買六合彩唔中先是常態，我同城繩志在搵啲野一齊做下咁解。
之後城繩話唱歌我聽，我就點歌要dear jane嘅《2084》，佢又真係唱畀我聽。平時聽人唱歌會有啲尷尬，不過佢咁有心我都心甜嘅。
我留意到城繩把聲好沙，以為佢都病咗，點知係聲帶有事。因為一個最愛嘅前度，竟然喊到身體上有永久損傷，真係好可憐。依樣亦係我無可能理解嘅情緒，我從來無試過為一段完咗嘅感情喊。我好想知當初發生過咩事，但城繩話費事再提。
「聽你講法，最愛應該就係搞到你變聲嗰個女仔？」
「唔否認。雖然人生未完，但至今為止最愛係佢。」
「咁希望你之後嘅人生會遇到個更加愛嘅女仔。」
「遇到啦。咪你囉。」城繩已經好直接同我講情話，而我亦唔反感。
「誇張！」
「真架，識咗你我就無再諗起佢。之前個女朋友都畀唔到依種感覺我。」估唔到我依個同佢見都未見嘅女仔，竟然可以令佢放得低最愛嘅前度。一方面我好開心，證明自己喺佢心中又特別又有地位，但亦多咗啲壓力，如果見面時佢真係唔啱我，以我嘅性格真係會話走就走，咁佢又會傷心多一次。依家我對佢仲有好感，我唔想佢傷心，但到時我應該就懶得理佢，依種複雜嘅心情真係令我好煩呀！點解唔可以一開始就知佢咩樣！
「都唔知係咪氹人嘅。」
「無呀，我講事實，真心你令我忘記咗佢。咁你又有無人放唔低？」
「無，每次分手都係我講，唔愛就唔愛架啦。放唔低我就唔會分手，分得我就放低咗。」我一直以嚟都係咁，過咗去就算啦，無乜好留戀。
我同城繩維持每日傾偈，有一日我問起佢點解無問我啲個人資料，講講下佢無啦啦問我地址話想寄小禮物畀我，嗰下我個心即刻沉一沉，喺網上搵咗一大堆網絡騙案案例，其中一個就係寄禮物之後話比海關查，叫你過數拎返份禮物。唔係啩？傾咗咁耐，我對城繩感覺咁強烈先嚟搞啲咁嘅野？但又唔係喎，騙子梗係令我心動之後先出手啦，每年都唔知幾多個寂寞女子被伊拉克美軍定杜拜皇子呃幾百萬，佢地個個都係心動先會過數架啫，咪同我依家一樣囉？
「媽咪話唔可以亂畀屋企地址人架。」
「我都係問吓啫。」
「你本身諗住寄咩畀我？」
佢話想學《戀情告急》套戲嘅理論送花，花嘅數量有唔同意思。如果佢係騙子，都算係個在地化嘅騙子，起碼個騙局肯用港產片元素。
「每日送一枝花畀你，第一日一枝，第二日兩枝咁。」
中間我都係隨便回應下，但個腦係處於空白狀態。我好似已經拎住刀，隨時一野斬落我同城繩條紅線，只係仲猶豫緊自己有無怪錯好人。萬一我怪錯佢呢？咁咪親手斷送一段大好姻緣？
終於，我決定用講笑嘅方式問真嘅問題，睇埋佢點回應先決定斬唔斬情絲。
「但你個包裹係咪會中途寄失叫我畀錢？」
「你係咪中過招呀？」
「聽朋友講過吓玩交友app會遇到嘅騙子。其中一個就係建立咗感情之後就寄禮物。」
「我自己搞到自己好似騙子咁⋯⋯由得佢啦，留返啲禮物見面先送。」佢咁講我就放下心頭大石，當堂重重呼咗口氣，佢的確只係有禮物想送畀我，寄又好見面又好只係一個形式。如果佢堅持要寄，我應該即該走人。
「我真心嚇咗嚇，仲以為就咁要同你斬纜，一諗到咁就好唔捨得。」
「哈，放心放心。話說我之前都試過以為你係騙子。」吓？我係騙子？點解？幾時啊？
「吓？我做過咩嚟？」
「你話失眠想買香薰機問我有無用嗰陣。」哈哈，果然我同佢喺好多方面都係心靈相通，想要嘅野一樣，驚嘅野亦一樣。
「哦！你以為我賣香薰！」
「你睇返嗰陣啲對話，嗰幾吓真係勁似。」我會心一笑，喺佢個角度無啦啦見到我問佢有無用過香薰，都真係幾似啲傳銷妹。
「咁啱啦，我哋都係騙子，天生一對。」
我地都驚對方係騙子，都一樣怕依段關係只係一場大話，甚至察覺到一切可能真係大話嘅蛛絲馬跡嘅時候，我地都無辦法瀟灑咁離開，但亦慶幸有點點猶豫將我地從崖邊拉返轉頭，先可以繼續傾落去。
不得不承認，我唔想同城繩嘅關係就咁完結。
433Please respect copyright.ＰＥＮＡＮＡ0N31fKSLWU
and then Add to home screen.