是咁的，玩匿名交友app撞返個ex - 【番外篇】芯玥42：一念

去到第三日嘅午飯時間，我睇完思雯腥過嚟嘅台南赤坎樓打卡相之後，抱住半絲希望㩒入去較咗無訊息通知嘅tg，終於收到城繩嘅回應！

「都試過呀，壓力大嗰排就成日瞓唔著。」

我要承認真係有少少開心，估唔到我地嘅關係仲未完。至於佢點解隔咁耐先回我，我唔打算深究。好似一問佢點解咁遲先覆就表現得我太過著緊，我又唔係啲會扮嬲嘅女仔，依兩日嘅失聯話畀我知我地嘅關係仍然好脆弱，所以都係唔好亂講咩比較好。

「嘩，終於腹肌。」

「原來你用乳陰輸入法。」

「你夠係！」

「我較返啱個青勞同你傾計咋。」

「咁你最後點樣解決依個問題？」既然佢都試過失眠，唔知佢有無咩建議畀我。

「諗住一樣嘢，反而好快瞓到。」

城繩同我講，佢有段時間成日上網搵啲「放下」嘅嘢嚟睇，漸漸接觸多咗佛教嘅嘢。

「要唔好亂諗，最好嘅方法就係搵樣嘢嚟諗，即係所謂『以一念，斷萬念』。」

之後城繩講嘅野，令我茅塞頓開︰「有無發現睇緊fb碌緊ig嗰陣就算好攰都會無啦啦精神返？因為我哋每碌一下都睇緊新嘅嘢，諗到新嘅嘢。大腦會對轉變同新鮮感提高警覺，就同我哋喺腦入面東諗啲西諗啲一樣，嗰陣係最難瞓得著。」

我依兩晚瞓唔著，都會碌手機消磨時間，但愈碌反而愈瞓唔著。城繩所講嘅正正就係我嘅情況，我諗如果佢係騙子或者神棍，之後叫我買咩符作咩法買乜乜風水擺設就可以瞓返覺我都會信佢。

「但當諗死一樣嘢，大腦就會覺得悶，之後注意力開始失焦，我哋就繼續諗嗰樣嘢，不知不覺就瞓得著。」

「真唔真呀？」我對個方法半信半疑，不過其實已經下定決心今晚就試試佢。

「我係咁囉，之後就瞓得返。」

「我今晚試吓你依個方法先。」

「講明先，你自己衡量情況，真係極度嚴重都係睇醫生食安眠藥幫助吓好啲。」

「食過啦，之後更加瞓唔到。」醫生又好、社工又好、心理治療師都好，我統統睇過哂，一啲用都無。之前食抗抑鬱藥仲會搞到個身腫脹又肥，所以用咗好多心力戒咗，諗返嗰段時間真係特別糾結，唔食又會病發，食就變肥，但相比唔開心我更加忍受唔到自己個樣同身型嘅扭曲，我唔想之後抑鬱嘅理由除咗家姐之外多一樣外表焦慮，嗰堆藥物對一個女仔嘅外表摧殘威力實在太大。

「可能依賴咗。」

「所以試吓你個方法都無壞。同埋我終於買咗香薰機，隻精油都係我鍾意嘅味，希望雙管齊下會有用。」其實琴晚驗證咗係無用，不過可能因為我根本瞓唔著先無效，我買嗰隻薰衣草味精油可能係瞓得著會令你好瞓啲，瞓唔著係幫唔到你瞓著。即係你有錢就比津貼你，你做乞衣係無錢收嘅概念。

嗰晚，我食完晚餐又搵城繩吹水。

「你又抑鬱又失眠，都仲保持到一顆戇鳩的心真係唔容易。」佢中午回我嘅回後一句說話。

「我依啲奇行種嚟。」

「見面禮物送護頸墊畀你。」依句笑咗。

「咁你又有無咩對抗抑鬱嘅妙法呀大師？」唔知點解，我覺得城繩都有啲同我一樣嘅特質，雖然表面上好戇鳩，但應該曾經都有過好傷心嘅時候，唔知當時佢係點捱過去架呢？

「都真係有。」

城繩話佢由起身嗰刻就會諗自己好黑仔，將所有可以諗到嘅不幸都推到極致，之後過完嗰一日，就發現幻想過嘅一百個不幸情景可能得幾個真係成真，既然仲有九十幾件衰事無發生，咁嗰日就算過得唔錯。

一路睇住城繩分享，「輸入中……」嘅字眼不停閃現，我暫時放低手機，嘗試佢教我嘅「以一念，斷萬念」。

不過用咩嚟做我嗰「一念」呢？諗家姐我只會更加瞓唔著啫，兩老亦唔會幫到我瞓著，有咩係我可以不停諗嘅呢？

不如就試下諗城繩？

佢到底係個點樣嘅男仔呢？

我合埋眼，嘗試幻想同佢見面嗰日會係點，雖然我都知佢可能會係油頭大叔或者肥膩毒撚，但依家係幻想丫嘛！任我諗架嘛！諗佢係個五官同身型正常嘅男仔都唔過份啫！

「你就係城繩？」

「阿琴？」

幻想畫面係又模糊又清晰，好似透過一道掛咗薄紗嘅窗看出外面嘅世界，薄紗時而被微風吹起，可以睇得清楚少少，但到我想聚焦同記住城繩個樣嘅時候，風停喇，薄紗失去支撐降落，再次遮住窗外嘅風景。

就喺依個一來一回嘅過程之中，或者加上我已經兩日無瞓，意識隨薰衣草嘅香味漸漸遠去，我不知不覺就喺梳化瞓著咗。682Please respect copyright.ＰＥＮＡＮＡGbUQeIkCc4

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically