《屍河明居鑽石山》（是咁的，我發現打喪屍有得升呢） - 613

613

我只能夠講，呢一吓咁都扔得中，好運到堪稱奇蹟！

咁啱部無人機盤旋到最近我嘅低空位，而喺我舊石屎飛出去嘅過程裏面，部機亦冇任何轉向或變速發生……

因為我只係憑直覺，去估我舊石屎扔到時部機會飛到去邊，如果你要我諗定先扔，我甚至都扔唔出手。

篷一聲！

機身大爆火花，甚至連一邊機翼都翹咗上去！部機即時飛到淆哂一邊，狂噴濃煙……

仲會唔會有第二鏡頭或後備鏡頭？

「Oh……No！」

見施永義抱哂頭，好似死咗老母咁，應該冇啦……信得過Kong U仔嘅常識水平！

咁樣做，佢所謂最精彩嘅終幕，就再冇觀眾！

「我個奇蹟……」

佢仲一直望住部機，好似期望佢仲飛得，「呢個奇蹟係屬於全人類，個個都有份㗎！邊個有資格去搞亂檔？」

「你條浸中仔……人渣嚟，冇人性！」

完全唔明，點解佢會有立場去鬧我係人渣同冇人性……

當佢擰返轉頭，想要指住我繼續鬧時……

佢望向嗰個位置，只係見到條尼泊爾佬，掛屍咗喺條天台邊度……佢個《夜之眼》已經俾我摘咗……

我已經秤住另一條俾我拗斷咗雙臂嘅喪屍，向住施永義旁邊衝緊過嚟！

但係嗰時阿詠已經雙腳離開咗天台，只係靠施永義一手掹住。

「你哋趕唔切啦！」

施永義雙腳一掙，就要滑出天台！

嘶！

個把手俾嘢摵住，滑唔郁！

原來阿詠及時醒咗，佢竟然將自己隻手指，攝入去把手條滑輪坑度！只見阿詠尖叫咗聲，鮮血就叭叭聲咁沿住佢手臂流落嚟。

「你條賤人阻撚住哂！」

施永義正想掹返阿詠隻手指出嚟，但卡得好實，一時間掹唔出。

我已經趕到！

「死開啊！」施永義又將自己掹成彈弓咁，喺一手捉住阿詠之間，另一手向住我哋橫斬過嚟！

做我肉盾條喪屍，成個頭俾佢斬甩，飛射咗出街！

我及時縮得切，佢隻手啱啱喺我頭頂擦過……

施永義咁啱掹返阿詠隻手指出嚟！

個滑輪郁得返！

我掉開個肉盾，魚躍式咁跳出去，伸盡隻手，啱啱捉得住施永義隻腳踭！

施永義同詠詠已經離開條天台邊成米遠，我亦攤盡腰伸咗半個人出去，我都唔知自己可以挨幾耐……

「死開啊仆街！」

施永義一腳一腳咁踩我塊面！

喺挨第一腳時，我知道自己鼻樑已經斷咗，再挨幾腳，我只係見到自己啲血沿住下巴滴落街……

喺我哋身下，就係嗰個涼亭。啲老人家而家全部停低，眼都唔眨咁望住我哋……或者咁講，主要係望住阿詠吧？

佢哋眼中嘅聖母。

而由於有血滴緊落嚟，下面已經有喪屍湧入……當然，佢哋當啲老人家係透明，只係向住天咁張牙舞爪，睇吓我哋幾時跌落嚟。

我只係得返兩隻膝頭哥，勉強摵住條只有三、四吋高嘅石屎邊……

而我亦俾施永義踩到頭暈眼花，我眼皮亦已腫哂，睇嘢只係矇矇一片。

但係我絕對唔放手！

只要佢哋兩個滑咗上屍山，無論我點搏命，都唔會夠時間追上。

施永義見點踩我都唔放手，亦停咗落嚟。

我膝頭哥已經頂唔住，就要成個人跌出街……我諗咁都好，最多一直扯住施永義，三個人一齊滑上屍山！

「你唔使旨意！」

施永義改為兩隻手搭落阿詠膊頭度，「你繼續掹住我，陣間一墬落嚟，詠詠個頭就會俾你Chok甩！到時係你殺咗詠詠！」

「你唔敢攬炒嘅！」我話。

「你大我啊？試吓吖！」

呢個時候，條石屎邊啪一聲爛咗，我膝頭哥即刻食唔住力，個人好快咁滑出去……只剩低兩隻腳尖，去承受拉住兩個人嘅力量！

冇可能頂得住！

就喺呢個時候，我見到阿詠好鎮定咁望住我……笑咗笑。

好似同我講：冇嘢嘅，唔使擔心。

我兩隻腳尖已滑出天台！我成個人感到一陣離心力，就要向下跌……但係我，選擇依然唔放開施永義。

《碎骨者》！

我將佢成隻腳踭捏爆，揸住佢隻腳掌跌落樓！

點都要換你一隻腳！

「你條仆街……哇！」

呢個時候施永義一邊慘叫，而佢同阿詠已經向住屍山滑緊過去。阿詠條頸發出連串咔嘞聲，因為施永義成身重量，仲掛咗喺佢個膊頭度！

斷腳嘅劇痛明顯干擾咗施永義，但佢亦死唔肯放手，勉強向上一攀，先用單手擸住個把手卸力，成個人半條條揈，將跌就跌咁嘅狀態……

而阿詠似乎亦乘機想掙脫施永義，兩人一邊強烈糾纏，就咁滑咗出醫院領空……

噗！

施永義慘叫咗聲！

原來阿詠向住佢子孫根，狠狠一鋤！

喺涼亭頂撻到攤攤腰嘅我，就睇住施永義跌咗落條屍河度，而阿詠……自己一個，快速滑向個屍山。

「阿詠！！！」

ns216.73.216.98da2

Reading Theme:

Font Size:

Line Spacing:

Paragraph Spacing:

Load the next issue automatically