《屍河明居鑽石山》（是咁的，我發現打喪屍有得升呢） - E01

歸程

E01

呢部應該係小型貨車嚟，後面個裝貨位係露天，上面仲擺住幾排雪糕筒（三角錐）……

部車嘅司機門本來就係打開住，我諗而家個司機……應該喺坐屍山入面。因為個司機位仲有啲乾咗嘅血跡。

我已經感到屍山冚緊落嚟時嘅大地震！

「開車！開車……點開啊！」

我剩係學過渣電單車！

但係搵過另一部車已經不切實際，而且我連腰傷都醫唔切，爬出車廂都有困難，用腳跑唔係選項！

我扭開車匙……OK引擎有聲！然後我開始搜索記憶，任何坐乘客位時聽司機講過嘅嘢，再加上學電單車時嘅一啲常識……

「離合器、離合器先鬆開，然後油門……死咗火？等等，鬆手掣……」

我頭上已經落緊殘肢血雨！

「郁啊！」

我一開郁部車，前面就俾幾條喪屍撲上嚟，攬住個車頭！

唔止座屍山，地面本來就喪屍橫行！

我只有開後波甩開啲喪屍，但係我油門踩得太大力，變咗成部車開咗入道屍浪入面……

衝出去！

危急關頭，我用順暢到自己都嚇一驚嘅手勢，轉返波再踩盡，勉勉強強由浸屍浪度殺返出嚟！

我要同條屍河鬥快！

要返龍蟠苑，其實有幾條路可以走，但係沿沙田坳道直行嗰條，已經俾之前啲炒車封死哂！

我扭盡呔想要轉左彎入鳳德道，一邊車轆隨即離哂地！

「唔好翻車啊啊啊啊！」

最後架車重重撞咗落紀律部隊宿舍嘅圍牆度，再反彈出馬路，咁先成功轉到彎！

而我身後嘅屍河，亦喺街尾『撞牆』後……

全部轉彎，跟住我湧入鳳德道！

「點先可以擺脫到條屍河？」

條鳳德道當然唔會一路暢通，當初我喺老人院橫過呢條街時，已經見到條街多屍又多炒車，只係未到塞哂嘅地步！

我要一路全速踩油門，一邊避啲壞車，而不斷迎面撲嚟嘅游離喪屍，我撞得就撞，見太多驚撞唔郁，只可以避！

後面個貨斗已經拖住咗好幾條喪屍，仲爬緊上車！

最大鑊係我根本唔識開車！

一條大直路俾我渣到左穿右插，好幾次差啲大炒，個車頭蓋早就飛甩，基本上我每扭呔避一次嘢，部車都一定會造成啲損傷！

而越逼越近嘅屍河，亦帶俾我越來越大嘅壓力……結果我判斷錯誤，駛咗入兩堆撞車位嘅夾層，唔夠位衝出去！

點試都扭唔返部車出嚟！

而屍浪已經冚到，車後亦有喪屍爬到嚟司機位搞我，而我除咗癲咗咁扭軚，轉波，響安，冇嘢可以做到……

「喂！廢青！」

喺我頭上，竟然有把聲喺度嗌我！

「接住我啊！廢老條腰骨挨唔到咁高撻落嚟㗎！」

我抬頭一望……

係老人院嗰個費老！

佢而家吊咗喺騎樓天花板盞大射燈上面！

我用《碎骨者》一手撕甩個已經半爛嘅車頂，一企起身高舉雙手，佢就頂唔住跌咗落嚟！原來佢頭上都有喪屍搞緊，正岌岌可危……

我忍住腰骨劇痛，開盡新學嘅《建設者》，將廢老接住！

「話咗你啲死廢青啦！」

費老馬上搶咗我個司機位，「平時得閒唔學多啲嘢，剩係顧住匿喺屋企打飛機！而家知道自己廢啦？」

「睇老嘢表演啦！」

只見費老熟手司機上身，快速幾個轉軚，再踩行油，就由一個我覺得開唔過去嘅位，成功剷咗出去！

解困！

「我個牌仲未到期㗎！」

廢老話，「當我哋啲地盤佬流㗎？呢款車我大大話話渣咗十幾年！新機場仲係地盤時，試過貨卡位屈蛇咗二十個男人，仲要開行百三咪趕尾班船收工！」

剩係佢將個身挨前去感受軚盤嗰股『戰鬥格』，就係熟手同生手嘅分野……

「仲憨鳩鳩坐喺度做乜？唔使做啊？」

「阿叔呢轉車唔俾屈蛇啊！將後面啲濕鳩仔同我踢哂出去！」

我趁呢個機會，燃燒點素恢復返條腰骨……

我正要出去對付爬咗上貨卡啲喪屍，回頭一望，只見廢老背脊，有幾道抓傷嘅血痕。

我倒抽咗一口涼氣……

「費老，你……」

「我啪咗成排退燒藥先落嚟，而家仲未見有事，」

佢話，「你咪理我啦！你要返龍蟠苑吖嘛？我到屋苑門口你就落車，架嘢我渣走，你自求多福……」

佢已經知道自己會屍變……

「你唔好放棄住！」

我話，「我喺聖母拎咗啲好嘢落嚟，話唔定你都有得救……」

「你講咩話？」

突然有兩條喪屍撲過嚟，阻斷我講嘢！

喺車卡大幅晃動下，我勉強秤起兩條喪屍，將佢哋掉咗出去，差啲自己都跌埋出車！

我爬返上個貨斗，喘定口氣……

「廢老，我話我有方法可以清除……」

就喺呢個時候！

有個好龐大嘅身影，以喪屍嚟講亦極罕見嘅速度，喺路旁瞄準好然後撲咗上我哋架車！

側邊車門亦俾佢撞爛，佢殺咗入我個位，捏住咗廢老！

霎時部貨車瘋狂扭彎，隨時要炒！

我即時開《暴走者》打爆塊後玻璃，伸手捏返住條喪屍，一邊將佢手臂由廢老體內抽返出嚟……

條喪屍力大無窮。

而且佢望住我時，我感到一股唔尋常嘅恨意同暴力！

「……係你？」

《碎骨者》！

最終我將佢個頭扭咗出嚟！

「嗄！嗄！」

喪屍條頸度仲掛住張工作證……裘錦龍，嗰個前NCAA籃球教練。

ns216.73.216.48da2

Reading Theme:

Font Size:

Line Spacing:

Paragraph Spacing:

Load the next issue automatically