋪頭，不過叫嘅野亦唔一樣。

未打開個兜蓋之前，從表面睇我地好似好夾，一打開蓋就知大家內裡其實唔夾。不過我其實比佢更早知道，大家叫嘅野食唔一樣，因係佢有兜碗仔翅而我無，唔知係乜野蒙敝佢雙眼，令佢覺得我地買嘅野係一樣，要直到我打開兜蓋先真係承認依個事實。

明明一路上已經好多紅旗，但佢都係要炒車先知條路危險。係佢睇唔到丫，定係睇到扮睇唔到呢？

何金耀深深呼咗口氣，望住海浪發呆。

我地之間只有海浪聲，同埋令我坐立不安嘅尷尬。我要講嘅說話已經講哂，唔知完唔完成到令佢死心依個目標，但我知自己係時候要離開。

「失眠同將每日諗到最壞嘅方法好有用，多謝你同我分享。」我唔可以否認同城繩傾偈嘅日子開解咗我好多，但我唔會愛上我嘅社工，唔會愛上醫好我感冒嘅醫生。

我感受到何金耀嘅心應該死得七七八八，而我亦應該為佢提供一個新方法畀我面對失眠多個謝，但僅此而已，係作為普通人應有嘅禮貌同道謝。

「咁就好。」

我推一推佢兜嘢食埋佢度：「你想嘅，可以食埋佢。」我調校一吓口罩，企起身：「我走先喇。」

何金耀好似突然通返電嘅機械人咁企起身：「走之前⋯⋯可唔可以被我攬一下？」

我真係唔想再有任何舉動令佢有丁點誤會，只能夠殘忍咁將佢心中未死透嘅心僅餘果一兩成都摧毀。

我搖搖頭：「唔可以。」

何金耀無奈一笑，開始收拾凳上無郁過嘅嘢食。

「拜拜。」

「嗯⋯⋯拜拜。」

互相揮手，我轉身離開，一路行我就一路同自己講唔好擰返轉頭，總係覺得一轉頭就會見到何金耀唔甘心咁回頭望住我，咁又唔知會引發佢亂諗乜野。今次真係要完喇，所有野都要完結，之後亦唔會再見，我都希望佢可以向前行，唔好再糾結喺我鄧芯玥身上。

我行向黃埔天地，拎出手機搵思雯︰「過緊嚟。」

思雯亦秒回我，證明佢真係隨時候命︰「太醜樣？」

「何金耀嚟。」

「下？你個ex？真咩？」

「真，估唔到玩交友app會撞返個ex。」

「拿拿林畀六個冧巴我先講，今期頭獎有八千萬。」

我求其畀咗六個號碼思雯買六合彩，我自己又買咗一注，當然依兩注最後都係奇蹟一樣一個都無中過。

嗰晚好凍，一路行去黃埔花園，狂風就大大力打喺我塊面上，我記起仲有啲手尾要執，斬草要除根，就打開tg，將城繩嘅chat room刪除。

「確定清除所有對話？」

我對依幾個月嘅對話毫無留戀，好似一個被判要疊積木嘅監犯，就算堆積木疊得幾高，當刑罰完結，都會毫不留情咁推冧哂佢地。

「確定。」指尖觸碰螢幕，咯喇咯喇，幾個月間堆砌出嚟嘅積木成堡好似骨牌咁頹然倒下。

我同思雯喺商場會合，佢嘅表情好古怪，有少少仲係覺得我講緊笑，半信半疑咁。

「食野！」我拉住思雯直接去咗任叫任食都唔會太貴嘅薩莉亞，雖然放棄何金耀一啲都唔可惜，但依幾個月付出嘅心機同時間全部白費哂都唔係好受，要食返餐勁嘅補數。

坐低無耐我就自動同思雯交代哂依幾個月發生咩事，佢最擔心嘅事無發生，對方唔係變態殺人犯，只係我前度。

「其實你地咁好傾，點解唔畀個機會佢呢？」

「唔係好傾就代表要一齊架嘛。」好感、鍾意同愛都唔一樣，一路以嚟對未見過面嘅城繩我都只係有「好感」，而佢嘅真實身份足以令之前所有建立起嚟嘅感覺都一掃而空。

ns216.73.216.141da2