《屍河明居鑽石山》（是咁的，我發現打喪屍有得升呢） - 421

021

665Please respect copyright.ＰＥＮＡＮＡ4yUYEssnTN

（強烈建議你量力而為，不要選擇延遲晉升《夜之眼》的英雄路線。）

（系統無法計算出你有任何成功的機率……因為由此路往，你需要承受超過人類被設計時所能負擔的情緒、創傷、以及各方面忍受能力的上限。）

（是為《孤行》線。）

（最後警告：請從《孤行》線回頭……）

（……否則後果自負。）

砰！

喺我爆門嘅一刻，我感到剎那之間，時間變得好慢、好慢……

我身側同身後，仲感覺到全力奔跑時擦過嘅風壓，已及眾多俾我拋離嘅擋路喪屍，喺我身上劃出的爪痕。

我感到雙臂主要關節一陣挫痛，換嚟嘅係厚重禮堂大門總共12個門較，9個較間分離，三個連同門框扯裂的反震感。

以肩、頸、背、臀同時多組肌肉抽筋為代價，我睇住右手推嗰隻三米高、成吋厚嘅大木門，喺空中打咗十幾個轉，然後直轟落禮堂高台旁邊的隔音木牆上。

而左邊嗰隻，喺擦住施永義塊面飛過之後，好似扔飛碟咁轉彎旋飛出去，打爆咗成排窗掛咗喺樹上。

然後，我先感到自己雙掌發腫滴血，唔知幾隻手指骨裂。

衝咗入去，就表示唔理我有冇資格，事實上我已經同施永義對峙緊。

佢個頭仲保持緊挨咗落一邊膊頭嘅姿勢……即係話，佢頭先係千鈞一髮咁閃開咗，否則道門應該攞咗佢命。

佢望住我，面色發白。

但唔係驚咗我，而係帶驚愕嘅極度震怒！

「你頭先做咗啲咩？係邊一個大腦部份嘅點素燃燒嚟……」

我喘氣到未有力氣回應佢，我甚至連驚都冇力，完全處於一種麻木狀態，咁仲好，直接無視佢嘅等級凌駕。

我視線轉到佢身旁不遠嗰個十字架。

本來綁喺上面個女仔，已經被放咗落嚟……佢係清醒嘅，不過仲處於掩眼塞口而雙手被反綁嘅狀態。

「唔、唔好殺我啊……求吓你放過我……」

佢只能夠喺地上面爬，甚至不辨方向，而佢嘅嗚咽聲，喺空盪嘅禮堂不斷迴旋。

而家個十字架……

係阿詠被綁咗喺上面。

佢身上又多咗幾處瘀青，額角又多咗一處挫傷，應該係佢掙扎時又俾人打嘅。

佢而家只係處於半清醒狀態……

甚至冇辦法維持住望我嘅視線，只係喃喃喺度講。

「朗、朗天……你……過返醫院避一避……嗰邊仲未有危險……唔好……同佢對恃……」

我轉向個醫生。

「你到底仲要我問幾次！」我凶佢，「你究竟想點！係咪要我打到你講啊！」

施永義瞇眼打量我。

佢摸住已經止血嘅面上傷口，仲諗緊頭先我拍飛道門嗰下吧。

「你條升級路線係點？點解可以連《夜之眼》都冇，就可以做到你頭先嘅嘢？你冇跟到路線圖升級？」施永義問，「你……攞完Con，冇返上聖母做Briefing？」

佢呢返說話，透露咗好多嘢。

首先，原來係有所謂Briefing，即係會有專人教我點用副Con？

第二，施永義，唔係負責做Briefing嗰個……即係話，佢未必係整呢副Con出嚟，或者負責派Con嘅眼科醫生。

咁至少佢唔係當日幫我配Con嗰個先。

「你係邊個？你同聖母醫院點解會有呢啲眼鏡，有咩關係？同埋……你到底想要用副Con嚟做咩？想要對阿詠做咩！」我問佢。

但係呢個人好自我中心。

佢好似冇聽到我問題咁，只係喺度自己分析緊……

「哦，所以你係新到連Briefing都聽唔切，難怪咩都唔識……」佢轉頭望出窗外，似乎睇緊天色，「到底你係揀咗邊條路線，點解Level 0都會有呢種爆發力……點解我個Manual冇呢條線？唔通又要我Check返當年個設計圖……」

「喂！聽人講嘢啊！」我重重踏前一步，「問緊你嘢啊！」

「收聲！」佢反吼我。

但係有一樣嘢佢自己可能發現唔到……佢退咗半步。

『佢忌憚緊我……因為佢睇唔明我條升級路線？』

但係呢個時候阿詠同我講：

「唔好……睇小佢……唔好俾佢呃咗……呢個人……呃哂我哋……」

但我覺得自己應該冇睇錯。

佢係想走！

「所以𡃁仔，你算係衝動型人格？」施永義突然放鬆咗落嚟，好陰柔咁嘿嘿笑緊，「我最唔識得同你呢類型打交道，不如咁，我唔同你遊花園嘞，攤開嚟講，我哋各自退後二十步，你救返詠詠，然後我走人，OK？」

佢先退五步，遠離咗個十字架。

只見阿詠更激烈咁叫我走、叫我唔好聽佢擺佈；而地上個女學生，更加驚到爬都爬唔郁，縮喺地上狂喊。

只有我處於察知唔到佢有幾恐怖嘅麻木狀態嗎？

「到你俾啲誠意，退後啦。」佢話。

我冇退後。

而係行前咗五步。

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically