「……咁鬼似我之前單嘢嘅……」
「你講起又好似係……」
「何金耀……咪即係金仔？」
「唔係又咁橋下話？」
「應該唔係嘅……」我哋兩個都略略帶過依個念頭，無深究太多。
本來我仲覺得今日放假有排捱，估唔到思雯嘅出現，令我可以安心耍下廢。食完早餐，收拾好拎出去大堂丟垃圾，思雯跟出跟入，好似一個媽媽從旁守護啱啱學識行路嘅女咁。
「我仲記得，之前有種感覺，我嘅人生要進入下個章節，而所有嘢都係由我走出去大堂丟垃圾開始。」
我將兩袋外賣丟入四方型嘅綠色大垃圾箱︰「之後又喺度撞見筷子，轉眼又逼我去下一章。」
同樂仔嘅故事係丟垃圾開始，亦由丟垃圾結束。
我呆呆望住打開嘅垃圾箱，唔明點解個天咁殘忍，明明只要我出門前去多個廁所、遲多一分鐘，就唔會遇到筷子，佢早少少遲少少都唔會撞到我，偏偏所有大話都被嗰晚簡單嘅巧遇打破。
「都係好事嚟嘅。始終佢呃緊你。返入去啦，貪依度香咩？」思雯拉住我隻手返去。
思雯幫我開著香薰機，播啲放鬆音樂︰「我覺得依個都有少少幫助，432Hz嘅頻率，聽講可以同人體共振，多啲聽會舒服啲。」
「好嘢喎，點發現架？」雖然唔知有無效，但聽落好似有啲根據。
「初初養白雪雪無耐就要絕育，佢廿四個鐘瞓唔到又精神緊張，獸醫推介話聽下啲幫狗放鬆嘅音樂。好耐以前架喇，到我瞓唔著嗰陣突然醒起，原來有一款畀人聽，咪試下，初頭就唔覺有咩效果嘅，但反正都無其他嘢做就全晚開住，兩三日之後就開始嚟料。」
思雯除咗小說，仲睇咗唔少同心靈治療有關嘅書︰「我覺得好似調返啱個頻率咁，我見過有個實驗，係一百個拍子機亂打拍子，過一段時間大概五分鐘左右，全部拍子機就會慢慢同步跟同一個拍子節奏。依啲放鬆音樂嘅原理應該都係咁上下，只係我嘅同步時間長啲咁解。」
「依家就咁聽，起碼都舒服先。呀，我知喇，平時去按摩嗰啲地方播嘅音樂就差唔多係咁。」我哋攤喺廳，乜都唔做，乜都唔諗，淨係傾偈，我話我今晚會長播放鬆音樂瞓覺。
「我係咪好廢？」
「咪傻啦，你不知幾叻。」
「我唔叻呀，家姐走咗之後，我咁辛苦試咗咁多方法捱咗咁耐，以為自己堅強咗，點知阿樂依件事就令我打回原形，好似同我講我之前嘅堅強只係自以為是。佢明明係傷害我嗰個，我唔應該傷心……」
「無話應唔應該架，人地割你一刀，你實會流血架啦。我覺得你一直以嚟都好叻喎。喂，我以前推介畀你同你自己搵嘅方法，你都真係試喎。依啲乜方法物方法，幾有效都好，都係睇你做唔做啫。鬼唔知每日八杯水健康咩？一日一蘋果醫生遠離我㖭，幾多人聽完會做呢？你叻在遇上唔開心嘢都一直有搵方法嘗試解決，就算一日唔得，一招唔得，咪試多幾日，試多幾招囉。如果之前咁大鑊都捱得過，今次又點可能頂唔住？被出軌會傷心就一定架啦，你傷心先證明自己愛過，唔通分手咩感覺都無係好事咩？咁反而證明你唔愛佢！你會傷心就證明你愛，依家係樂仔個撚樣傷害一個愛佢嘅人，有問題嘅係佢唔係你，你已經好好，夠好，無謂再用個賤人嘅錯懲罰自己。依個世界總有人唔愛你，總有人愛你，你為個唔愛你嘅人捉蟲入自己屎窟，痛嘅都係自己同愛你嘅人，個閪佬話知你死呀，但我哋唔想你死呀，你明唔明呀？」
我點點頭。
我覺得自己廢，原來唔係，思雯眼中我已經強大咗好多。
「你變得更加堅強唔係代表唔會再仆街，而係之前你家姐咁大件事你都企得返起身，今次都一樣可以，你企到起身依個能力已經係事實嚟。你話今次準備同樂仔結婚，佢一心一意愛你，點知結婚嗰日就喺大街被個招牌跌落嚟砸死，咁就真係同你家姐件事有得比喇。」
想像到樂仔被招牌砸死，我竟然覺得好好笑，亦好爽，抵死。我笑咗出聲，好似吐咗啖悶氣出嚟咁，其實覺得一個人抵死，同愛已經拉開咗一段距離。真係愛，點會想對方死？點會覺得對方連意外死都係抵死？
果然幽默永遠係化解鬱結嘅最佳方法。
「笑返咪好！」
「你唔好淨係安慰我啦，明明自己都未放得低。」
「未完全放低啫，大方向係放低ing，每過一段時間再諗返佢都會無咁傷心，方向啱的話，咪慢慢行囉，總會到目的地。」
「仲會唔會再諗返……『如果我點點點』段關係可能就無事？」
「有，一路都會諗，如果我可以再注意多啲，唔同男仔玩得咁埋，可能就唔會分手。但係……依個先係我嚟……我本來就無在意朋友係男定女，我就算同阿木摟頭摟頸，都好清楚自己無個心卜卜跳嘅感覺。我肯為咗康仔注意自己點同男仔玩，已經盡咗力，注意哂我可以注意嘅每件事，起碼對得住自己。」
思雯嘆口氣︰「好似老師叫我溫書，我真係有溫，點知最後考試嘅題目係另一科……咁考出嚟都係唔合格，不過唔代表我無盡力溫書架嘛。既然都唔合格咗，日日後悔自己溫錯書都唔會合格返，咁倒不如正視下自己其實有溫書嘅努力，起碼我會舒服啲。」佢搖搖頭，提起精神望向我︰「咁你呢？又有無咁諗？」
ns216.73.216.179da2
and then Add to home screen.