《屍河明居鑽石山》（是咁的，我發現打喪屍有得升呢） - 518

518

熄燈？

唔係！應該係全醫院停電！

驟然間，室內比室外仲要更加黑暗。我抬頭望個氣窗，仲有啲月光會灑入嚟。

冇月光照到嘅部份，伸手不見五指。

……咦？

唔係，我睇到嘢。

係隻《夜之眼》提供俾我嘅視力……我腦入面松果體塊眼皮已經打開咗，我甚至覺得，而家呢個光度，先至係最舒服嘅。

而家我兩隻肉眼只係睇到純黑色，再疊落《夜之眼》嘅視力度，結果出嚟嘅畫面，就係冇顏色嘅世界。

非常清晰。

本來由顏色造成嘅層次感，由『灰階』所取代，我而家就好似睇緊高清拍嘅黑白電影咁。

與此同時，我其他感官亦因為《夜之眼》張開而敏銳咗。

我聽到外面好多唔同來源嘅聲音。

當然，大部份都係來自出面條街，即係『屍河』嗰啲集體屍叫聲。

但我可以憑自己意志去做『降躁』。

即係話，只要我集中注意力喺某個聲音來源，嗰個來源就會聽得清楚好多，唔會俾雜音咁易影響到。

除咗聽覺，仲有種好難形容嘅感應。

係嗅覺嗎？

有種似曾相識的『氣味』，已經悄然進入咗醫院範圍，不過好快又消失咗……唔係完全消失，感覺對方係故意掩飾行蹤，我有種『明明知道佢喺度但冇辦法證明到佢在場』嘅無力。

但有時候，呢種『氣味』會外洩咗一剎那，似乎係對方必需要接觸一啲物件，不可避免留低咗可以被察覺嘅『痕跡』。

係邊個？

呢浸『氣味』，已經喺醫院範圍嘅好幾個地方閃現過……慢慢喺度迂迴接近，唔知想計劃啲咩嘢。

好似俾『佢』狩獵緊咁。

停電同呢股逼近緊嘅氣息有關嗎？

就咁坐喺度聽，唔係辦法！

其他人呢？

我留意到，門外走廊嘅唐唐佢哋，亦喺停電嗰一刻，全部靜哂落嚟。

我可以聽到佢哋急速、凝重嘅喘氣聲。

我諗，佢哋同我一樣，都已經打開咗隻《夜之眼》，而家正喺度放開感官，察覺吓出咗咩問題。

然後我聽到佢哋低聲討論緊，當中唐唐同Kiki都喺度……

『點解會咁？』

『係咪有喪屍搞到個電箱？冇理由㗎，明明入黑前先噴過殺蟲水，啲嘢唔會無端端咁撞埋去……』

『仲要個電箱實淨成咁，除非有人灑血上去，否則啲喪屍唔會癲到打得爛……』

喺呢個時候，我竟然好清楚聽到，佢哋嘅心臟同時重重咁跳咗一吓。

係頭先嗰句說話，撩起咗醫院可能俾『人』搞緊嘅懷疑！

『電箱就喺出面，叫東翼守夜嗰Team人去睇吓……』

『等等！阿良部對講機嘅訊號冇咗！』

『其他Team Leader呢？喂！喂！點解揀喺呢個時候冇哂訊號？』

『部對講機壞咗定點？有冇人識整？』

『啲對講機係阿良負責……』

『有冇叫佢哋返嚟先？頭先你哋點樣同佢哋講？』

『佢哋話就快追到Carlos施……』

『Keep住Call佢哋！叫佢哋唔好做其他嘢住，返嚟睇住醫院先！』

越聽佢哋講啲嘢，我心裏面就覺得越不妙……

電箱？

即係類似總電掣吧？

唔知點解，我一聽到『電箱』，個心就跳咗一跳。

喺我嘅《無痕者》技能裏面，我甚至察覺到附近一啲『電力流動』嘅殘餘。我甚至可以知道，佢哋講嗰個電箱大致喺邊。

就好似喺個腦度，可以勉強劃出成間醫院嘅電線分佈圖。

因為電力流過會產生極輕微嘅電磁力，就算啲電線包哂膠，而家嘅我都可以感應得到……

就好似啲借地磁力嚟越冬飛行嘅候鳥咁！

即使啱啱停咗電，但係個網絡仲有啲餘電，我仲勉強有啲感應……

「唔係！個電箱冇問題！」

但係幾乎同一時間，喺走廊……

『喂？你哋話見到個電箱真係俾啲喪屍圍住哂？』

我聽完呆咗。

點解會咁？唔通真係啲喪屍搞爛個電箱？

『有冇帶夠殺蟲水？唔好急！我知！我知道一停電，醫院啲維生儀器全部會即時停哂！阿詠佢哋已經上去睇緊樓上啲Patient！』

『安全至上！趕開哂啲喪屍先行埋去！識整就整，如果唔係都要等阿良返嚟，係佢先有電工牌……』

『喂？收訊好差！唔知啲干擾訊號邊度嚟……部對講機可能就打柴……喂？喂？』

我忍唔住衝咗出去走廊，同佢哋講：

「唔好去個電箱度！」

ns216.73.216.13da2

Reading Theme:

Font Size:

Line Spacing:

Paragraph Spacing:

Load the next issue automatically