《屍河明居鑽石山》（是咁的，我發現打喪屍有得升呢） - 418

018

589Please respect copyright.ＰＥＮＡＮＡgGFOYLWu2l

條大纜掹得唔算好行，因此我滑落去時，係墜得好緊要，嚴重影響咗我滑行嘅速度……

我滑咗成十秒，先滑到一半！而且速度仲一直減慢緊。

就喺呢個時候，我發現到嗰個男人。

嚴格嚟講，係我睇到佢，佢睇唔到我……因為我目的地係禮堂天台，而佢應該喺課室所在嗰幢書院主建築物，而且應該喺五、六樓左右。

佢企喺樓梯邊，雙手負後，好似好好奇咁望住下面條街……

因此我亦只係透過啲玻璃，勉強望到佢嘅背影。

由於之前阿詠嗰句『你都係醫生嚟』，令我留下太深刻嘅印象，再加上女校出現醫生又太過突兀……

因此，我直覺估計，呢個就係阿詠口中嘅『醫生』！

甚至有可能，呢啲纜索，醫院個大台同條屍河點搞出嚟，都係同呢個人有關！

諗到呢度，我就突然顧忌起嚟。

我而家冇遮冇掩，對方只要一察覺到身後有動靜，一轉過頭，鐵定會發現到我……而呢個恐怕係一個危險人物嚟。

我可以點？

有冇辦法可以無聲落地？或者唔跌落啲墊度，改為喺學校外圍啲樹叢落地……但係阿詠又喺邊？

就喺呢個時候。

著醫生袍嘅男人，擰緊轉頭！

但係佢唔係發現到我，正確嚟講，係望住書院門口嘅街外？

「係阿詠？」

我見到一個著護士服嘅身影，就藏喺街上嘅喪屍群中，好似冇被發覺咁……佢仲比我領先一步，從半打開嘅鐵閘，走咗入呢間聖母書院！

「點解阿詠係由地下行過嚟？」

佢唔係滑繩過嚟嘅？

我俾學校圍牆遮住咗，睇唔到阿詠入嚟後走咗去邊，但係我聽到佢同樓上個醫生講：

「點解你會變成咁！我唔想睇住你變成個咁嘅人啊！施．永．義！」

然後我好清楚見到，樓上個醫生對阿詠嘅說話根本無反應……

佢嘅目光，轉咗過嚟我度！

醫生發現到我。

喺夕陽嘅反射下，我唔肯定……佢係咪對我笑咗一笑。

然後喺下一刻，喺樓梯口再見唔到佢身影。

冇幾耐，我聽到喺同一層學校嘅走廊，傳嚟帶回聲嘅課室門被逐一爆開嘅聲音！

砰！砰！砰！砰！砰！

每爆開一道門，都會爆出一陣放監咁嘅群屍喪叫聲。

啲女學生已經變哂做喪屍！

『但係點解……成單災害爆發得再快，都有一、兩日時間做緩衝，點解學校仲會有咁多人返學？』

而且課室門有幾可會上鎖？

點解呢間學校，會形成咗間間課室都儲滿哂喪屍嘅狀態？

呢個念頭只係一閃而過，下一刻，我已經撻咗落啲軟墊度！喺SAM狀態下，我打個關斗卸咗度力，已經完美企穩返。

而正當我諗緊下一步行動時，我聽到喺學校嘅另一邊，阿詠又喺度大叫：

「唔好啊啊啊啊！」

砰！

學校頂樓最遠嗰間課室嘅門，應聲破開……

然後喺一陣群屍喪叫之間，我聽到……好多活生生嘅女仔慘叫、喪喊嘅響聲！

「唔通最後一間課室，係困住哂啲冇事嘅女學生？」

所以我而家，係親耳聽住呢間課室，正俾啲喪屍衝哂入去亂咬嗎？

我個心寒到唔識形容。

「邪惡……」

除咗呢兩個字，我形容唔到呢種行為！

與此同時，我亦聽到阿詠喺地下嗰層傳嚟一陣崩潰嘅哭喊聲。不過佢好快停咗喊，然後我聽到一陣快速腳踏聲，佢應該係去緊嗰個叫『施永義』嘅男人度！

「我要同阿詠會合先！」

我覺得阿詠可能阻止唔到嗰個男人，佢需要人幫……

而喺呢個時候。

我發現個男人，喺對落第二層樓嘅樓梯口，低頭俯視緊我。

係一個好普通，戴金絲眼鏡，甚至睇落幾斯文嘅男人嚟，最多唔超過三十歲。

但係聯想到好有可能係佢做嘅嘢，就令我覺得，呢個男人身負住一股不可理喻，而且毫無人性的恐怖氣場。

「你、你到底想點？」

我發現自己抬頭嘅質問聲，透露咗自己嘅膽怯……縱使我已經開哂SAM，理論上係唔會驚。

但就喺我啱啱講完個『點』字時……

我視野大閃紅燈！

同最初隔樓觀望時嘅一樣，係一股『任務衝突』嘅警號！

然後我只係睇到佢轉身離開。

喺佢件白袍飛揚之時，佢隨手掉咗件嘢落嚟……我睇住件嘢向住我塊面接近，而我竟然連心諗要開《暴走者》都嚟唔切！

噗！

我塊面俾啲濕淋淋嘅嘢打中！

係一舊血淋淋嘅肉嚟。

仲包住塊爛布……而塊布上面，仲有半個撕爛咗嘅聖母書院校徽。

ns216.73.216.131da2

Reading Theme:

Font Size:

Line Spacing:

Paragraph Spacing:

Load the next issue automatically