《屍河明居鑽石山》（是咁的，我發現打喪屍有得升呢） - 205

005

796Please respect copyright.ＰＥＮＡＮＡHwLM784HMH

（感染率回落至0.005%以下的安全水平。）

成個人恢復涼爽，亦冇再頭重重，冇好似啲腦漿要變成鼻涕流出嚟咁……我諗我之前應該發緊高燒。

感染率？

我隨即諗到：俾麥包傳染嗎？

喪屍主要係透過被咬而傳染，咬本身唔係重點，而係傷口直接接觸吧？

我兩邊膊頭都被麥包捏傷到入骨，可能就咁已經感染到……又或者喺頭先扭打時，都有好多機會沾染到體液，造成感染。

我成身起碼仲有五、六處擦傷。一邊膝頭哥瘀到滲出血水……

「咦？等等……」

我摸吓自己膝頭哥，消咗腫？本來仲擦起咗塊皮，但而家已經乾咗（咁快？）。我將塊皮摵落嚟，唔痛之餘，下面已經見到嫩紅紅嘅新皮生咗出嚟。

「同埋我全身啲擦傷呢？」

本來見血嘅位，都結哂焦，開始痕，甚至已經痕完了。

呢個時候，我先記得返自己膊頭……

「係喎！我膊頭咁傷，頭先咁樣搬抬搬櫈去頂大門？」

我手臂交叉咁摸返自己膊頭後面個傷口，件衫已經穿咗兩個大窿，我直接摸落去，好熱！

成片傷口區域，好似發緊50度高燒咁！

個感覺好腫脹好緊，但麻木哂唔痛，同埋唔影響用力！雖然動作大啲會流小小血水同有啲痺，但同啱啱俾麥包撕開個傷口時比，已經好返好多！

（肩傷進入『緊急狀況處理』，戰力強行維持於80%的底線，代價是痊癒速度將會延緩20%。）

（體健率回升至95%。）

（進入節省點素模式，剩餘修復將轉入背景運作。）

「……」

我發覺自己比想像中，更快就接受咗啱啱發生嘅一切。

因為我身上的傷勢，真係以超越常識嘅速度好返九成！否則嘅話，就算我冇流血不止，兩條手臂都應該廢咗。

切身嘅體驗，就係最強大嘅說服力。

「我……喺戴咗呢副Con之後，就有咗『免疫喪屍』同埋『傷勢修復』嘅能力？」

我個心突然噗噗聲咁跳！

係興奮。

好似中咗六合彩咁！（我只係中過四獎，但當時已經好High）

仲未夠貼切！

係好似自己跌咗落山崖，以為死硬，點知發現崖底有武功秘笈同埋大補丹藥咁！

但係驟然間，又好多陰謀論喺我腦海閃現。

係副Con……釋放咗好多人體未發掘出嚟嘅潛能？

啲隱形眼鏡點整出嚟，邊個整……點解會喺聖母醫院攞得到？

仲有！

「係阿詠……叫我去配Con嘅！」

突然有一浸一浸嘅毛管戙，由心底發出嚟……但係呢啲唔係恐懼！而係……好似揭發咗啲咩秘密的快感。

有人安排咗一個局。

而唔知道係俾人揀選，定咁啱撞咗入去，我，已經攞到進入呢個局嘅入場券。

（尚有大量點素剩餘，建議提升腦素品質。）

（推薦升級A：杏仁核，目前標準差：1.1；推薦升級B：藍斑核，目前標準差：0.9……）

聽唔明。

但我相信，係副Con內嵌嘅晶片系統，叫我去做一啲大腦方面嘅升級。因為我目光一掃過啲升級選項，就同時出現一個大腦部位示意圖。

嗰啲咩杏仁核，藍斑核等，都係大腦嘅唔同部份。

有咩用？

我發現點落啲名詞度，仲可以睇到詳細說明……但坦白講，我仲喺一個精神極度亢奮嘅狀態，冇心情研究說明書。

當時我未意識到『腦素升級』對生存係幾咁重要。

但我知道咩叫『標準差』，即係同『平均數值』嘅比較：『1.1』即係比正常人平均值要高一成。

我睇自己啲標準差……大致都喺平均值。

有打過機，都知『分配點數』係咩意思：喺某啲Game，當你個角色升級時，係會俾一啲Quota你，比如10點，你鍾意加落攻擊力、防禦力或速度等等都隨便你，睇你想個角色點發展。

而家應該係類似情況。

我坐喺自己張床度，背對緊窗邊，副窗簾好薄，正午時份的陽光熱力，灑落我背脊，好舒服。

我正諗緊點樣分配『點素』，突然……天色轉暗？

唔係喎，我左右兩邊仲係好猛太陽，係對正背脊嗰個位陰咗落嚟？

我聞到一陣帶屍臭嘅陰風……

成身震晒！

驟然麥包單嘢引起嘅恐懼，又被勾起，而且好似過敏反應咁，我覺得自己比頭先仲要驚多一倍……

我有好強烈嘅抗拒，唔敢擰轉頭！

但係我抬面部手機，已經反映到我身後有咩嘢……

係嗰個男人！

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically