是咁的，玩匿名交友app撞返個ex - 【番外篇】芯玥29：誤會

食完飯返屋企嗰程車，兩老問我覺得囉拔點，我話都幾好吖，不過可以再見多幾個人先決定嘅。

佢哋交換一個眼神，好似被老師讚完決定繼續讀書嘅小朋友咁。

我諗嚟緊佢哋會更加落力幫我搵對象。

為免佢哋繼續撩我講嘢，我打算拎手機出嚟扮忙。我突然諗起今朝配對咗嗰個戇鳩仔，唔知佢有冇搵我呢？

打開app，有啲失望，搞錯呀無搵我嘅？不過都好，佢唔係嗰種極煩嘅痴漢，而且好明顯都有自己嘅生活同工作。

佢係忙緊？定已經識咗另一個更加啱傾，比我更加戇鳩嘅女仔呢？

唔深究啦，但真係想扮忙，以手機螢幕逃離父母嘅目光。

「攰死。」反正佢又未quit我，咪試吓打啲嘢搲水吹囉。

「返地盤？」

都唔使三十秒，佢就覆我。哈哈，有啲開心，扮忙成功！

「唔係囉，唔係返工呀，相睇呀。」我將真實情況講出嚟，但無將我心底嘅憤怒同失望表現畀對方知。

我只係嚟輕輕鬆鬆傾吓偈。

「好高興認識你哦。」同一時間，囉拔竟然搵我。唔撚係呀？兩老又畀我電話出去！？

媽咪偷望我，睇嚟佢以為我同緊囉拔傾偈。

「你有得相睇仲使乜玩交友app呀？」

「我唔想去囉，勁煩。屋企人逼我去，咩年代呀仲相睇。」其實無逼我，而係我唔知情下安排咗，個感覺同以前被人賣豬仔嘅華人差唔多。不過費事解釋咁多啦。

我扑咗囉拔。

「你對個對象唔係好滿意咁喎。」

「梗係唔滿意啦，本身都係應酬吓屋企人之嘛。今日嗰個仲成個楊明咁。」

「起碼有啲燉湯補吓。」依條友個腦都轉得幾快，我睇到陰陰嘴笑，費事兩老見到又問長問短。

「執晒啦有鬼用咩。跟住又高談闊論啲咩香港繁榮穩定，見到都唔開胃。」咁香港都真係穩定繁榮嘅，你睇吓開心香港幾開心。

「咁唔好諗佢啦，諗我啦。」

「真喎，頭先佢喺度發表偉論嗰陣，真係有諗起同你鳩噏，舒服好多。」沒有比較就沒有傷害，啱傾真係好重要。

或者應該話搵到相同頻率嘅人好重要。

「鳩噏最緊要明對方講乜同舒服啫。」我非常同意！

「你有興趣嘅同我一齊上大灣區，我可以帶你睇樓哦。」囉拔啲訊息又亂入，好似啲趕極唔走嘅烏蠅咁。

大佬，我已經扑咗你，你仲用第二個電話搵我？仲直情無視我扑你，繼續搲水吹，依招係咩名堂？咪再咁煩得唔得呀？

「同意。佢仲煩緊我囉，一早叫咗兩老唔好亂畀我電話人架啦！」

「冷靜冷靜。」

「佢哋次次都係咁，我已經唔係第一次換電話號碼⋯⋯」

「煩得咁誇張？」

「你實係唔知撞著個變態可以有幾煩。」我人生中遇過嘅變態都真係唔少。

「唔知喎，通常我係煩到人移民嗰個。」

「哈！」唔知點解依句篤中我笑點，沉默嘅車廂突然爆出一吓笑聲。

兩老嘅眼神之中有幾分滿意嘅神色，睇嚟佢哋以為係囉拔氹得我咁開心。

「哈哈！勁誇張喎！我笑咗出聲。」

「笑吓咪好囉。」

終於返到屋企，泊完車就喺停車場行返上樓。爸爸媽咪特登行快咗，留低我一個喺後耐，明顯就係費事阻住我同囉拔傾偈，佢哋實以為今晚好有成果，我同囉拔進度良好。

「你安全到家要跟我說聲哦。」

屌！我真係心入面怒罵咗十九幾次，個時機咁準，擺明係兩老通水。好彩曾經嘅阿俊咁痴線，我已經習慣咗轉電話號碼，唔係年終淨係收啲煩鳩訊息都部機都可以做震蛋。

我無視囉拔，繼續同真正可以令我開心啲嘅城繩講嘢。

「今日成日都無笑過，你好嘢呀，整笑我。」

如果無識到佢，我今晚都定係喊住過，發畀家姐嘅訊息，永遠唔會被睇到同回覆嘅訊息唔知又會多幾多句。

「好事吖，男人最成功就係令女人淨係發出兩種聲音。」

「笑聲。仲有呢？」

「叫聲。」

「打爆你👊🏻👊🏻👊🏻」

城繩擺到明講衰嘢，但依刻嘅我無覺得佢咸濕同變態，可能我唔經唔覺已經認可咗佢係一個朋友。

「唔講喇，我聽日返早。」佢率先結束今日嘅回合。剛好，我都入屋。

「好啦，我都沖涼喇。」

「早唞。」

「你都係，晚安。」

媽咪別有深意嘅眼神望住我，好似猶豫咗一陣應唔應該開口咁，最後都係開咗口：「囉拔仔氹得你幾開心咁喎。」

我輕輕一笑，無正面回應，就入咗廁所。

「我先睡，晚安了哦。」

我將囉拔另一個號碼都扑埋，哦哦哦，哦你老味。

聽日就換電話號碼。

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically