《屍河明居鑽石山》（是咁的，我發現打喪屍有得升呢） - 112

012

地下嘅血跡，一直拖住行到廁所門前。

門開咗三份一左右，勉強睇到入面……但呢個角度，我仲未睇到麥包喺邊。

佢可能縮咗入個用嚟淋花灑嘅企缸度。

令我透大氣嘅，係道廁所門！

沿住血腳印，從門底有密密麻麻嘅血手痕跡，一直印到上個門把度。

血跡主要喺腰位以下。

可以想像，當時麥包已經跌低咗，佢係爬住咁撐返起身，好辛苦咁扭開個門把，想扭開道門再爬入去……

究竟當時麥包有幾痛苦！

而且個鋁製門把，甩咗出嚟，半吊咗喺度，見到個窿。

點整甩的？

人力絕對唔可能！只可能係用手邊硬物用力扑……我無辦法唔留意個門把旁邊，有撻好大撻嘅血跡，印喺道門上面。

好似啲人拎住支好大支嘅毛筆，大大力篤落張紙度咁！啲墨（血）水濺哂出嚟！

甚至連道門都凹咗小小！

我將兩件事聯想起嚟……麥包唔通喺呢度俾人扑頭，撼凹咗道門？個門把都係俾人扑甩嘅？

真係沈莎倫做嘅？

即係由抓門開始，屋企所有亂象，都係因為莎倫發咗癲？係佢想殺麥包？

咁佢頭先點解要搵嘢頂住自己房門？

為咗呃我，等我覺得佢先係受害者？

咁佢唔止癲，仲癲得嚟好陰險冷靜！可能嗎？

如果係咁，麥包恐怕已經凶多吉少……但頭先廁所發出啲聲點嚟？俾我用『聲波功』嗌跌的？

打開道廁所門，就知道真相！

我伸隻手出嚟時，係震得好緊要，亦忍唔住係咁抖大氣……

同時我大約每兩秒就望返過沈莎倫嗰邊一次。

我捉得支櫈腳好實，預咗當佢撲出嚟時，我唔會客氣，我覺得我有勇氣攞嚟捅佢！

點解？

因為我已經聽到，麥包就喺廁所入面！

佢應該係聽到我啲透氣聲，想應我，但係只能夠發出一啲好似呻吟咁嘅微弱聲音。

成個推理已經出哂嚟。

沈莎倫想殺麥少傑，甚至以為自己成功咗；但麥少傑命硬，挨到而家都未死！

喺呢個時候，我係唔會俾自己去驚一個癲咗嘅女人，否則我呢一世都睇唔起自己！

「少傑！」

我一手拉開咗道門……

而道門正喺我眼前一掩而過之間……

等等。

如果癡咗線嘅係沈莎倫，咁插咗喺房門上面嗰啲指甲……

我成身漂汗。

『嗰啲都係男人指甲嚟。莎倫啲指甲向來雕哂花，唔係咁嘅！』

癡嗰個唔係沈莎倫！

推理全盤推翻！

但已經太遲，門已經完全打開……

但係我，竟然無第一時間睇吓麥包匿埋喺邊，甚至連退後、逃跑呢啲動作都嚟唔到做……

因為我俾眼前出現嘅另一件事，完全嚇住。

剩係呢個畫面，再一次推翻哂我之前諗嘅嘢。

包括我對成個世界，喺目前狀態嘅認知！

屋居廁所好細，除咗拉咗趟門嘅企缸，其實一眼睇哂。

我就直望住廁所個氣窗。

氣窗係打開住的。

可以望正對面單位個廁所。

人哋個廁所無問題，問題係外牆凸出嚟嗰條石屎邊。

條邊度，攤咗個人。

呢個人頭部倒轉，睜大對眼咁望住我。

佢塊面至少爛咗三份之一！

ns216.73.216.66da2

Reading Theme:

Font Size:

Line Spacing:

Paragraph Spacing:

Load the next issue automatically