《屍河明居鑽石山》（是咁的，我發現打喪屍有得升呢） - 607

607

我一聽落去，個套路實在太似曾相識！

「一定係施永義條躝坦！」

我話，「佢用聲東擊西，先爆開個鎖等你鎖唔到門，再引喪屍嚟誘你出去，但其實佢一直匿咗喺病房入面，趁你忙住打喪屍先從後偷襲你……」

「Carlos施……」

佢呆咗呆，「佢……真係玩到入返嚟醫院？」

話說施永義現身時，女醫生已唔喺現場，所以唔知佢曾經喺天台發過一輪嗡風吧？

「咁即係話，」

女醫生吞咗吞口水，不期然壓低咗音量：『阿詠和Carlos施而家就喺病房入面？』

我搖頭。

其實我係借緊同女醫生講嘢呢一、兩分鐘，用盡所能以《無痕者》隔門偵察……

我感應唔到門後面有生命跡象。

甚至，個病房應該冇留低咩血跡……唔通施永義冇襲擊過病房啲老人家？

咁佢哋同阿詠又去咗邊？

就喺呢個時候……

我察覺到有街外的喪屍，喺另一邊侵入呢間病房！

應該係俾女醫生條手臂吸引過嚟嘅！

我唔識點處理甩骹，亦唔知點可以擰返佢條手臂出嚟而唔整傷佢，所以我只係做最簡單嘅嘢：用《碎骨者》將成道門撕撚開！

我隨即衝入病房，將啱啱衝入嚟嗰兩條喪屍掹頭，取眼！

轉頭望返個女醫生，見到已經爬返起身，甚至自己撞隻膊頭落奉牆度，慘叫咗聲，就啪返埋隻骹。

「平日啪病人就啪得多，」

佢流哂冷汗，「第一次啪自己……原來真係咁痛！」

「你挨埋牆休息吓先。」

我同佢講，然後環視一圈呢個病房。

一陣強烈『既視感』襲來……

咁啱，呢度係我阿嫲嗰時住嗰間大房嚟……佢亦喺呢度走嘅。

只係，而家間房的狀況，可以話係不尋常到詭異嘅地步……啲病床仲留住病人訓過嘅凹痕，以及一陣老人味；啲被鋪只係好自然咁掀開，有個別病床或儀器推歪咗少少……

冇濺血，冇殘肢，冇打鬥跡象，甚至唔似有匆忙疏散嘅跡象！

啲老人應該係以非緊急嘅狀況被送走？……甚至，係佢哋自己落床走嘅？

有可能嗎？

除非用途改變咗，否則以我所知，呢間病房專門安置一啲後期老人癡呆症病人，大半都要靠人推輪椅，仲識扶住用腳行已經好叻。

但唔係啊！啲輪椅仲摺埋泊哂喺床邊，冇用過！

呢班病人，如果冇屍變嘅話，又會去得邊？

「同埋施永義呢？」

拗甩女醫生隻骹呢吓，喺個門窿度有留低少少施永義嘅血跡……除此以外，佢應該好小心冇喺病房入面流血。

仲有樣嘢：點解佢唔直接整死個女醫生？

唔係話要生食松果體㗎咩？

『即係話，』

我心諗，『佢係特登將個女醫生卡喺門外……等我嚟救？拖時間？』

『又或者……施永義入嚟見到阿詠做緊嘅嘢，令佢甚至唔記得去食個女醫生？』

而呢個，或者係同病房老人失蹤哂呢件事有關！

———————————

我同個女醫生提起黃狗同唐唐嘅事，佢用力推咗我一下，證明自己已經冇嘢，就咁同我分道揚鑣！

話說呢間大病房，靠窗嗰邊係有道門，方便啲護士扶啲老人家或推輪椅出去曬太陽。

頭先嗰兩條喪屍，就係經呢度門走入嚟嘅。

我由呢度門走出去！

門外，係一條好窄嘅小步道，道旁就係醫院外牆。而圍牆外邊，就係屍河最密集最汹湧嘅沙田坳道段落！

啲屍叫聲好似浪濤拍岸咁湧落嚟，我想像唔到出面有幾多喪屍，但好彩呢道圍牆勁重天拿水同殺蟲水味，好少喪屍會選擇爬入嚟。

但反過嚟諗，既然都有喪屍入到嚟，可能條屍河已經堆疊到差唔到有呢奉牆咁高！

暫時……唔好諗條屍河住。

我留意到有血色。

就喺出門靠右手邊方向，而且啲血跡有抹住牆走的痕跡……我腦裏面馬上閃出一個畫面：阿詠正俾施永義挾持住！

佢想將阿詠帶去邊？

我馬上追上去！

轉過一個牆角後，眼前出現一座涼亭……座涼亭我好熟，喺我阿嫲仲識行時，我同阿詠成日帶佢過嚟坐……

喺呢一刻，涼亭依舊。

只係……人面全非！

我完全呆住咗！

「啲老人家……原來喺哂呢度？」

冇辦法形容我而家眼前呢一幕，有幾詭異。完全諗唔明點解可以發生到呢件事……我見到啲老人家喺度行嚟行去。

但係佢哋唔係喪屍嚟……

「奇蹟……」

我忍唔住，啲眼淚流咗落嚟……

ns216.73.217.8da2

Reading Theme:

Font Size:

Line Spacing:

Paragraph Spacing:

Load the next issue automatically