是咁的，玩匿名交友app撞返個ex - 【番外篇】芯玥62：Everglow

「我扑咗你，點會係同你講？」

何金耀提到我以前ig post過嘅歌，佢就算唔講，就算我已經成個帳號都刪除咗，我仍然記得家姐畀我聽嘅Everglow。

九龍灣屋企大裝修半年，媽咪同爸爸租咗間酒店，我就去咗家姐租嘅單位住，家姐直接訓梳化讓間房畀我瞓。當時同家姐嘅關係不知不覺好返啲。自從佢為咗近返工出去租樓住，大家見少咗之後，佢對我嘅態度都正常咗好多，我亦無咁抗拒同佢住埋一齊。雖然「為我好」為到我有啲唞唔到氣，但點講都好，我喺家姐身上都感覺到佢對我嘅愛，同爸爸媽咪完全唔一樣。

嗰半年係我最開心嘅時間，頭一個星期都未係好慣同家姐住，佢幾乎每晚都煮飯我食，手勢完全無退步，仲係我細個食開嘅味道。

「做咩坐到郁身郁勢呀？」

「唔係呀，你唔鬧我唔話我依樣嗰樣我好似周身唔聚財咁丫嘛。」

「仲有咩好話呀？你都差唔多畢業啦，大個女喇，要講要話嘅都話哂。」每次提起我地嘅關係，佢總會習慣性擰轉面，唔望我，話係難為情，默默夾條菜畀我︰「食多啲啦，唔係無屎屙。」

「挑，屙塞你個廁所都仲得啦。」

「食緊飯你係咪要咁核突呀？」

我成日諗，如果家姐早啲咁樣對我，我地之間就唔會無咗咁多一齊嘅時間。但其實家姐無變過，由頭到尾都只係想我好，只係我接受唔到佢太過專制同高壓嘅照顧啫。

我仲好記得第一晚臨瞓覺，家姐話佢瞓梳化，讓間房我一個人瞓，但我怕黑，喺張床左典右典都瞓唔著，結果都係走咗出廳叫家姐入房陪我瞓。其實我今日今日都仲怕黑，只係身邊已經無人畀我撒嬌，唯有自己忍咗佢，成長有時都係逼出嚟。

家姐最後喺睡房走廊打地鋪，事前我地兩個先吸一轉塵抹到乾乾淨淨，再喺衣櫃高層深處拎返張床墊出嚟，其實好大工程，但家姐一句怨言都無，就係為咗陪怕黑嘅我。

「屋企間房新裝修之後，兩張床係對住，以後你瞓嗰陣都會見到我架喇。」家姐嘅聲音好近，令我好有安全感。

「你會返嚟住？」

「差唔多啦，依度就完約，都係返屋企舒服啲。之前都係為近返工先搬出嚟，依家份新工都唔近依邊。」家姐話出得嚟住，每月花費總會比住屋企大咗，同埋一個人又無得買家庭裝日用品，食材又好難買得多因為好多時食唔哂就過期，結果想慳都無得慳。

「見得多會唔會又哦我架？」

「都話過咗嗰段時間囉。小朋友就話要管得嚴啫。」有時環境改變咗，人嘅心態同其他人嘅關係都會隨之改變。

「我之前都唔係小朋友啦。」

「家姐心目中你一路都係小朋友。」

「咁依家又覺得我大個？」

「見你識得照顧自己啦嘛，我唔喺度你都無放肆亂嚟的話，咁其實我咁嚴都係多餘啫。」

「就算係之前最反叛嗰陣呀，其實都係突登同你唱反調之嘛。你唔係咁嚴的話，可能嗰少少反抗都無。」我愈係反抗，家姐就愈惡愈嚴，惡性循環，搞到愈嚟愈僵。

「依家咪知囉。」好彩我地唔係去到最後先知，或者到最後都唔知。

我地兩個沉默一陣，家姐繼續講︰「雖然我之後會返去，但總有一日家姐無得再陪你瞓架喎。你點都要學識自己一個面對夜晚，唔通我結婚仲留喺屋企咩？」

「邊有男人同你結婚丫。」

「你係咪想死呀？」

「咁我怕黑都無計架嘛！」

家姐諗咗諗，就爬上床邊︰「你遲早都要面對自己一個瞓覺，如果得返自己一個又好驚的話，就望吓個天。因為無論幾黑都好，天上總會有星星閃吓閃吓。」佢指一指大玻璃窗，數月亮附近有幾多粒星星，我記得係十一粒。

「比首歌你聽下。」家姐調教手機，將音樂射去客廳個藍芽喇叭，一陣鋼琴前奏響起。

421Please respect copyright.ＰＥＮＡＮＡYcVgmVVzwA

Oh they say people come, say people go

他們說人來人往

This particular diamond was extra special

但只有這顆鑽石是例外的

421Please respect copyright.ＰＥＮＡＮＡ87bx8c8dcR

家姐走咗之後，我多咗一個無同人講嘅習慣，就係夜晚黑不時會抬頭望向夜空，數下有幾多粒星星。

421Please respect copyright.ＰＥＮＡＮＡkMB3fyy0a7

And though you might be gone

也許你已經離開，

And the world may not know

而全世界也許都不知道，

Still I see you, celestial.

我仍然在滿天繁星中看到你。

421Please respect copyright.ＰＥＮＡＮＡXHebmxQ8T5

歌詞寫得好靚，但我從來無喺滿天繁星之中睇到家姐嘅身影。佢嘅身影唔喺我視線之中，只留遺留喺我漸漸褪色嘅記憶。

家姐彈一彈我額頭︰「瞓啦傻妹。」

421Please respect copyright.ＰＥＮＡＮＡ18PlpKcygg

So how come things move on

為何一切總會流逝？

How come cars don't slow

為何車子不曾慢下來？

When it feels like the end of my world?

明明我已經覺得世界末日要來了

When I should but I can't let you go?

當我應該，但我無法放下你

421Please respect copyright.ＰＥＮＡＮＡt0aaUOLfQR

嗰一晚多雲，我抬頭，見唔到任何星星，我拎出手機指向夜空，將鏡頭放到最大最大都係漆黑一片，我影低咗無星星嘅黑夜，放張相上ig，想同家姐講，我好掛住你。

我的確久唔久會回憶泛濫放啲黑底白歌詞嘅圖上ig，但係依一張嘅黑底係一片夜空，唔係單純嘅黑。

「之後嘅事，你都知得七七八八。」

421Please respect copyright.ＰＥＮＡＮＡdG8D24E9Oc

421Please respect copyright.ＰＥＮＡＮＡxS07mCW0KM

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically