《屍河明居鑽石山》（是咁的，我發現打喪屍有得升呢） - 306

006

655Please respect copyright.ＰＥＮＡＮＡRXuY02POUf

我而家唯一嘅希望，就係對正防煙門嘅走廊牆上，有一個高高嘅磨砂窗！

係有鐵絲網喺入面嗰種強化玻璃，十號風球都吹唔爆嗰種。

而喺磨砂窗對上，仲有個氣窗，而家係半開，不過有窗框頂住，肯定爬唔到過去！

《暴走者》剩返一秒唔夠。

「求吓你爭氣啲，隻腿唔好斷啊！」

我回身一腳踭落個窗度！

我諗呢吓係我有生以嚟，第一次踢到隻腳咁高……未踢到塊玻璃，我大髀內側條筋已經好大聲咁啪咗一聲！

又斷一條！

我痛到仆街，成個姿勢歪哂，但好彩亦因為咁，我變咗用腳踭鋤落塊玻璃度！

砰！

塊玻璃裂哂，踢中個位仲凹咗出去成幾CM……但就係冇爆！甚至連玻璃碎都冇跌過出嚟。

塊玻璃入面個鐵絲網，就係為咗防爆嘅。

「我屌你連《暴走者》踢唔開呢種玻璃！」

（等級不足。）

但係《暴走者》已經用完！

而走廊兩邊啲喪屍已經癲哂咁殺到嚟，左邊應該有六、七隻，右邊都有三隻！

透支《暴走者》！

得嗰五秒幾我當然唔打算一個打十個！

我跳上窗邊個駁度，兩手掹住上面氣窗個鋁窗框，用盡力咁扯佢落嚟！

之前爬上我屋企嗰隻喪屍，都扯得甩個窗花啊！

咁我殺得死佢，我冇理由做唔到！

我兩邊膊頭自從受傷好返後，力量扎實咗好多，連同隻右手手踭都強化過，勉強有足夠力氣，一嘢將呢個明顯比住家更堅固嘅窗框，掹咗落嚟！

「哇！」我忍唔住嗌咗出嚟。

手掌割傷，膊頭關節好痛，背脊肌肉都拉傷埋……但呢啲已經預咗，因為我用緊嘅係身體承受唔到嘅力量。

我用力將個爛窗框扔落啲喪屍度，當場就扔到爛肉亂飛。

但係冇時間摘夜之眼了。

啲喪屍正人疊人咁要將我拉返落嚟，我伸盡個人推開哂個氣窗，借力踭開啲喪屍，一吓魚躍咁由一樓跳咗出去！

我根本唔知出面會有啲咩。

但係我冇其他選擇。

……砰！

我剩係知道自己用一邊膊頭落地，好巧妙咁卸咗啲力，打咗兩個關斗，最後仲完美企返起身。

我都唔知自己點做得到。

呢個時候，《暴走者》透支用完……原來係技能嚟。

我發現自己企咗喺屋苑雨天走廊嘅石屎簷蓬上面。

「好、好彩啊……」

我一吓腳軟，就坐咗喺度。

我需要喘幾吓氣。

走廊下面，就係我喺屋企見到嗰條有幾多喪屍徘徊嘅街……稍為近啲嗰幾隻已經聞到我，慢慢走緊埋嚟。

甚至有隻開始爬上簷篷！

而氣窗嗰邊呢？

有好多條手臂伸咗出嚟，但係冇一隻喪屍可以推開其他競爭者爬到出嚟，變相塞住哂個窗。

除此以外，呢條走廊頂上面，並冇喪屍游走。

而大家都知道，呢啲簷蓬走廊幾乎係四通八達，連住每一幢樓同商場，甚至伸到屋苑出入口，方便居民避雨遮太陽。

「太好啦！我可以沿住呢條線，直接行到去出黃大仙條石梯！」

而且途中，會經過話有聖母醫院急救站嗰間惠康！

可惜我唔能夠直接從走廊頂跳入惠康，仲需要跳返落地，走入商場，呢段距離有成三十米左右……

「唔好理咁多！趁住啲喪屍未爬上嚟，跑得幾多得幾多！」

我盡可能摀低身，掩住嘴鼻咁跑，覺得咁樣啲人味會冇飄得咁勁。咁我始終喺三米高空，一般喺地下係睇唔哂個簷蓬頂，因而發現到我嘅喪屍亦唔多。

我沿住走廊轉咗個大彎，回頭一睇，一開頭想爬上嚟追我嗰兩條喪屍，已經爬返落嚟，恢復徘徊狀態。可能因為距離遠咗聞唔返啲味。

比想像中順利好多！

我仲以為一出到樓下就要開住無雙咁打出去……其實就算可以透支《暴走者》，我都冇信心可以擺脫同時俾幾十條喪屍圍住扯住。

條走廊已經行咗一半。

我而家企咗喺惠康對面。

間超級市場雖然外面落哂鐵閘，但係好詭異地，鐵閘中間嗰度鐵門，竟然係打開住嘅。

我甚至睇到裏面仲著住部份燈。

甚至有人喺度裝裝吓，但一見到我望過嚟，就縮返埋。

「點解度門開住，但係啲喪屍冇衝入間惠康？」

ns216.73.216.13da2

Reading Theme:

Font Size:

Line Spacing:

Paragraph Spacing:

Load the next issue automatically