《屍河明居鑽石山》（是咁的，我發現打喪屍有得升呢） - 309

009

683Please respect copyright.ＰＥＮＡＮＡkvUqsCQYAc

「以我所知，我哋醫院冇幫人配隱形眼鏡呢個服務。」

呢個答案符合預期。

但係綜合阿Roy所講，聖母醫院入面嘅秘密嘢已經夠多！

我要去睇吓！

「你頭先話趕緊時間？你想去邊？仲想做啲咩？」阿Roy問。

我本來想坦白同佢講，有個人喺屋企等住我去救，我要上聖母醫院碰運氣……但實在太多前提需要解釋。

最後我只係搖搖頭，冇去答。

「你等我幾分鐘，我入一入去……」

我幫忙將個細路女由簷蓬頂逮返落去，阿Roy帶住佢入惠康……我一度以為佢唔會再出嚟。

唔知個細路女，仲有冇機會講返嘢？

幾分鐘後，阿Roy出返嚟。佢又噴多咗殺蟲水，似乎真係有效，只有較遠處見到佢嘅兩隻喪屍，先至半疑惑咁慢慢走近；望唔到佢嘅基本冇察覺……

變相為佢爭取到好多行動時間。

「例牌兩日乾糧。」

佢拋咗個惠袋俾我，裏面有包餅，同埋一梳開始爛嘅香蕉。

仲有兩餅電線膠紙，同埋一綑膠索帶？

唔通係俾我用嚟綁自己嘅？因為喺佢眼中，我變喪屍只係時間問題……

阿Roy正想轉身返入去，我忍唔住問佢：

「個細路女……你真係唔識佢㗎？」

佢諗咗一陣，可以點答。

「其實我阿媽就住喺黃大仙下村，一直由其他同事幫佢配藥同做物理治療，而當日，我哋同黃大仙架車係同時出車嘅……」

所以佢而家恪守甚至超過自己本份，其實係一廂情願咁希望，嗰邊啲同事都會同樣咁對佢阿媽？

「我知道咁諗好戇鳩，但我個人就係咁，有咩辦法？」佢苦笑，「唔係一個大男人點解會走去做護士？」

「戇鳩冇咩問題，我都好戇鳩。」我話。

我哋對望一眼，然後無聲大笑咗一陣……佢甚至笑到標咗眼淚水出嚟。

「唔好返嚟。」

佢轉頭就跑返入惠康。呢次係我最後一次見到阿Roy。

我突然記起有樣嘢未問！

「阿Roy！你識唔識得聖母老人科有個護士，叫『阿詠』？」

佢睜一睜眼。

「阿詠？」

———————————————

我都唔理得會唔會危害健康，即時就拎住支殺蟲水，噴勻全身！

果然，只要再加上閉氣兼唔郁，就算係直望到我嘅喪屍，都唔會有咩反應。

但係只要我一開始行，或者透氣，都係會引起一啲注意。

但已比起冇噴嘢之前，隱蔽咗好多！

只少背對住我嘅喪屍，大致上都唔會因為聞到我而擰轉頭……

我覺得，能夠到達聖母醫院嘅成功率大增！

當然，我仲嫌唔夠咁，喺雙臂同埋頸嗰啲位，又噴多浸WD40。

喺起行之前，我打算將阿Roy俾我嘅乾糧，同埋成梳蕉食哂。

個多事字幕似乎好欣賞我食啲天然嘢，我一條條蕉咁食，就見到啲體力數據快速上升，《暴走者》冷卻時間亦大幅下降。

「食咁多蕉唔會肚疴咩？」我問佢。

（進食香蕉將會大大緩解你目前經歷的便秘問題。）

連我便秘緊都知……

（建議付出0.2枚《夜之眼》的點素，永久性提升消化綜合能力一級。原理係強化大腦對指示分泌消化液，以及腸臟蠕動嘅能力……）

「好。」

嗡！

我第一個感覺係，飽肚感大幅降低，我能夠容納嘅食物更多。

而且，我感到自己個胃，甚至成個肚，都喺度微微發熱……

食完大半梳蕉，《暴走者》已經冷卻完成。

然後我繼續食，發現吸收嘅食物養份，轉咗落去用嚟『分解乳酸』，即係消除極限運動後出現嘅疲勞同酸痛。

「正啊，咁我咪真係開無雙，打極都唔攰？」

（注意：深層疲勞目前仍需透過靜止睡眠怯除，否則會漸漸累積成各種體質和精神性勞損。）

食哂。

我感到個胃依然有半飽，但係呢半飽似乎係『備用燃料』嚟，同埋我啲消化道裏面都應該充滿備用燃料。

出發！

我一口氣跑到條雨天走廊嘅盡頭，只要一向右望，就睇得哂成條通向黃大仙嘅石梯。

我一望過去！

撐眼！

開始轉入下午的烈陽，喺呢個角度曬到正……我花咗幾秒鐘嚟適應光線。

成條百幾級長嘅石梯，數落有三、四條喪屍徘徊緊。

「啲喪屍都隔得幾開，應該應付得到。」

條石梯都有雨天簷蓬，不過係尖頂嚟，半透明膠蓋嗰種；而且因為係上擋土牆嘅斜路，我估個簷蓬有成三、四十度角咁斜，應該好難喺上面行走，但如果連開暴走者為咗行路，我又覺得唔抵。

畢竟可能出咗龍蟠苑，先至開始嚟啲硬嘢！

決定行樓梯。

喺我而家呢度跳落去，仲要穿過一個籃球場，先去到條石梯度。

呢個籃球場平日好熱鬧，好多人打波，而家只剩幾條著住波衫嘅喪屍，好彩都係𡃁仔嚟……

我評估過角度，喺地面，除咗呢片籃球場範圍，應該唔會有喪屍睇見我上石梯。

即係要清場先。

（經驗值累積已達最低門檻值，請問是否需要打開『S.A.M.』狀態？）

683Please respect copyright.ＰＥＮＡＮＡplRBYI3Ci5

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically