是咁的，玩匿名交友app撞返個ex - 【番外篇】芯玥2︰劉明偉

第二朝好早爸爸媽咪就搖醒我，佢哋好少會星期六晨咁早突登叫醒我，九成係有好重要嘅突發事件。

「芯，明偉喺門口等緊你。」

我下意識按住額頭，頭都大埋，唔記得咗佢以前上過嚟。

「佢琴晚凌晨就嚟咗，喺走廊坐到依家，話知道你瞓咗費事嘈醒你。又費事騷擾到我哋。」爸爸話。

「唔係要出去飲早茶都唔知佢喺度。唉，佢真係好仔嚟架。」

「得喇我出去見佢。」我連面都懶得洗，成個癲婆咁走出門口，見到個周身名牌口腫面腫嘅男人。

「劉生，你想點？」

「我想知⋯⋯點解咁突然悔婚同分手？我接受唔到。」

對我嚟講一啲都唔突然，醞釀咗好耐，只係婚期逐漸逼近，愈係無時間愈令我更加誠實咁面對自己內心。

我曾經聽過，如果你到結婚嗰陣仲問緊係咪要同依個人結婚，其實就係唔想同佢結。

心入面塞滿愛的話，大腦就無空間再問問題。

但面對劉明偉，我心入面塞滿嘅只有問題。

「你接唔接受到都好，我已經決定咗。」

明偉握住拳頭，嘴唇喺度震：「太殘忍。」

「點先會唔殘忍？我拖你耐啲到結婚嗰日先答我唔願意，係咪就仁慈啲？」

「點解一定要同我分開？你就唔可以講我願意咩？」

「⋯⋯」

見我沉默，兩老你眼望我眼：「係囉，唔得咩？」

「唔得。」

明偉眼淚流落嚟。

「我講唔出口。」我已經就嚟廿六歲，唔再係唔知自己個心想點嘅年齡。

人生每到一個大關口，個心都會話你聽佢真正想點，只係好多人無去聽，或者聽咗到當聽唔到。

可能因為同依個人已經一齊咗太多年，可能因為大家屋企人都認可咗依段關係，可能因為已經準備結婚，可能已經到咗要答願唔願意嘅瞬間，一大班親戚朋友睇住⋯⋯

我知道自己無勇氣喺婚禮嗰日say no，所以我先依家講。明偉上次求婚我已經因為成班朋友嘅群眾壓力而講咗違心說話。

每次都唔理個心想點就行落去，選擇妥協，慢慢就會覺得人生好唔開心，會問自己點解搞成咁，甚至因為做錯嘅決定太多，都唔知自己係幾時開始做錯。

我就好清楚，同明偉結婚唔係我真正想要嘅嘢，就算頂硬上結完，十幾年後嘅某日我都會自問，如果今日無結婚，我嘅人生係咪會開心啲？

明偉係好愛我，但我過得唔開心，扮到一年？兩年？要對佢一世，總有一日佢會察覺到我嘅偽裝，我無信心做個可以呃佢一世嘅演員。

我嘅唔開心會感染佢，到時佢問我有咩唔開心，我會照直講後悔結婚咩？如果怕傷到佢，我就會搖頭話無嘢，佢聽多幾次就會忟，明明有嘢講咩無嘢？但我唔講得真話，咁嘅婚姻就唔殘忍？

唔係成日聽同事美姐呻佢屋企，我都唔會諗得咁清楚，我唔想自己十年後變成佢咁。

佢都成日講當年啲朋友見佢拍咗好多年拖，問佢哋嚟緊係咪結婚，佢只係答：「都要結架啦。」佢理解唔到其他姐妹點解可以結婚嗰日喊，仲喊得噉開心。

「咁求婚嗰陣你又答應我？」明偉問。

「我唔想喺你班朋友面前落你面，依家你可以同佢哋講另一套說法，話我出軌又好點都好，我唔介意。」

「你有出軌咩？」

「無，但你想點同班朋友交代就點交代，我唔介意做壞人，我係做錯嗰個，你點都係受害者嚟。」

明偉拉起我對手：「你無錯呀，你係最好嘅女朋友⋯⋯係我未婚妻⋯⋯我同你一次交都無嗌過，從來無一個女朋友可以咁好，又唔貪我啲錢，又幫到我做生意，我daddy mammy又鍾意你⋯⋯我無咗你真係唔得架⋯⋯」

我慢慢推開佢對手：「大個喇你，三十幾歲人，應該好清楚依個世界無話無咗邊個唔得架。」

「我個世界無咗你唔得呀！」

「我個世界有你都唔得呀！！！」

全屋陷入一片靜默，走廊幾戶人家開咗門伸個頭出嚟裝裝下睇熱鬧。

「你⋯⋯咁憎我咩？」

「無憎，只係無感覺喇。」

「點解？」

又返去一開始個問題，果然係喺度浪費時間，點解星期六唔使出活動我都無得瞓晏啲要嘥時間應付一個我已經無感覺嘅人？

「可能真係無得解。」

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically