是咁的，玩匿名交友app撞返個ex - 【番外篇】芯玥5：香水音樂會

見樂仔係咁望我，我就望返佢。

「我塊面有嘢？」

「唔係呀，你望我我咪望返你囉。」

我哋兩個對望，突然好似變咗玩忍笑遊戲咁，玩親依個遊戲最終結果都係兩個爆笑。

我同樂仔都笑咗出聲，其他乘客可能覺得我哋痴線。

兩個人一齊笑，係打破尷尬嘅最佳方法。

老實講，我唔係對住個個都可以咁樣齋望笑得出。連對明偉都無試過，總係佢做咗某啲嘢我先會笑。

對上一次可以就咁對望而無啦啦爆笑，已經要數到何金耀，我嘅前前前度。

大大話話拍咗五次拖，都真係得佢一個可以同我咁笑法。

好記得當時感受好深，會覺得日後同依個人一齊拍拖唔會悶，一來佢個人夠尻，二來可以唔出聲望幾秒就笑，應該會幾幸福。

就係因為咁先同佢一齊。

曾幾何時我覺得可以相視而笑一定有佢嘅意義，但同咗何金耀一齊之後，我就明白就算可以互望到爆笑，都未必係行到最後嗰個。

佢只係個曾經好特別嘅男仔。

不過都係多得佢，今日我同樂仔咁笑法，我唔會以為淨係依一點咁就足以證明我鍾意佢，或者同佢拍拖一定會幸福。

笑咪笑囉。

就到旺角，我問佢男人老狗做咩學整香水。

「我由細到大都對香味好敏感，就想學吓同香味相關嘅嘢，都幾得意吖。我有個夢想，就係喺演唱會嗰陣，每個嚟睇嘅人都會用我調出嚟嘅香水，每首歌同啲香味夾埋，個體驗一定好正。」

「聽落有啲料到喎。」

樂仔聽到我咁回應，雙眼發光，好似終於搵到知音人：「你覺呀？同我玩音樂嗰班話無乜特別喎。」

「點會呢？香水音樂會喎，幾得意吖！」

「係呢？嗅覺係五感入面連結記憶最深架，你細個聞過嘅香味大個咗聞返，就勾得返起以前嘅模糊記憶。」

樂仔咁講法，我又發現真係。

原來氣味係無形咁一直陪住我哋，家姐身上都有獨特嘅氣味，有時嗰個人唔喺身邊，嗰浸味就會永遠消失。

要好好彩，先有機會喺某啲完全巧合嘅時間同地方聞得返嗰浸味。

我就試過去泰國旅行，無端端行入一間細雜貨店嘅時候，聞到已經走咗好多年嘅爺爺浸味，就諗返起細個去佢屋企拜年嘅事。

如果樂仔為佢嘅演唱會調製咗一枝特別嘅香水，咁嗰日嘅香味就會同記憶連結起嚟。

以後每次噴嗰枝香水，就會令人諗返起演唱會當日嘅心情。

「最正係某啲香水要停產，幾年後另一個演唱會先再生產。」我隨口講。

「正喎！再正啲係個演唱會有主題，可能叫『初戀』，甜蜜嘅。幾年之後個演唱會就叫『回憶』，先有返嗰隻香水畀人買，聞返嗰隻味！諗起都正！」

我拍拍樂仔膊頭：「到時記得請我去睇喎！」

「一定啦！係喎你有無唉豬嗰啲？」

「現代人有乜可能無呀？你算係抄我牌？」

「係呀，熄匙、車牌、身份證。」

我笑咗出聲：「估唔到你都幾𢦀尻！」

「同我熟啲，尻到嚇死你。」

「睇吓邊個嚇死邊個？」

地鐵繼續行駛，車卡連接位特別大風，地下塊鋼板又成日郁郁吓，我哋互相科勞咗唉豬。

雖然樂仔係靚仔，但佢唉豬啲相全部無樣，典型嘅毒撚帳戶，全部都係影風景，一係就玩音樂嘅相。

好快就到旺角，我哋一齊落車行去上堂。

我哋上調香課程嘅地方喺一間商廈入面，搭𨋢上到去就見到「木見 muk6jin6 x 不只 notonly」嘅木牌。

每個行業都有自己一套學問，學習有興趣嘅知識永遠都係咁開心。

店主兼導師只哥同班朋友一齊搞依個本地香品品牌，佢哋除咗成日出現喺唔同巿集，除咗香水仲有整浴球、手工梘、消毒噴噴。

我同樂仔一齊出現，場內大約有十幾人，有少女又有媽咪帶埋個女嚟玩嘅。

上兩堂學咗香水嘅基本構成，有化學香精同天然香精。有時噴香水會敏感就係因為化學香精落太多。而其實點天然嘅香水都必需用到化學香料，只係比例少好多。真係純天然香精，比如要玫瑰味，係要用幾斤玫瑰花為原料處理先緊到唔夠五毫升出嚟。

仲學咗香水嘅基調、前調、中調、尾調，即係氣味嘅基底，噴喺身上初頭係咩味，隨時間過去會轉化為咩味。

上兩堂都係學基本原則，聞香味比較為主，今堂終於到親手做香水。

只哥拍一拍手：「好喇，今日呢我想大家搵一個partner，兩個人一組去做。」

佢講完依句，我下意識就望向身邊嘅樂仔，估唔到佢都望住我。

「一組？」

「驚你咩？」

ns216.73.216.103da2

Reading Theme:

Font Size:

Line Spacing:

Paragraph Spacing:

Load the next issue automatically