《屍河明居鑽石山》（是咁的，我發現打喪屍有得升呢） - 507

507

742Please respect copyright.ＰＥＮＡＮＡnqfpE1FyxG

我唔知同我對峙嗰個人，係唔係醫生。

但係我印象中，醫院對病人，尤其佢哋覺得係重症嗰啲，都會特別霸道……咁當然係出於好意啦。

再加上重症病人出現嘅反抗，好多時都係基於心理原因。就好似我阿嫲後來老人癡呆，夠堅持話自己冇嘢，仲成日自己走落街，結果每次都係由啲街坊甚至差佬將佢帶返嚟（當時我仲同屋企人住）。

我而家要做嘅嘢好簡單。

唔想俾人強制打麻醉，我就要證明俾佢哋睇，我唔係重症。

佢哋用三個人合力，都掹唔開我揪住個男人係手。

加上我用緊隻斷咗阿基里斯腱嘅腳，喺病床上踩住一支無綁軍刀嘅長竹竿……支竿本來係想用嚟㩒住我嘅。

佢哋仲想叫支援，亦見到有人拎住針筒趕緊過嚟。

係個男人叫停住其他人。

「你真係頂得住？」佢問我。

「點都要頂。」

我話，「既然阿詠冇事，我仲要趕去救另一個人，佢喺度等緊我！」

既然我係因為莎倫先至嚟到呢度。

我冇可能嚟到就忘記咗個目標！

—————————————

沙！

我開盡個花灑照頭淋。

睇住去水管前啲水，由深綠變成淺綠，再變成無色……只係剩番大量肉渣被隔咗喺過濾罩前。

由於聖母醫院算係半療養院性質，所以佢哋有幾寬敞嘅沖涼設施。

我好熟呢度。

以前係阿詠有份幫我阿嫲沖涼，我都有幫手扶出扶入。

我而家一邊沖涼，一邊啜住包嗰啲啫喱狀嘅能量飲料。

到沖乾淨涼時，都好似飲咗五、六包。

呢個時候，個《原始腦本能》先至解除維持。

「我警告你，唔好幫我關咗個SAM……」

我喺沖涼期間，不斷同自己咁講……正係由於呢個機制仲長開緊，我先至可以令自己唔再回想返呢一路走過嚟親歷過嘅種種嘔心同恐怖嘢，仲有各種人性掙扎。

而家唔係釋放壓力嘅時候。

諗吓我喺老人院時一吓釋放，兩、三個鐘頭就冇咗。

而從我由老人院嚟到呢度，經歷嘅嘢係以倍數強烈程度計……就連身上嘅傷勢，都無辦法比較！

只要我一喺度『減壓』，唔知要典幾耐挨幾多苦，可能醫院啲人要逼我打嗎啡同鎮定劑，強制斷片。

暈咗亦唔係一了百了。

一諗到有可能喺斷片期間發嗰啲惡夢……我而家連瞌埋眼耐啲都唔敢！

「所有嘢，都要等我救返莎倫再算。」

咯咯。

外面有敲門聲。

「著返衫未？」

個男人問：「我入嚟幫你隻手同腳踭做啲應急，會增加你做點素治療嘅效率。」

喺沖涼前，係個男人幫我打咗兩支局部麻醉針。

「OK！你入嚟。」

佢走入嚟後，索性長開浴室度大門。我見到外面走廊有兩、三個人Stand By，拎住啲急救箱，心臟除顫器甚至擔架床等，似乎見我一有事就會衝入嚟急救。

雖然喺喪屍世界，

我已經預咗所有人都只會顧自己，就算醫院亦可能唔會例外。

因此，

其實對佢哋每一分好意，我心裏面係有感激嘅。

個男人望住我對眼，評估緊我嘅精神狀態。

「你仲開住SAM？」佢問。

「係，我講咗我轉頭就要起程，我冇時間抖。」

「咁我會粗魯少少，你忍住……」

佢帶咗啲夾板入嚟，要幫我駁骨，「主要係校返正啲位，同埋掹返啲斷咗嘅骨碎出嚟，否則啲肉生番埋，就算筋腱同肌肉纖維都強化左，啲『骨刺』都會痛到你想死，會嚴重影響活動能力。」

「好彩你主要要處理嘅，係得右手同埋左腳踭，其他少少骨裂啊，斷韌帶嗰啲，做點素治療恢復就得。」

「當然，睇返個路線圖，如果你上到Level 5以上，做點素治療時甚至可以自我排除骨碎等異物，確保完全康復。」

「係呢，你Level幾？開到SAM應該最少Level 2以上吧？」

「……」

我唔係唔想講，

而係我痛到飛起，SAM加麻醉藥都頂唔順，只能忍住唔嗌出嚟。

因為佢要撩開我個傷口，去鉗番啲碎骨出嚟。尤其我右手係俾施永義扭咗麻花，有條手臂骨係斷裂性骨折……

冇幾耐，浴室已經成地血。

「副Con有樣嘢好，可以消除一切感染，包括一般細菌。同你做呢啲嘢，唔需要再打抗生素，因為大腦本身，就含有足以應付所有身體問題嘅化學物質產生，我係話假設嗰個人個腦，已經根據原先設計圖嘅完全發展。」

「呢副Con嘅用途，就係為咗激發出大腦的全部能力。」

我有好多嘢要問佢。

但前提係，我要開得到口講嘢。

「每個人副Con嘅路線圖都唔一樣，視乎戴嗰個人天生係一個點嘅人，又或者後天培養成點嘅人格。」

「講開又講，如果詠詠喺度，你或者可以唔使咁痛。因為佢嘅《無玷者》等級，應該係目前個系統裏面最高。」

「係咪講緊我？」

推住扶行架嘅阿詠，就企咗喺門邊。

ns216.73.216.216da2

Reading Theme:

Font Size:

Line Spacing:

Paragraph Spacing:

Load the next issue automatically