《屍河明居鑽石山》（是咁的，我發現打喪屍有得升呢） - 609

609

我追住條血路，走返入醫院。

另一幢大樓嚟。

沿住樓梯直上，我一路擔心緊條陰濕佬會唔會喺邊度設伏，或甚至成條血路都係特登整出嚟引我過去……

但我嘅《無痕者》感應到，施永義真係喺樓上。

就算佢預先佈置咗啲咩，嚟到呢一刻，我已經無第二條路行，只可以追！

我追到上頂樓。

我見到天台度鐵門，有個血手印喺上面……我走近道門，用《碎骨者》忍住道力，成道門卸咗落嚟。

應該冇發出任何躁音。

我一邊拎住道鐵門當盾牌，慢慢向後落幾步樓梯……確認冇任何襲擊甚至動靜，先至將道門擺低喺梯邊。

我走出天台。

抬頭映入我視野嘅，係滿天銀星嘅夜空……

從未喺香港見過咁燦爛嘅星空！喺近乎冇光污染嘅環境下，甚至連銀河都隱約見到……

如果今日真係一個普通夜晚，你話幾好……

……飆！

突然一道仲夏晚風，從左手邊向我吹過嚟！呢種略帶涼意嘅勁風，平日好適合食飽晚飯走出街抖涼……

但喺今時今刻，呢浸晚風……

夾帶住嘅係極其強烈嘅屍臭！

我其實已經知道左手邊有啲咩，我吞咗吓口水，逼自己扭頸一望……

原來個樓梯口，非常靠近天台邊緣，距離三步都冇。

條沙田坳道屍河，就喺我腳邊之下！

我而家，就好似喺啲長洲渡假屋天台，望落樓下太平清礁飄色巡遊咁！當然，更逼更混亂，更多牛鬼蛇神……

嚟到而家，我終於有機會，睇到呢條屍河嘅本來面貌……

之前睇到嗰啲，只算係橫街支流嚟。

所有嘅支流，最終都係塞哂喺呢度，大會合。

屍海怒潮！

呢條直通上山嘅沙田坳道，而家集中咗成個竹園、慈雲山，甚至由獅子山以北越山而嚟嘅喪屍……

而呢條河嘅另一端，係由一座堤壩咁嘅街壘所截住。

喺個街壘前面，啲喪屍逼到滿瀉，好似個『堰塞湖』咁，瀉到對面成個竹園村都係喪屍……

但即使已塞成咁，啲喪屍依然大致朝住座街壘往上爬。就好似個街壘本身，有一種對喪屍極之吸引嘅嘢，令佢哋不惜屍疊屍都要汹湧過去……

之前Jason已經向我提及過有呢個街壘：正因為個街壘塞住，先會形成呢條屍河。

原來個街壘所在，比我想像中要近得多。

同聖母最近街口個位計起，只係隔咗兩條馬路！

就喺同竹園交界嘅十字路口，我睇落……最初應該係炸冧咗一幢唐樓，借啲瓦礫做基底再堆嘢上去嘅。不過而家已經疊咗唔佑幾層喪屍上去，只係見到好少石屎瓦礫等凸到出嚟……

我估計，個街壘有成七、八層樓咁高。

甚至稱呢個街壘為『屍山』，仲更貼切。

只係沙田坳道係一條好斜嘅上山道，因此即使我而家企緊嘅天台，都係七、八層樓咁上下，但計埋山坡斜度，我所在嘅位置，依然俾屍山山頂仲要高大約兩層樓。

直線距離，大約百零二百米吧？

而到底係咩嘢，令到啲喪屍一直盲目咁堆高？

「十字架……」

喺個屍山嘅山頂，立住一座我諗有兩層樓高嘅十字架。

好似夾好咗咁，十字架上方，就係今晚嗰一輪黯沉躁鬱嘅月血。

成個環境，成個氣氛……

令我心裏面不期然出現咗呢三個字：

『獻祭場』。

……而喺個十字架上方，就以個月血為背景，竟然有一部好似小型載人飛機咁大嘅無人機，喺上空盤旋緊！

———————————————

發生緊咩事！

我一時間冇辦法理解，我所睇到嘅嘢裏面，有幾多係由施永義安排，全部組合起嚟，成件事又代表咗啲咩……

但係我判斷呢個十字架，係施永義為咗釘阿詠上去而設嘅！

咁阿詠呢？

好似見唔到阿詠……

等等！

冷靜啲！唔好俾條屍河同座屍山嚇到失去冷靜……部無人機，都唔使理佢住。

用《無痕者》，開《血色追蹤》，睇清楚座屍山！

由於《無痕者》會放大我五感敏銳度，因此條屍河其實對我產生緊好大干擾，我要適應返，將啲背景干擾好似『降噪』咁忽略佢……

諗吓！既然個屍山喺對面街，點解施永義會帶住阿詠過嚟呢邊？

同埋，如果最終係要釘阿詠上個十字架度，點樣抬佢上去？

「係飛索……」

一定有飛索，可以直接通向個十字架度！係，隔開啲背景干擾，我睇到條飛索……

唔止一條！

鏘！

喺呢個時候，我聽到兩條街以外，傳嚟打爛玻璃嘅聲音。

就好似喺後欄時，個細路喺塊玻璃被打爛後，就被吊喺個滑輪手把度滑落嚟咁……

我睇住靠近屍山另一邊嗰幢私樓，有一大袋嘢正沿住條飛索滑緊落去個屍山度……袋嘢太重，甚至責到條飛索係向下彎，令個滑行速度變得好慢………

係一個滴緊血嘅大麻包袋！

個袋口，仲有個男人嘅上半身凸咗出嚟。就好似陳朝輝咁，俾人用鐵勾穿過頭骨，吊住喺個把手上……

個男人係冇手嘅。

佢兩邊膊頭，各自有塊布封住傷口，再搵鐵線好似縫針咁穿實……令到啲血唔會咁快噴哂，但係又唔會止到血，透過塊濕透嘅麻布，成條血線咁滴出嚟……

而佢俾個麻包袋笠住嘅下半身，不尋常腫脹，袋底滴血亦更嚴重，令人感到個袋裏面，唔止剩係得個男人嘅殘肢。

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically