好好彩，「以一念斷萬念」幫到我，都唔知係依個方法真係咁有效，定其實我對樂仔出軌嘅事無我想像中咁痛苦。思緒依舊凌亂，無力整理，心攰症狀之一，如同做完十日運動全身肌肉酸痛仲要去搬磚，根本搬唔郁。肌肉痛同心痛係一樣，但好多人都無視個心嘅感受，夾硬壓抑，死頂，結果逼咗自己入堀頭路。
張開眼，仰望天花板，呼咗口氣，起身都無力，拖動身體轉向側瞓，正打算繼續攤屍，就見到一對黑白分明嘅眼對住我，眨一眨。
「起身食早餐喇。」
開電腦嘅運算圖標喺我額前轉咗兩三個圈，理性上線之後，眼淚就失控咁大大滴滲咗出嚟。
本來連起身都無力嘅我，不知哪來嘅衝動彈起，回神嘅時候已經發現自己摟住突然出現喺眼前嘅思雯。
今日嘅早晨，以一場痛哭拉開序幕。
思雯輕拍我背脊，無叫我唔好喊，只係靜靜陪我由得我發洩，一向粗魯嘅佢，今日最斯文，亦提醒返我當初佢就係咁樣陪我，而多年過我，我又再次變返有幸獨享佢斯文一面嘅人。
如果我無咗依個朋友，一早就死咗。
「點……點解……」
「你畀咗鎖匙我架嘛！唔記得喇？」講起就記得，同何金耀見面之後，我就將屋企嘅無限時期通行證交咗畀思雯。
我唔知點解個天會咁樣安排，以前我從來無搬過出嚟住，就算以前搬出嚟，都唔會有一位令我能夠安心交低後備匙畀佢嘅朋友，只有依個特定時間，特定嘅人可以擁有，造就出今日嘅驚喜同感動。
本來以為要獨自面對嘅早晨，本來空無一人嘅客廳，全部都變成幻想，因為思雯陪我起身，客廳將會坐兩個人已成事實。
佢用紙巾幫我印眼淚，到我喊到攰，稍為收聲，佢就話︰「趁中場休息，食早餐喇！食飽先有力喊！」
我破涕為笑，同佢一齊出廳食早餐，茶記沙嗲牛麵餐兩碗。說來慚愧，識思雯之前我無食過沙嗲牛麵，就算入茶記都唔會叫嚟食，依種食物明明一直存在，偏偏要由思雯幫我接通條天地線，由佢介紹開始，我先跟住食。
佢話沙嗲牛麵係最容易測試到一間茶記好唔好食嘅基本菜式︰「啲沙嗲醬夠唔夠傑、啲湯夠唔夠濃、啲麵彈唔彈牙、啲牛肉新唔新鮮，大把學問呀。如果沙嗲牛都整唔好，間嘢好打極有限。」
思雯再次大大啖食麵，食到雪雪聲，啲湯汁彈到成枱都係，見到佢依個樣，我稍為安心︰「你變返之前咁都好啲……仲有無掛住康仔？」
「我未變返之前咁架，但要嚟安慰你，我無理由仲喊苦喊忽架嘛，咪頂硬上！同埋掛住佢還掛住佢，有日我突然發現，其實碗沙嗲牛麵都係一樣咁好食，我做乜要因為掛住佢忽略我眼前碗麵？之後計過自己，原來食咗三十六碗無味嘅沙嗲牛，浪費咗三十六碗享受，成千幾銀唔覺唔覺食咗落肚喎，咪好搵自己笨？」
嗰日開始，思雯食沙嗲牛麵就集中注意力去食，轉眼碗嘢就愈食愈好味。
「好悔自己咁遲知㖭呀，好彩都未算遲，都係三十六碗，三個幾月時間啫。碗麵嘅味一直都係一樣咁好味，係我感受唔到咋喎。我又諗返，以前最痛苦嘅日子，中學嗰陣被人蝦、自己一個食飯、嗰陣都未識康仔，碗沙嗲牛麵已經陪緊我，即係有無康仔喺我身邊都好，依碗嘢都無變過，咁點解我要因為無咗康仔就改變我點感受依碗麵嘅味道呢？」
「好深……」
「個世界太多嘢變，一日前係拍緊拖，一日後就變返單身。咁難得碗沙嗲牛無變，未變，咪好好品嚐每一啖嘅味囉。如果同康仔分咗手，連榮記都執埋，我諗我會好後悔佢未執前無好好咁細味碗沙嗲牛。」
思雯大大啖夾起包住牛肉嘅麵，東北佬咁扒入口。
「總之一個字講哂，珍惜！」
我又忍唔住笑︰「三個字，不予置評！」
「咁要搵尹志平。」
毫無壓力，又無厘頭嘅尻噏，令我又再放鬆小小。
「我琴晚都有類似嘅感受。」
「又係沙嗲牛麵？」
「你呀。」
思雯一頓，有氣無力咁笑一聲︰「衰鬼。」
「你係我碗沙嗲牛麵。」
我同思雯對望兩秒，佢睇得出我嘅感激，我睇得出佢嘅感動。佢轉眼又雙手護胸︰「咪諗住食我呀！」
「食麵啦你！」
雪雪雪，同思雯傾下傾下，都唔記得咗自己有無胃口，總之食食下，食咗大半碗，成績算好好。
「多謝你呀，明明自己都未搞掂，都嚟照顧我。」
「咪講依啲啦，做朋友係咁做架啦！你都唔好覺得有負於我嗰啲呀，我都有因為你啲建議過好咗架。」
「下？邊單？」
「你叫我睇小說丫嘛，真係有用，嗰次睇完喊完之後就舒暢咗好多，不過個結局都真係幫唔到我放低。嗰排行多咗書店，睇下仲有無其他小說幫到我，又剛好見到另一本《是咁的》開頭嘅書喎，唔同作者架喎，用同一個開頭喎，不過就唔係叫做金庸的男人，直接叫金仔，買咗嚟睇，我覺得依本反而幫到我再釋懷多少少。你睇唔睇？下次攞畀你丫。」
「本書叫咩名？」
「《是咁的，玩匿名交友app撞返個ex》。」
ns216.73.216.179da2
and then Add to home screen.