是咁的，玩匿名交友app撞返個ex - 【番外篇】芯玥53：《我左眼見到鬼》

下午時份，我坐喺豆袋梳化，用投影機睇戲，要拉哂所有窗廉，全屋都特別昏暗。喺依種環境下自己一個睇鬼片，本身都有啲驚，但見到主角係劉青雲同鄭秀文就有種安心感，應該唔係嚇死人嗰種鬼片。

點知一睇就喊到收唔到聲。我開始明白城繩點解推介依兩套戲我睇，兩套戲都係關於放下執著，雖然我唔係好認同《大隻佬》嘅世界觀，但《我左眼見到鬼》就好單純係一個女人放低好愛好愛嘅老公嘅故事。嗰種抑壓住自己悲傷嘅痛先係最痛。

「唓，有幾愛啫？識嗰七日，愛咪愛佢啲錢？」有時某啲關係外人根本無辦法理解，我地所掛念嘅人係無視所有理性理由，霸道咁佔據內心。

「甚至連我自己都問，唓，有幾愛啫？識嗰七日，愛咪愛佢啲錢？使唔使咁牽腸掛肚呀？使唔使咁牽腸掛肚呀？」

咪係囉，家姐都走咗幾年，使唔使咁牽腸掛肚呀？

「點知真係好牽腸掛肚……我真係好掛住好掛住我老公……」

我彷彿見到自己坐喺畫面上嘅木凳，同鄭秀文落淚嘅身影重疊喺一齊。只係佢嘅演出係假，但我嘅感情係真。原來一樣假嘅野都可以觸動到人，藝術就係用慌言去接觸真實嘅心靈。

係囉，點知真係好牽腸掛肚……我真係好掛住好掛住我家姐……

我好似被套戲點中死穴咁，不停喊，我覺得創作嘅人真係理解我依刻嘅痛苦，我從來無感受過一個故事嘅力量可以咁強大，咁撼動我嘅靈魂。

「其實我哋都好幸福吖，有人生前咁愛我哋，死咗之後都為我哋做咁多嘢。我哋都好應該為佢哋做返啲野，let him go啦，何麗珠。」

現實世界嘅我睇唔到家姐為我做過乜野，但有一句係啱，就係家姐生前的確都好愛我。咁我係咪都應該為佢做啲野呢？

因為故事入面，劉青雲就係仲牽掛鄭秀文先唔去投胎，我亦忍唔住諗，我一直放唔低家姐係咪都會累到佢投唔到胎呢？

我拎手機開返同家姐嘅對話出嚟睇，我記得之前突然有一日唔想自己再向佢放負，感覺負能量污染緊家姐嘅靈魂，嗰種突如其來嘅靈感雖然無客觀科學理據佐證，但我就係覺得好唔舒服，好唔想將家姐嘅靈魂染成黑色。

依家睇返同家姐嘅對話，依段時間同佢分享嘅野都係生活中嘅開心事。最初係由認識城繩開始，或者因為我個人慢慢開心咗，所以有好多生活瑣事都唔關城繩事，累積咗愈嚟愈多小確幸。

「今日行到巴士站即刻有車唔使等。」

「朝早一起身勁好太陽。」

「我搬咗屋喇！」

「搬屋公司收我勁平。」

「帶你睇下我新居丫。」

「我提早做哂學校啲文件。」

「疫情又嚟，學校停課，本身仲有好多野做，估唔到咁都有得休息下。」

我睇住自己一句又一句同家姐分享嘅日常小事，但今次病我反而無同佢講，發洩唔開心嘅對象變咗城繩。

「家姐，城繩介紹咗套戲我睇，叫《我左眼見到鬼》。」我心血來潮同家姐分享我嘅感想︰「唔知你投咗胎未呢？係咪仲擔心緊我依個咁無用嘅妹呀？」

城繩話，只要失去過一個好愛嘅人，睇依套戲一定有感觸。

「有時睇嘢嘅角度唔同咗，未必可以令你唔痛，但可能可以無咁痛。」

「家姐，我無咁痛喇。」

可能因為過得太耐，真係去到一個臨界點，突然之間覺得自己無咁痛。

又可能真係因為睇完依套戲，睇野嘅角度唔同咗。

當我發現自己可以「無咁痛」，即係切切實實感覺到痛苦係少咗。咁假以時日，痛苦應該真係會再慢慢減退，雖然唔知又需要幾耐，但一定會再變得無咁痛。

我做咗一樣好早好早之前就要做嘅事，最後一刻來臨嘅時候，我成日幻想自己會呼天搶地，會淚流滿面，但原來比我想像中來得平靜。

「家姐，我諗我要嘗試放低你喇。」

然後我覺得打字都唔足以表達我嘅感受，就錄音同佢講︰「家姐，我唔掛住你喇，你唔使返嚟喇。我好似戲入面嘅鄭秀文咁對個海大叫，愛佢就話唔愛佢，掛住佢就話唔掛住佢。

「家姐，我依幾年過得好開心呀，你唔使擔心呀我搞得掂呀。我一定會儲夠錢自己開幼兒中心，一定會實現到自己嘅夢想。」

唔同嘅係，鄭秀文嘅口是心非係仲想老公返嚟，但我係真心，我知道自己未係百分百做到，但總會做到。

我希望家姐可以過奈何橋、飲孟婆湯，投胎再做人。

我合埋眼，回想戲中畫面，家姐取代劉青雲嘅位置企喺奈何橋前面。

「再見喇妹。」家姐拎起碗。

「再見喇家姐。」

ns216.73.216.141da2