《屍河明居鑽石山》（是咁的，我發現打喪屍有得升呢） - 509

509

586Please respect copyright.ＰＥＮＡＮＡTUfnsQG7Ga

以一個入行冇耐嘅年輕護士嚟講，對老人科咁上心，係比較少見。

尤其阿詠對老人癡呆嘅患者，有一種特別強烈嘅移情作用：就好似當每一個病人都係自己親人咁。

所以我可以想像……

阿詠一定會好想得到《無玷者》技能，因為有咗佢……

世上可能就唔會有『老人癡呆』呢個病！

「太難。」

唐唐搖頭苦笑，「人體最難醫治嘅部位係個頭，即使係用點素，治療大腦損傷嘅消耗係最大，限制亦係最多。」

「因為點素治療能力本身，靠嘅就係腦內能力。即使係我哋呢啲戴咗Con嘅實驗體，只要腦部一旦受損，要自醫幾乎係唔可能。」

「即使係《無玷者》，到目前為止，亦未有人可以做得到。」

「即使阿詠上咗Level 3，都係唔夠。」

但睇阿詠眼神……

佢唔甘心。

「Level 5。」

佢話，「跟據總路線圖，《無玷者》只要上到Level 5，就可以重置患者大腦。」

「但《無玷者》升級要求太難，」

唐唐話，「你喺咁短時間內上到Level 3已經係奇蹟，唔好俾自己咁大壓力。」

「你哋用咗副Con幾耐？」我問。

「如果講話由知道呢件事起，到定期聽Briefing，甚至做一啲VR Training，我諗都有好幾個月……」

唐唐話：「但係副Con嘅所有真實能力，都係喺《孤城英雄》Game Start嗰日起先開始生效。」

「即係……」

「香港變成孤城，需要英雄嗰日。」

唐唐話，「甚至事前冇人知道呢句說話點解，直至我哋見到新聞報道話有喪屍。」

——————————————

我聽到匪夷所思。

唐唐講嘅呢番話，推翻咗大部份我對聖母呢個『大台』嘅想像……我仲以為嚟到呢度，所有問題都可以得到解答。

「所以你哋接受嘅訓練，你哋聽過嘅Briefing，完全冇透露過香港會變成而家咁？」

「我哋只係知道會有災難發生。」

唐唐話：「其實一切都好科幻小說，突然俾個上司捉入地下室，話由啹喀兵時期起已經有人預言將來會出事，只係唔知幾時，又唔知係咩事，總之當時留落嚟要Keep住做嘅嘢，我哋就照跟啦咁……」

「其實當初有一半以上嘅人都唔信，因為一直以嚟副Con都係得個講字，我哋剩係有得睇啲發哂黃嘅所謂『原初文件』資料，就算講到似層層又點？」

「但係我哋Join Team時已經簽咗保密協議，而且我哋係覺得，大台揀選嘅人，係睇中咗佢哋內心入面，會好憧憬《孤城英雄》所帶俾佢哋嘅能力，因此變相會較容易守密。」

「再講，就算件事爆咗出嚟，又有人信咩？」

「同埋個大台背後，我估有滲入醫管局甚至超過醫管局嘅權力，當然亦唔排除政府係知道有呢個Project……」

「係直到幾個月前，大台方面先至話，個硬件同軟件都Finalise，亦隨時開始Beta Testing，咁先至開始派Con……」

「其實副Con主要係俾院內參加咗小組嘅人戴，主要係醫護人員，只係去到後來，好似話要擴大實驗基礎，想搵啲街外人做對照組……」

「所以我就係個對照組？」

「其實對照組名額好珍貴。」

唐唐話，「你有興趣，我可以俾哂啲Briefing文件你睇……根據當年估算，當《孤城英雄》開Game嗰時，個地圖理論上只係得返3%『符合定義嘅人類』。」

「戴咗Con，假設啲能力係真嘅，生存機率會高好多。」

「再講，仲有資格問題。」

「你係我哋聖母醫院唯一檢驗過而適合戴Con嘅街外人，喺過去三個月以嚟。」

ns216.73.216.20da2