《屍河明居鑽石山》（是咁的，我發現打喪屍有得升呢） - 411

011

我轉入去嘅雙鳳街，係條慢慢向上斜嘅山路嚟，最終係可以去到慈雲山。

由於有斜度，而且彎彎曲曲，雖然老人院窗口對到正，但係都睇唔到條街入面係點。

但係我親身走咗入去。

唔使一個街口，我基本上可以直望到聖母後門。

我一望！

「咩、咩料啊……」

明知企喺條街勁危險，都忍唔住窒咗步，呆呆望住呢條完全變哂嘅雙鳳街。

我由龍蟠苑一路走過嚟，咩幾十車連環相撞，巴士反艇全部見過哂，我以為自己再見到啲咩死人冧樓都唔會嚇親……

但係……

「……真係冧樓？」

就喺我眼前嘅下個街口，成個雙鳳街市斜斜塌咗落嚟，Block撚哂成條雙鳳街！

呢幢係食環嗰啲多功能大樓，兩層街市以上，仲有六、七層公眾停車場……而家嗰幾層停車場，好似拿破崙蛋糕咁一層層Sir哂落嚟，唔止封咗條馬路，仲撞到對面啲唐樓冧撚哂牆！

「冇可能。」我呆咗咁同自己講，「喪屍點可能識拆樓！」

而家條雙鳳街俾啲殘骸遮哂，堆咗成四、五層樓高，我完全睇唔到三個街口後面嘅聖母醫院！

「……係街壘！冧樓係人為嘅！」

廢老頭先講過，聖母醫院有人想做大台，想憑一己之力擋哂獅子山以北嘅喪屍！

個街市係傾向後面冧嘅，即係靠上山方向冧，極之唔自然。但係咁冧，正好可以Block埋後面啲橫街……

而喺堆瓦磯後方，似乎仲有啲著火餘煙，但啲煙俾啲瓦礫擋住吹唔到過嚟，所以我喺老人院聞唔到……

我甚至仲聽到有啲燒肉嘅『滋滋』聲……我亦聞到一浸烤焦腐肉嘅味道，一啲都唔香。

可能俾啲燒焦味阻一阻，直到而家，先開始有喪屍發現到我，但只係拖住步咁慢行過嚟，仲未確認我係目標……

我馬上將自己匿入一幢唐樓嘅樓梯口，伸個頭出嚟繼續觀察！

「雙鳳街封咗，咁我可以點？」

我望吓右手邊條橫街……嗰度平日係地鋪街市（冇上到樓嘅舊檔），有啲粥檔茶記咁，好多人吓……

而家嗰邊好靜。

理論上黃大仙舊區周街都係廢老，冇可能咁靜。

我留意到呢條街後面俾啲唐樓遮住嘅位，同樣有大量濃煙升起……即係話後面都有人封咗路？

「引流？」

似乎有人刻意用封路改道嘅方式，將啲喪屍唔知引哂去邊！

咁當然唔會清得咁乾淨，所謂『條街好靜』都有十條八條喪屍遊緊，只係數目少過平時啲活人好多，令我覺得詭異。

「唔通要出返去，走返消防局同紀律部隊宿舍嗰條路？」

就喺呢個時候！

Yrrrrrrrrrrrr！

有屍叫聲就喺我匿緊嘅樓梯口發出！

我仲未睇到條屍喺邊，就見到大廈度鐵閘，向住我飛埋嚟！

我俾度閘推到飛咗出街，個額頭撞咗落馬路邊條欄杆度！

碰！

好大聲撼頭聲響起，起哂回音嗰隻！

我竟然仲有意識，只係啷住喺條欄杆度！我第一時間下意識摸住自己額額，已經即時腫起一舊，仲濕濕哋……

我將責住我嘅爛鐵閘扔開！

我望返個鐵閘。

本來係好新淨，鋼水好好……但係而家中間凹咗一個好大嘅鞋印！

個閘……係俾人一腳伸開嘅！

我視線繼續上移，見到原本鐵閘個位，企咗個全身裝備嘅消防員喺度。

當然，係屍變咗嘅！

「我屌你，避開咗個消防局，避唔開啲出緊差嘅！」

失策！

我俾單冧樓同街壘完全吸引哂注意力，嗅覺又俾燒焦味遮住，令到咁大隻喪屍走到埋嚟身後，都冇發現到！

雖然個消防員成身好多處被咬到見哂骨，大概只有半邊身係完整，頭都係90度墊喺膊頭，但係佢好大隻！

一腳踢爆個鋼閘啊大佬！

佢望住我個額頭，個樣好似突然發咗癲咁！

我摸完額頭隻手，望吓，全部都係血。

我第一個反應係，起身走人！

第一眼，我係望向街市方向……

但係我見到個情景，心都涼哂。

喺嗰堆疊咗五層樓嘅冧樓瓦礫，當中已經捐咗好多個頭出嚟……而另外半幢冇冧嘅街市，喺啲鋪頭同樓上欄杆邊，同樣有好多頭不斷伸出嚟。

全部都望住我個出緊血嘅額頭！

「扑街！我只係撼咗一吓，竟然整醒哂成條街啲喪屍！」

我只有退返出大馬路……

但係……

豬膶效應已過，而家大馬路啲喪屍，同樣俾我額頭啲血腥味引到擰哂過嚟！

冇路可走！

最慘嘅係，我額頭啲血仲係咁流緊！我眼角開始刺痛，應該係連眼角都撞爆埋，呢個位有睇開打拳都知，一爆就流血不止！

Yrrrrrrrrrrrr！

屍叫聲喺天空迴響！

甚至連對面街，恒生銀行樓上啲唐樓！

同埋自己頭上嗰啲唐樓窗口！

啲頭都伸哂出嚟！

甚至喺樓上啲喪屍，想直接跳樓撲過嚟我度！

而樓梯口個消防員已經衝咗出嚟！

我可以點！

ns216.73.217.123da2

Reading Theme:

Font Size:

Line Spacing:

Paragraph Spacing:

Load the next issue automatically