是咁的，玩匿名交友app撞返個ex - 【番外篇】芯玥44：腸仔蛋花粥

思雯返嚟之後情緒平伏咗唔少，但都會久唔久夜晚打電話比我傾幾句，我就繼續安慰佢。無論佢搵我幾多次，我都一定會花時間陪佢，好彩嘅係思雯未去到抑鬱咁嚴重，作為過來人我比較清楚佢嘅情況無我當年咁差。

察覺到依點之後，我都放鬆咗唔少，我唔希望最好嘅朋友要經歷我當年嗰種痛苦。

我同城繩之間亦多咗搵對方，基本上一得閒就會吹兩句。

「咳咳……」我咳多咗，明顯係之前攝親作病，但我都戴住口罩返工，盡量頂住。唔好以為做幼稚園老師好輕鬆，啲小朋友三點幾放完學至五點之間係有大量班務要做，又要開會同準備下星期嘅教材同通告，本身已經夠忙。我仲要撞正準備下星期教育主題週，要教小朋友去超級市場，要用紙皮整啲蔬果、牛奶、零食同價錢牌出嚟，仲有收銀機、紙幣同硬幣，等佢地可以親身體驗下點樣喺超級市場買野食同比錢。

順帶一提，整個紙皮版超級市場出嚟唔係必需，隔籬班有直接播片睇，又有老師選擇就咁講同寫黑板，係我先咁白痴想小朋友有親身體驗搞而咁多野。雖然真係好辛苦，過咗主題教育週依堆佈置都會一車車送去堆填區，但只要見到班仔女玩得開心，同埋真係透過玩、體驗記得教學內容，我就覺得一切都值得。

身體一日重過一日，喉嚨由針吉慢慢變成火燒，但我點都要自己完成教學週，我用意志力叫自己唔好病，點都要頂住，因為我搞哂成個超級市場出嚟，就係想親眼見到班小朋友玩嗰陣個開心樣。

望住佢地扮哂大人咁拎住個籃仔扮買餸，買蘋果話要整番茄炒蛋，比錢個單位變咗「厘米」，到買完野話返屋企要同媽咪講佢學識買餸……我口罩下嘅嘴就會笑得好甜，每個小朋友都係自然可以令人快樂嘅天使。

終於，一過教育週，超級市場喺昏暗嘅教室之中，被校工拆落、撕開、丟入垃圾桶，教室回復正常，鄧老師亦終於頂唔順病咗，我下意識就同城繩講。

「救命，我要去睇醫生。」

「咩事？」

「今朝起身勁喉嚨痛，用咗幾包紙巾。」

「喉嚨痛食紙巾？」依個時候佢仲喺度搞笑，好啦，我又真係笑咗嘅。

「係呀，倒吸咗入喉嚨。」

「吸紙巾有助舒緩喉嚨痛？」

「就係吸咗落去先喉嚨痛！病都同你鳩噏，你睇我幾好。」

「鳩噏係你天性嚟。小心身體呀！依排好似又爆。」

「我不知幾正經。」

「你真係正經我哋唔會傾到咁耐。」

「真，唔鳩噏生活無樂趣。」

「快啲睇完醫生返屋企食藥大覺瞓！」

知道我病，思雯都即刻嚟觀塘照顧我。我食完藥，朦朦矓矓之間好似見到家姐坐喺床邊，擔心咁望住我。我其實好清楚無可能係家姐，但仍然覺得好開心，捉住佢隻手︰「你嚟睇我呀？」

家姐點點頭。

「我好掛住你呀……」以往除咗生日係我大哂，病嗰陣我都係大哂。家姐會準時叫我起身食藥，又會煲粥比我食。我記得自己唔鍾意食白粥，家姐特登煲咗腸仔蛋花粥畀我，唔好睇依味野奇奇怪怪咁，佢係我人生食過最好食嘅粥。

「點解係你要死？」個世界咁多該死嘅仆街唔使死，雖然咁講好仆街，但要搵人死都唔緊要，點解偏偏係我家姐先？依個問題我問咗好多次，亦會繼續問更多次，因為我真係諗唔明。

依家手機成日都有通知，咁一個人死前可唔可以都有通知？起碼可以一齊耐啲，我絕對唔會比家姐離開我視線範圍，廿四小時唔瞓，喺最後一日嚟臨之前用盡每分每秒同佢一齊。

我睜開眼皮，見到自己捉住思雯，佢眼紅紅咁望住我，望我撥一撥額上嘅髮絲︰「見返家姐？」我搖搖頭，知道無可能「見返」，一切都只係我食完藥腦袋唔清晰先見到嘅幻覺。

「我買咗粥你食。」係最正路嘅皮蛋瘦肉粥，街邊鋪就買得到，但腸仔蛋花粥就買唔到。我病嗰陣無辦法自己煮，就算自己煮都好似唔係同一隻味，或者係因為我從來唔知當年家姐用咗邊隻牌子嘅腸仔同雞蛋，又或者我係懷念緊一擘大眼就有得食嘅腸仔蛋花粥，無論邊一種我都食唔返。

食完粥，我又攤返上床，思雯將藥同水放喺我床頭，之後就去幫我洗碗。佢其實真係一個好女仔嚟，雖然粗魯，但照顧人嗰陣係好細心。

喺床上等胃入面半碗粥落格，等瞓覺，我又搵城繩。

「病到生無可戀。」

「可戀我。」

「你一日flirt幾多女架？」

「一個。」

「邊個？」

「你囉。」哇，依一下真係殺我一個措手不及，估唔到喺我病到七彩嗰陣竟然收到一句甜到漏油嘅說話，仲要係我之前都講過。

「今日把口咁甜嘅？」

「你病吖嘛。」

「有人心痛我喎。」好難得，病緊嘅我仲可以微微笑住覆訊息。

「係呀，知你病，心痛死我。本身你無事的話，我約咗你出嚟見喇。」

「終於開盲盒？」

「你想唔想吖？」

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically