我唔係第一次失去重要嘅人，亦唔係第一次抑鬱，先會咁驚依個病捲土重來，因為我覺得捱過一次都太過辛苦，上次捱得過只係好彩，好彩在有思雯不離不棄陪住我。
意識好似當思雯係救命稻草，盡力拉實以防我依隻駱駝被壓跨。半夢半醒中，同思雯依幾年嚟嘅相處都隨意彈出，同眼白白望住樂仔同Anna搞嘢嘅夢唔同，無線性時間，我亦無「被困住」嘅感覺，意識完全唔受時間限制，好似可以隨時快進同倒退嘅電影，但每一幕都令我安心同舒服。
我同思雯係大學一年級嗰陣上體育堂識，我讀幼兒教育，佢就讀歷史系，正常嚟講大家無可能相識，但自從大一羽毛球班第一堂分組開始，我就同佢唔經唔覺走過八個年頭。
「哈囉，我哋一組丫！」
「我叫思雯呀，中文個思雯唔係英文個semen，你呢？」我即刻爆笑，介紹自己。
同佢打羽毛球嗰個學期嘅十三堂，每星期兩個鐘，畫面上係我哋揮拍，同此起彼落嘅笑聲，無論打得好有十幾個來回互相救波而尖叫，定失咗一球爭少少接到嘅壓線球，氣氛都極其歡樂。
同依個女人一齊，原來係我嘅救贖。小學嘅朋友早就失聯，中學朋友就唔知點解走到被出賣同中傷嘅局面，以前一直唔明白點解人哋會咁做，依家回想，大概都係同我自以為是嘅態度有關，唔知日常生活中喺邊度得罪咗班姐妹，不知不覺間佢哋放午飯就會自己行先，分組我永遠係多出嚟嘅一個。我雖然感覺到，但無在乎過。
中四至中六，我愈嚟愈多獨處時間，返學、食晏、放學、補習都自己一個，班「好姐妹」出街無約過我，反而令我更多溫書時間，成績愈嚟愈好，考親都頭五名，又再吸引更多唔抵得嘅人針對我。萬幸嘅係佢哋無出手，我主要都係被人單單打打，冷淡對待，所以今時今日面對Miss Wong嘅冷言冷語我早就有免疫力。
如果唔係嗰幾年無得同班姐妹玩，焗住專心讀書，我都唔會成為全校僅有可以升上大學嘅十個學生之一，其他唔係讀文憑就係副學士，全級頭十名先叫勉強入到大學。入唔到大學，我唔知我會認識到邊個新朋友，但就一定唔會識到思雯，咁如果要我嗰三年同班扮哂嘢嘅假姐妹虛耗光陰，我寧願被佢哋排斥，換遇上思雯嘅機會。
我估唔到，佢一個朋友足以抵償哂我以往喺友情上受嘅屈辱，更估唔到一直都係我眼中開心果嘅思雯，原來中學同我一樣係個被排斥嘅異類。
失去家姐後，思雯一次又一次過嚟搵我，帶埋白雪雪，名正言順拉我同佢一齊落公園放狗，行勻成個黃埔海濱，有時唔帶白雪雪就可以入埋和黃公園，兜完個大圈就同佢行返家維邨。
夢中連當晚嘅海風都感覺得到，風中帶點腥同鹹，我同思雯坐喺黃埔海濱長凳，望住白雪雪好興奮咁周圍搵柱狀物體射尿霸地盤，總會令本來提唔起勁嘅我忍唔住微微一笑。
嗰日我提起成世人都無咩感受過愛，缺乏親情、友情，先喺愛情搵「愛」，但家姐死之前我先發現原來佢好愛我。
「你中學無朋友咩？」
「有過，但中三開始唔知點解就被佢哋排斥。」
「唔意外丫，我由中一開始就被人排啦。」
我愕然望向思雯，佢一臉無所謂，眼神充滿溺愛咁望實白雪雪。
「我男仔頭丫嘛，同班男仔又玩得咁埋，大把女仔睇我唔順眼。最搞笑係我有個中同叫阿木，鍾意阿木嗰條女就排我啦，但有個中意我嘅男仔都排阿木，明明我哋兩個真係普通朋友，咩事都無，你話幾冤枉。」
思雯有比我好亦有比我差嘅處境，佢粗魯但豪氣嘅性格好容易同班男同學打成一片，雖然成個中學生涯都無女性朋友，但男仔朋友就好多。不過佢無我咁好彩，鍾意阿木嘅係女學生團體入面嘅大阿姐，話欺凌佢就可以欺凌佢，書包被人畫過，去廁所被水彈轟過。
「但我唔卸佢喎，佢唔聽道理丫嘛，講咗十萬九千次我同阿木無嘢都唔聽丫嘛，咪打過囉！打到佢怕打到佢服囉！」依場大交震驚全校師生家長，思雯仲記大過，受盡校長、訓導主任、對方家姐嘅指責。
我難以想像佢當時係點捱過嚟。
「無捱喎，佢之後無再搞搞震，不知幾正。」一個大過，受盡千夫所指，換來欺凌者嘅恐懼，思雯話抵到爛。
「不過阿木因為咁避忌唔同我玩就真係有啲唔開心囉。上咗大學先搵返我，講起中學因為其他人而唔同我玩，其實都係戇尻，理佢哋做乜喎。」時至今日思雯仲會久唔久同阿木一齊打機、睇戲、打波，但完全純友誼，所以佢每當見到網上有人糾結男女有無純友誼就笑︰「傻傻哋，係你無啫。個世界咁大，點會無丫？同有無鬼一樣，你見過咪信囉。」
亦因為有過中學嘅經歷，思雯先唔會因為任何聲音避忌任何男性朋友，偏偏無論點講，康仔都接受唔到思雯嘅本性。
思雯同我一樣，中學都經歷過一段無朋友嘅日子，亦因為我哋都曾經無，先會咁珍惜大家。
ns216.73.216.179da2
and then Add to home screen.